Սուրիոյ Մէջ Լուսարձակները Կը Կեդրոնանան Պաղեստինեան Գաղթակայաններուն Վրայ

0
138

 Մինչ ռուսական աղբիւրներ կը հաղորդէին, թէ ռուսական մարտանաւեր ղրկուած են Սուրիա՝ հեռանալ փափաքող ռուս քաղաքացիներուն օգնելու նպատակով, ընդդիմութեան աղբիւրները հաղորդեցին, թէ կրցած են մուտք գործել  Դամասկոսի մօտ գտնուող պաղեստինեան Եարմուք գաղթակայանէն ներս:
Պաղեստինեան «Ֆաթհ» շարժումի Յեղափոխական խորհուրդի անդամ Սամիր Ռիֆաայի, Սուրիոյ մէջ բոլոր կողմերուն, ներառեալ՝ վարչակարգին, կոչ ուղղեց պաղեստինեան գաղթակայանները չներքաշել  ներքին ճակատամարտին մէջ: Ան ըսաւ. «Պէտք է մայրաքաղաք Դամասկոսի մէջ գտնուող Եարմուք գաղթակայանը, ուր սուրիական կանոնաւոր ուժերը գործեցին ջարդ մը, որուն զոհ գացին տասնեակներով պաղեստինցիներ, ինչպէս նաեւ բոլոր գաղթակայանները հեռու պահել տեղի ունեցող զինեալ բախումներէն»՝ նշելով, որ  արդէն իսկ գաղթակայանէն ներս  զոհուած  է շուրջ 30 պաղեստինցի:
Պաղեստինի Ազատագրութեան Ժողովրդային ճակատի բանբեր Հուսամ Արաֆաթ, իր կարգին յայտնեց, որ Սուրիոյ նախագահ Պաշշար Ասատ պէտք է նշեալ ոճիրին շուրջ մանրամասն բացատրութիւններ տայ, մեղսակիցները հաշուետուութեան կանչէ եւ հրապարակաւ ներում հայցէ անոր համար:
Սակայն, նոյն ճակատի ընդհանուր հրամանատարութիւնը աւելի ուշ յայտարարեց, որ կարգ մը լրատուամիջոցներու կողմէ շրջանառութեան մէջ դրուած լուրերը, ճակատի տեսակէտն ու կեցուածքը չեն արտայայտեր:
Արաբական Լիկայի ընդհանուր քարտուղար Նեպիլ Արապի եւս տագնապին առնչակից բոլոր կողմերուն կոչ ուղղեց՝ պաղեստինցի գաղթականներու ապահովութիւնը երաշխաւորելու:
Թրքական «Ռատիքալ» թերթը կը հաղորդէ, որ Թուրքիա վերջերս Սուրիոյ մէջ իշխանութեան փոփոխութեան նոր ծրագիր մը ներկայացուցած է Ռուսիոյ, ըստ որուն՝ Սուրիոյ նախագահ Ասատ 2013-ի առաջին երեք ամսուան ընթացքին պիտի հեռանայ իշխանութենէն, իսկ իշխանութիւնը փոխանցման հանգրուանի մը համար պիտի յանձնուի ընդդիմադիր ազգային համաձայնական մարմինին: Թերթը կ՛աւելցնէ, թէ ծրագիրը վերջերս սկսած է քննարկումի առարկայ դառնալ Ուաշինկթընի, Մոսկուայի, Գահիրէի, Տոհայի եւ ՄԱԿ-ի միջեւ:
Միւս կողմէ, իրանեան լրատուամիջոցներ հաղորդեցին, որ Թեհրան Սուրիոյ տագնապէն դուրս գալու ծրագիրի մը մանրամասնութիւնները ներկայացուցած է ՄԱԿ-ին:
Ծրագիրը կոչ կ՛ընէ բռնարարքները անմիջապէս դադրեցնելու՝ ՄԱԿ-ի հսկողութեամբ, նաեւ Սուրիոյ ժողովուրդին սննդեղէն տրամադրելու եւ փոխանցման կառավարութեան կազմութեան նպատակով երկխօսութիւն կատարելու: Այդ կառավարութիւնը  պիտի ստանձնէ խորհրդարանական, հիմնադիր մարմինի եւ նախագահական ազատ ընտրութիւններ կազմակերպելու պարտականութիւնը:

 

LEAVE A REPLY

Please enter your comment!
Please enter your name here