Երուսաղէմի Հայոց Պատրիարքի Ընտրութիւնները Պիտի Սկսին 23 Յունուար 2013-ին

0
160

Երուսաղէմի Հայոց պատրիարք Թորգոմ Մանուկեանի վախճանման պատճառով՝ 23-25 Յունուար 2013 թուականին Երուսաղէմի մէջ պիտի գումարուի Սրբոց Յակոբեանց միաբանութեան ժողովը, ուր պիտի ընտրուի նոր պատրիարք:

Ըստ Երուսաղէմի Սրբոց Յակոբեանց միաբանութեան կանոնի, պատրիարքի թեկնածու կրնայ ըլլալ միայն եղբայրութեան անդամը, որ 35 տարեկանէն վեր է: Փաստօրէն միաբանութեան ոեւէ անդամ, որ 35 տարին լրացած է, Պատրիարքի հաւանական թեկնածու է: Այժմ նման թեկնածուներու թիւը կը հասնի 30-ի:

Առաջին հսանգրուանի ընթացքին գաղտնի քուէարկութեամբ պիտի ընտրուին 5 եկեղեցականներ: Այդ 5-էն պիտի ընտրեն 3-ը, իսկ յետոյ մէկը, որ պիտի դառնայ Երուսաղէմի Հայոց պատրիարք:

Ամենապատիւ Տ. Թորգոմ արքեպիսկոպոս Մանուկեան ծնած է 16 Փետրուար 1919 -ին, Պաղտատի հիւսիսը (Իրաք)` Պաքուպա քաղաքին մօտ գտնուող փախստականներու գաղթակայանին  մէջ: Պաղտատի Սրբոց Թարգմանչաց հայկական դպրոցին մէջ նախակրթական ուսումն աւարտելէ ետք ընդունուած է Երուսաղէմի Հայոց Պատրիարքարանի Սրբոց Յակոբեանց ժառանգաւորաց վարժարանը:

1962-ին ընտրուած է Հայ Եկեղեցու Ամերիկայի Արեւմտեան թեմի առաջնորդ:

Նոյն թուականի Հոկտեմբեր 14-ին, ձեռամբ երջանկայիշատակ Ամենայն Հայոց Վազգէն Ա Կաթողիկոսի, Մայր Աթոռ Ս. Էջմիածնի մէջ ձեռնադրուած է եպիսկոպոս: 1966.ին Արեւմտեան թեմի առաջնորդի պաշտօնին վրայ 4 տարի ծառայելէ ետք Թորգոմ Եպիսկոպոսը ընտրուած է Հայ Եկեղեցու Ամերիկայի Արեւելեան թեմի առաջնորդ:

Երկու տարի անց երջանկայիշատակ Վազգէն Ա Կաթողիկոսի կողմէ անոր շնորհուած է Արքութեան պատիւ:
Արեւելեան թեմի առաջնորդի պաշտօնին վրայ 24 տարի ծառայելէ ետք Թորգոմ Արքեպիսկոպոսը 22 Մարտ 1990-ին ընտրուած է Երուսաղէմի 96-րդ Պատրիարք:

LEAVE A REPLY

Please enter your comment!
Please enter your name here