ՍուրիոյԿառավարութիւնը Խոստացած Է 48 Ժամուան Ընթացքին Վերականգնել Հալէպի Ելեկտրականութիւնը

0
120

 Հալէպի մէջ արդէն երրորդ օրն է` ելեկտրականութիւն չկայ, քաղաքը ամայացած է: Այս մասին «Արմենփրէս»-ին տեղեկացուցած է Բերիոյ թեմի ազգային առաջնորդարանի մամլոյ քարտուղար Ժիրայր Ռէյիսեան` աւելցնելով, որ Դեկտեմբեր 17-ին Հալէպ այցելած վարչապետ Ուաէլ Հալքին, նախարարները եւ բարձրաստիճան պաշտօնեաները խոստացած են 48 ժամուան ընթացքին նորոգման աշխատանքներ իրականացնել եւ վերականգնել ելեկտրականութիւնը:

Վարչապետին եւ նախարարներու հետ կայացած հանդիպման ժամանակ անոնց ներկայացուած են քաղաքին դիմագրաւած բոլոր խնդիրները, դժուարութիւնները: Կառավարութիւնը նաեւ խոստացած է ծովեզերեայ մօտակայ քաղաքներէն հաց մատակարարել  Հալէպ` փորձելով լուծել հացի տագնապը: Միջոցներ պիտի ձեռնարկուին նաեւ վառելանիւթի խնդիրները լուծելու ուղղութեամբ:

Մամլոյ քարտուղարը նաեւ տեղեկացուցած է, որ հաղորդակցութեան միջոցները եւս կանոնաւոր չեն գործեր: Իսկ ինչ կը վերաբերի քաղաքին մէջ կառավարական ուժերու եւ ընդդիմադիրներու միջեւ տեղի ունեցող բախումներուն, ապա Ռէյիսեանի տեղեկացմամբ` ռմբակոծութեան ձայներ մերթ ընդ մերթ կը լսուին:

Սուրիոյ մէջ մօտ 21 ամիս շարունակուող բախումներու հետեւանքով զոհուած է մօտաւորապէս 40 հազար մարդ: Դամասկոսն ու Հալէպը լուրջ վնասներ կրած են: Հալէպի մէջ ձմեռնամուտէն  ետք  խորացած  են հացի ու բնակարանները տաքացնելու խնդիրները:

LEAVE A REPLY

Please enter your comment!
Please enter your name here