Մենք Պիտի Օգնենք Սուրիոյ Հայերուն ե՛ւ Հալէպի, ե՛ւ Երեւանի Մէջ. Սերժ Սարգսեան

0
122

 Աշխատանքային այցով Ռուսիա գտնուող նախագահ Սերժ Սարգսեան Դեկտեմբեր 19-ին Մոսկուայի մէջ մասնակցած է Հաւաքական Անվտանգութեան Պայմանագրի Կազմաակերպուփեան (ՀԱՊԿ) հաւաքական անվտանգութեան խորհուրդի նստաշրջանին: Այս մասին կը յայտնեն ՀՀ նախագահի մամլոյ գրասենեակէն:

ՀԱՊԿ անդամ պետութիւններու ղեկավարներու նեղ, ապա պատուիրակութիւններու անդամներու մասնակցութեամբ ընդլայնուած կազմով հանդիպումներու ժամանակ ՀԱՊԿ գլխաւոր քարտուղար Նիքոլա Պորտիւժան տեղեկատւութիւն ներկայացուցած է ՀԱՊԿ գործունէութեան եւ ստորագրման առաջարկուող փաստաթուղթերու վերաբերեալ, որմէ ետք նիստի մասնակիցները, ի թիւս օրակարգի այլ հարցերու, քննարկած են միջազգային իրավիճակի միտումները, հաւաքական անվտանգութեան համակարգի կատարելագործման ուղղուած միջոցներուն, մինչեւ 2020 ՀԱՊԿ-ի ռազմական բաղադրիչի զարգացման, արտակարգ իրավիճակներու մէջ հաւաքական արձագանգման համակարգի կատարելագործման հիմնական ուղղութիւններուն վերաբերող հարցեր:

Ընդլայնուած կազմով բանակցութիւններու ժամանակ նախագահ Սերժ Սարգսեան իր ելոյթին մէջ նախ շնորհակալութիւն յայտնած է ՌԴ նախագահ Վլատիմիր Փութինին` Մոսկուայի մէջ ՀԱՊԿ նստաշրջանի հրաշալի կազմակերպման համար, շնորհաւորած Ղազախստանի նախագահ Նուրսուլթան Նազարպաեւին` Կազմակերպութեան համար յոբելինական տարուան ընթացքին նախագահութիւնը յաջողութեամբ աւարտելու եւ ՀԱՊԿ ամրապնդման ուղղուած գործին մէջ արդիւնաւէտ համագործակցութեան համար, ապա յաջողութիւններ մաղթած Կազմակերպութեան նախագահութիւնը ստանձնած Խրխըզստանի Հանրապետութեան եւ անոր նախագահին: Հանրապետութեան ղեկավարի խօսքով, ՀԱՊԿ-ի ծիրէն ներս կազմակերպութեան անդամ պետութիւններու համագործակցութեան փորձը ցոյց կու տայ, որ 20 տարի առաջ այդ երկիրներու կողմէ եղած ռազմավարական ընտրութիւնը ճիշդ էր եւ արդարացուած:

Կազմակերպութիւնը համաչափօրէն կը զարգացնէ առկայ սպառնալիքներուն արձագանգման արդիւնաւէտ համակարգը: «Ընթացիկ տարին Կազմակերպութեան ջանքերը կեդրոնացած եղած են հիմնական երեք ուղղութիւններու վրայ. ՀԱՊԿ ռազմական ներուժի ամրապնդում, արտաքին քաղաքականութեան համակարգման արդիւնաւէտութեան բարձրացում եւ ահաբեկչութեան, թմրանիւթերու անօրինական շրջանառութեան ու ոչ օրինական արտագաղթի հակազդեցութեան բնագաւառներուն մէջ համագործակցութեան ընդլայնում:

Սեպտեմբերին Հայաստանի մէջ յաջողութեամբ իրականացան «Փոխգործակցութիւն-2012» զօրավարժութիւնները: Ե՛ւ նախապատրաստական շրջանը, ե՛ւ անմիջականօրէն  զօրավարժութիւնները ակնյայտօրէն ցուցադրեցին բազմաբնոյթ եւ տարաբնոյթ խնդիրները համատեղ լուծելու մեր երկիրներու ունակութիւնը` ներգրաւելով զօրամիաւորումները, ներքին զօրքերու ստորաբաժանումները, յատուկ ծառայութիւնները եւ արտակարգ իրավիճակներու գծով ուժերը: Հայաստանի մէջ իրականացած զօրավարժութիւններու ընթացքին առաջին անգամ ՀԱՊԿ ձեւաչափով լիարժէք մասնակցութիւն ունեցաւ Կարմիր Խաչի միջազգային կոմիտէն:

Այդ զօրավարժութիւնները, ինչպէս նաեւ անոնց նախորդած «Ռուպեժ-2012» զօրավարժութիւնները եւ ՀԱՊԿ մասնակից պետութիւններու խաղաղապահ անձնակազմի մասնակցութեամբ առաջին համատեղ` «Անխախտ եղբայրութիւն-2012» զօրավարժութիւնները նշանակալի ներդրում ունեցան մեր զինուած ուժերու համատեղելիութեան ամրապնդման, մեր Կազմակերպութեան ներուժի զարգացման գործին: Կը փափաքիմ յատկապէս ընդգծել քարտուղարութեան ջանքերը, որոնք յանգեցուցին ՄԱԿ-ի խաղաղութեան պահպանման գծով գործողութիւններու վարչութեան հետ Արձանագրութեան ստորագրման: Համոզուած եմ, որ մեր խաղաղապահ անձնակազմի մասնակցութիւնը խաղաղութեան պահպանման գծով միջազգային ամենանշանակալի առաքելութիւններէն մէկուն մէջ, իրօք, ռուպիկոն է անոնց կայացման հարցին մէջ: Անիկա նշանակալիօրէն պիտի  բարձրացնէ մեր կազմակերպութեան միջազգային հեղինակութիւնը»,- նիստի մասնակիցներուն ըսած է նախագահ Սերժ Սարգսեան:

Հանրապետութեան ղեկավարը անդրադարձած է նաեւ տարածաշրջանի խնդիրներուն եւ մարտահրաւէրներուն, Մերձաւոր Արեւելքի մէջ առկայ լարուած իրավիճակին եւ ներկայացուցած մեր երկրի դիրքորոշումները: «ՀԱՊԿ պատասխանատւութեան գօտիին մօտ տարածաշրջաններու մէջ իրադարձութիւններու վերլուծութիւնը լաւատեսական կանխատեսումներու հիմք չի տար: Ատիկա ե՛ւ Աֆղանիստանն է, ե՛ւ Իրանի շուրջ աճող լարուածութիւնը, ե՛ւ Սուրիոյ իրավիճակը: Այնտեղ շարունակուող զինուած առճակատումը կ’ապակայունացնէ ամբողջ Մերձաւոր Արեւելքը: Սուրիոյ մէջ կ’ապրի հայկական մեծ համայնք: Անոնք այն մարդոց երեխաներն ու թոռներն են, որոնք հրաշքով փրկուած են Օսմանեան կայսրութեան մէջ ցեղասպանութենէն:

Տասնեակ հազարաւոր հայեր դարձած են սուրիական հասարակութեան անքակտելի մասը` իրենց ներդրումը ունենալով այդ երկրի զարգացման ու ամրապնդման գործին մէջ: Արդէն Հայաստան եկած են աւելի քան 6000 սուրիահայեր, եւ այդ հոսքը մեր կանխատեսումներով պիտի աճի: Մենք պիտի օգնենք Սուրիոյ հայերուն ե՛ւ Հալէպի, ե՛ւ Երեւանի մէջ: Հայաստանը հանդէս կու գայ արիւնահեղութեան անյապաղ դադրեցման եւ սուրիացիներու կողմէ հարցերու խաղաղ կարգաւորման հասնելու դիրքերէն»,- նշած է ՀՀ նախագահը:

Սերժ Սարգսեան խօսած է նաեւ Իրանի հետ յարաբերութիւններու, տնտեսական համագործակցութեան զարգացման մասին, որուն ծիրէն ներս քանի մը շաբաթ առաջ Հայաստանի եւ Իրանի սահմանին սկսած է համատեղ նոր հզօր ջրաելեկտրակայանի շինարարութիւնը: Անդրադառնալով հարաւկովկասեան տարածաշրջանի մարտահրաւէրներուն` ՀՀ նախագահը ընդգծած է, որ կը շարունակէ տարածաշրջանի անվտանգութեան լրջագոյն մարտահրաւէր մնալ Լեռնային Ղարաբաղի հակամարտութեան կարգաւորման հարցով Ատրպէյճանի ապակառուցողական մօտեցումը. «Անիկա կը  դրսեւորուի բանակցային գործընթացի տրամաբանութեան հետեւելուն` ատրպէյճանական իշխանութիւններու դժկամութեան կամ անկարողութեան մէջ, որ բաւական յստակ շարադրուած է ԵԱՀԿ Մինսքի խումբի համանախագահ երկիրներու` Ռուսաստանի, ԱՄՆ-ի եւ Ֆրանսայի նախագահներու բազմաթիւ յայտարարութիւններու մէջ: Նոյնիսկ, կը թուի թէ ձեռք բերուած համաձայնութիւնները` միջադէպերու հետաքննութեան մեքենականութեան ստեղծումը եւ դիպուկահարներու յետքաշումը կը թորփիլահարուի պաշտօնական Պաքուի կողմէ:

Մենք համոզուած ենք, որ գոյութիւն ունեցող հակամարտութիւններու լուծման առումով միակ եւ անայլընտրանք ճանապարհը բանակցութիւններն են: Դուրս կու գայ, որ կողմերու միջեւ զինադադարի հասնելէ ետք, յատկապէս, երբ անիկա կը պահպանուի արդէն 18 տարի, ռազմական գործողութիւններու վերսկսումը եւ նոյնիսկ այդպիսի վերսկսման սպառնալիքը միջազգային իրաւունքի չափանիշներու եւ սկզբունքներու ուղղակի խախտում է, ատիկա ամենաանհեռատես ճանապարհն է դէպի բռնութեան, ատելութեան, արիւնահեղութեան նոր ալիքի: Այդպէս խնդիրները չեն լուծուիր, այլ կը դառնան աւելի բարդ: Ատրպէյճանական քարոզչութիւնը ամբողջ սերունդ կը դաստիարակէ այլատեացութեան եւ անհանդուրժողականութեան մթնոլորտի մէջ: Իմ խօսքերու հաստատումը վախկոտ եւ փոքրոգի մարդասպանի անուան շուրջ հերոսի կերպարի ձեւաւորումն է, որ հունգարական իշխանութիւններու կողմէ արտայանձնուեցաւ Պաքուին: Ան անմիջապէս ներման եւ արտահերթ զինուորական կոչման արժանացաւ եւ անոր միանուագ աշխատավարձ վճարուեցաւ հունգարական բանտի մէջ անցուցած տարիներուն համար: Այսպիսով, հայ սպաննելը Ատրպէյճանի մէջ այսուհետեւ յանցագործութիւն չի համարուիր: Եւ ասիկա 21-րդ դարուն, ՄԱԿ-ի անվտանգութեան խորհուրդի անդամ պետութեան մէջ: Ատրպէյճանը կը շարունակէ ռազմատենչ քաղաքականութիւնը: ԱՆ կը բորբոքէ սպառազինութեան տարածաշրջանային մրցավազք եւ կը քարոզէ թշնամութիւն: Ատրպէյճանի նախագահը բացայայտօրէն կը յայտարարէ, որ ամբողջ աշխարհի հայերը Ատրպէյճանի թշնամիներն են, իսկ Երեւանը, որ շուտով պիտի նշէ իր 2800-ամեակը, հին ատրպէյճանական հող է: Ան կը յայտարարէ, որ զինադադարի խախտումը վարքագծի կանոն է, քանի որ պատերազմը դեռ չէ աւարտած` մոռնալով, թէ ով խնդրած է եւ առաջինը ստորագրած այդ զինադադարը»,- իր ելոյթին մէջ ըսած է ՀՀ նախագահը:

Նախագահ Սերժ Սարգսեան անդրադարձած է նաեւ ՀԱՊԿ ծիրէն ներս անդամ պետութիւններու արմատական շահերու վերաբերեալ արտաքին քաղաքականութեան հարցերու մէջ մօտեցումներու համադրման, այդ հարցերու շուրջ միմեանց հետ խորհրդակցութիւններու իրականացման, ընդհանուր դիրքորոշումներու մշակման ուղղութեամբ ջանքերու ներդրման կարեւորութեան: «Կազմակերպութեան արդիւնաւէտ եւ լիարժէք գործելու համար մենք պէտք է պահպանենք հիմնարար սկզբունքները, որոնք դրուած են Մինսքի մեր իսկ յայտարարութեան մէջ, ըստ որուն ՀԱՊԿ ծիրէն ներս ռազմաքաղաքական յարաբերութիւնները կը կրեն առաջնային բնոյթ` այն երկիրներու հետ շփումներու համեմատ, որոնք Պայմանագրի մէջ չեն մտներ»,- ՀԱՊԿ անդամ պետութիւններու ղեկավարներու ընդլայնուած կազմով բանակցութիւններու ժամանակ ըսած է ՀՀ նախագահը:

Ելոյթի աւարտին Սերժ Սարգսեան շնորհակալութիւն յայտնած է Նիքոլա Պորտիւժային` Կազմակերպութեան գլխաւոր քարտուղարի պաշտօնին վրայ արդիւնաւէտ աշխատանքի համար, նշելով, որ ՀԱՊԿ-ի զարգացման եւ քարտուղարութեան գործունէութեան կատարելագործման ուղղութեամբ անոր հետեւողական ջանքերը տեսանելի են բոլորին եւ որոնք, անշուշտ, տուած են իրենց պտուղները: Սերժ Սարգսեան յայտարարած է, որ Հայաստանը պաշտպանած է ՀԱՊԿ գլխաւոր քարտուղարի պաշտօնին Նիքոլա Պորտիւժայի լիազօրութիւններու երկարացման մասին ռուսական կողմի առաջարկը: Ռուսաստանի Դաշնութիւն աշխատանքային այցի ծիրէն ներս նախագահ Սերժ Սարգսեան այսօր երեկոյեան հանդիպում ունեցաւ Ռուսիոյ նախագահ Վլատիմիր Փութինի հետ:

 

LEAVE A REPLY

Please enter your comment!
Please enter your name here