Հայաստանը Եւ Եւրոմիութիւնը Ստորագրեցին Մուտքի Անցագիրներու Դիւրացման Համաձայնագիրը

0
123

Եւրոմիութիւնը եւ Հայաստանը Պրիւքսէլի մէջ ստորագրեցին մուտքի արտօնագիրներու դիւրացման համաձայնագիրը: Դեկտեմբեր 17-ին ստորագրման արարողութեան Եւրոմիութեան կողմէ մասնակցած է Կիպրոսի արտաքին գործոց նախարար Էրատօ Կոզաքու-Մարքուլիս` իբրեւ Եւրոմիութեան խորհուրդի նախագահ, ԵՄ Ներքին գործոց յանձնակատար Սեսիլիա Մալմսթրոմ, Հայաստանի կողմէ` ՀՀ արտաքին գործոց նախարար Էտուարտ Նալպանտեան: Համաձայնագիրը կ’ուղարկուի Եւրոխորհրդարան` ներքին ընթացակարգերու եւ ամբողջացման համար: Երբ երկու կողմերը յայտարարեն, որ բոլոր ներքին ընթացակարգերը սպառուած են, այդ յայտարարութեան յաջորդող ամսուան առաջին օրը համաձայնագիրը ուժի մէջ պիտի մտնէ, բայց ոչ աւելի շուտ, քան երկու վարչարարական համաձայանգիրներու ուժի մէջ մտնելը: Երկու համաձայանգիրները պէտք է ուժի մէջ մտնեն միաժամանակ: Միացեալ Թագաւորութիւնը, Իրլանտան ու Դանիան համաձայնագիրին մաս չեն կազմեր:

Համաձայնագիրը Հայաստանի քաղաքացիներու համար, մասնաւորապէս անոնց, որոնք յաճախ կը ճանապարհորդեն, աւելի դիւրին եւ մատչելի կը դարձնէ Եւրոմիութեան երկիրներ ճանապարհորդութիւնը կարճաժամկէտ արտօնագիրներով` հնարաւորութիւն տալով 90 օրուան փոխարէն ճանապարհորդել 180 օր:

Համաձայնագիրները վաւերացման փուլ պիտի մտնեն 2013 թուականի առաջին կիսուն: Մուտքի անցագիրներու  դիւրացման համաձայնագիրով ՀՀ քաղաքացիներու համար կը նախատեսուին Շէնկենեան գօտիի երկիրներ մուտքի վիզաներ ստանալու դիւրացուած ընթացակարգեր: ԵՄ երկիրներ պարզեցուած մուտք կը նախատեսուի շարք մը դասակարգերու ՀՀ քաղաքացիներուն համար, մասնաւորապէս` պաշտօնական պատուիրակութեան անդամներու, գիտնականներու, ուսանողներու, լրագրողներու, մարզիկներու եւ արուեստի գործիչներու, ԵՄ երկիրներու մէջ օրինական բնակութիւն ունեցողներու մերձաւոր ազգականներու, ԵՄ երկիրներու մէջ գործող հայկական սփիւռքի կառոյցներու կողմից կազմակերպուող միջոցառումներու մասնակիցներու, եւ այլոց համար: Կը նախատեսուի նաեւ նուազեցնել Շէնկենեան մուտքի արտօնագրի գինը` դարձնելով 35 եուրօ, ինչպէս նաեւ զայն դարձնել անվճար կարգ մը դասակարգերու քաղաքացիներուն, որոնց շարքին` երեխաներու եւ թոշակառուներու համար:

ԵՄ-ի հետ մուտքի արտօնագիրներու դիւրացման եւ յետընդունման համաձայնագիրներու շուրջ բանակցութիւնները մեկնարկած էին այս տարուան Փետրուարին Երեւանի մէջ:

 

LEAVE A REPLY

Please enter your comment!
Please enter your name here