ԵՄ Բարձր Կը Գնահատէ 2012-ին ՀՀ-ի Հետ Փոխյարաբերութիւններուն Մէջ Ձեռք Բերուած Արդիւնքները. Ուիլիամ Վան Տէր Կիսթ

0
155

 Եւրոմիութիւնը կ’ամփոփէ 2012-ին Հայաստանի մէջ իրականացուցած իր գործունէութիւնը` բարձր գնահատելով Հայաստանի հետ փոխյարաբերութիւններուն մէջ ձեռք բերուած արդիւնքները: Հայաստանը դրական արդիւնքներ արձանագրած է նաեւ «աւելին աւելիի դիմաց» սկզբունքով իրականանացուող շարք մը ծրագրերով: Այս մասին, ըստ Armenpress.am-ի, Դեկտեմբեր 18-ին լրագրողներու  հետ հանդիպման  ժամանակ յայտարարած է Եւրոպական Միութեան խորհրդատուական խումբի ղեկավար Ուիլիամ Վան Տէր Կիսթը:

«2012-ին Հայաստանը եւ Եւրոպական Միութիւնը ունեցած են շարք մը կարեւոր ձեռքբերումներ: Յառաջընթաց արձանագրուած է ոչ միայն ընդհանուր մակարդակով, այլ նաեւ առանձին ոլորտներու մէջ, մասնաւորապէս, հաստատուած է մարդու իրաւունքերու պահպանման ռազմավարութիւնը, Մարդու իրաւունքերու պաշտպանի գրասենեակի կողմէ բացուած է տարածքային վեց գրասենեակ’ տարբեր  հարցեր քննարկելու եւ ուսումնասիրելու նպատակով»,- ըսած է Վան Տէր Կիսթ` աւելցնելով, որ ՀՀ Ազգային ժողովը բարելաւած է եւ սերտացուցած է յարաբերութիւնները քաղաքացիական հասարակութեան հետ:

Խօսելով ԵՄ Մուտքի արտօնագրերու դիւրացման համաձայնագրի ստորագրութեան մասին` Վան Տէր Կիսթ շեշտած է անոր կարեւորութիւնը Հայաստանի համար:

«Այս համաձայնագրի ստորագրմամբ Հայաստանի քաղաքացիները կը ստանան լայն հնարաւորութիւններ: Քաղաքացիներու որոշ խումբի համար` լրագրողներու, ուսանողներու, գիտնականներու, բուժման նպատակով մեկնող անձերու համար ներկայացուող փաստաթուղթերու ցանկը կը պարզեցուի: Բացի այդ` մուտքի արտօնագրերու վճարը նուազած է` հասնելով 35 եուրոյի բոլոր քաղաքացիներուն համար, կը կրճատուի նաեւ բոլոր տեսակի մուտքի արտօնագրերու ուսումնասիրութեան համար պահանջուող ժամկէտը»,- մանրամասնեց Եւրոպական խորհրդատուական խումբի ղեկավարը:

Վան Տէր Կիսթը յառաջընթաց կը տեսնէ նաեւ քաղաքական ընդելուզման առումով:

«Քաղաքական երեք կուսակցութիւն միացած է Եւրոմիութեան «ընտանիք»-ին, որ հնարաւորութիւն տուած է մասնակցելու Մարսէյլի եւ Պուխարեսթի մէջ կայացած գագաթնաժողովներուն: Դրական յառաջընթաց արձանագրուած է նաեւ ազատ առեւտուրի գօտիի ստեղծման համաձայնագրի ստորագրման ուղղութեամբ. կայացած է քննարկումներու երեք փուլ, քննարկուած է համաձայնագրի 15 գլուխ»,- ըսած է Եւրոպական խորհրդատուական խումբի ղեկավարը: Ան կ’ակնկալէ, որ այս համաձայնագիրը պիտի ստորագրուի 2013-ի վերջը:

Անդրադառնալով ԵՄ Ընկերակցութեան համաձայնագրի ստորագրման` Վան Տէր Կիսթ ընդգծած է, որ այդ փաստաթուղթի ստորագրումը կը պահանջէ բաւական երկար ժամանակ, քանի որ կ’ընդգրկէ տարբեր ոլորտներ:

ԵՄ խորհրդատուական խումբի անդամ, Հանրային կառավարման բարեփոխումներու գծով խորհրդատու Քարլ Ուլպրիխտի խօսքով` ԵՄ Ընկերակցութեան համաձայնագրի ստորագրման նպատակով պէտք է մշակել աշխատանքային ծրագիր եւ առաջնորդուիլ անով:

«Մենք նախաձեռնած ենք կլոր սեղան, ուր քննարկուած է, թէ ինչպէս ճիշդ պիտի ըլլայ մշակել կաշառակերութեան դէմ ծրագիրը` ընդհանուր, թէ առանձին ոլորտներու համար»,- ըսած է  Ուլպրիխտ` ընդգծելով, որ արդարադատութեան ոլորտի համար մշակուած ռազմավարութիւնը կը դիտուի իբրեւ յաջող օրինակ: Իսկ ատիկա, ըստ անոր կ’ենթադրէ, որ կաշառակերութեան դէմ ծրագիրը պէտք է դիտարկել ըստ առանձին ոլորտներու:

LEAVE A REPLY

Please enter your comment!
Please enter your name here