«Այլ Կերպ Չի Կրնար Ըլլալ. Սուրիահայերուն Աջակցութիւն Ցուցաբերելը Հայաստանի Իշխանութիւններու Պարտականութիւնն է». Սերժ Սարգսեան

0
137

  Նախագահ Սերժ Սարգսեան այսօր ընդունած է Հայաստան տեղափոխուած տարբեր ոլորտներ ներկայացնող սուրիահայ շարք մը գործարարներ: Հանդիպման ընթացքին մասնակցած են նաեւ ՀՀ վարչապետ Տիգրան Սարգսեանը, Սփիւռքի եւ Տնտեսութեան նախարարները, ԿԱ պետական եկամուտներու կոմիտէի նախագահը, պետական մարմիններու այլ պատասխանատուներ:

Հանդիպման սկիզբը նախագահը նշած է, որ տեղեակ է մինչ այժմ Հայաստանի տարբեր պետական հաստատութիւններու մէջ սուրիահայ գործարարներու ունեցած հանդիպումներու մասին, այդուհանդերձ, նպատակայարմար գտած է անձամբ հանդիպիլ անոնց եւ անմիջականօրէն ու եւս մէկ անգամ ներկայացնելու տարբեր առիթներով հնչեցուցած մեր երկրի մօտեցումները Սուրիոյ մէջ ստեղծուած իրավիճակին, սուրիահայ մեր հայրենակիցներուն աջակցութեան վերաբերեալ, նաեւ գործարարներէն լսելու իրենց ծրագիրներու, առաջարկներու, մտահոգող խնդիրներու մասին, պատասխանել անոնց հետաքրքրող հարցերուն:

Գործարարները ՀՀ նախագահէն հետաքրքրուած են Սուրիայէն իրենց գործարարութիւնները Հայաստան տեղափոխելու կամ Հայրենիքի մէջ նոր գործ սկսելու հնարաւորութիւններու, Հայաստանի տնտեսական վիճակի, ներդրումային միջավայրի եւ առկայ խնդիրներու վերաբերեալ: Գործարարներու կողմէ բարձրացուած շարք մը հարցերու լուծման վերաբերեալ Հանրապետութեան նախագահը յանձնարարականներ տուած է  համապատասխան պետական մարմիններուն եւ պատրաստակամութիւն յայտնած այսուհետեւ եւս անոնց աջակցութեան ուղղուած իւրաքանչիւր առաջարկ քննարկելուն:

Հանդիպման աւարտին Սերժ Սարգսեան յորդորած է սուրիացի մեր հայրենակիցներուն` շնորհակալութիւն չյայտնել ցուցաբերուող աջակցութեան եւ հոգածութեան համար, քանի որ ատիկա Հայաստանի իշխանութիւններուն պարտականութիւնն է: «Հայաստանում ինչպիսի իշխանութիւններ էլ լինեն, բոլորն էլ այս խնդիրներին հոգատարութեամբ կը վերաբերեն: Այստեղ որեւէ կասկած չկայ: Այլ կերպ լինել չի կարող, ուղղակի չի՛ կարող: Դա Հայաստանի իշխանութիւնների պարտականութիւնն է, եւ որքան լաւ կատարենք մեր պարտքը, մեր պարտականութիւնը, այնքան բոլորիս համար էլ լաւ կը լինի: Մի համարէք, որ ձեզ լաւութիւն են անում: Գոնէ, նուազագոյնը բոլորը պարտաւոր են անել: Ես չեմ պատկերացնում, որ Հայաստանում երբեւէ կարող են իշխանութիւններ լինել, որ այդ նուազագոյնն էլ չանեն»,- ըսած է նախագահ Սերժ Սարգսեան եւ կոչ ուղղած չյուսահատելու եւ փորձելու միասին դիմակայել այդ փորձութիւնն ու դժուարութիւնները, որոնց մէջէն կ’անցնին Սուրիոյ մեր հայրենակիցները: «Մենք այդպիսի ճանապարհով վերջին 20-25 տարիների ընթացքում անցել ենք, անցել ենք շատ աւելի ցաւոտ ճանապարհներով: Ամէն ինչ լաւ է լինելու: Եւ իւրաքանչիւրը, ով կը մնայ կամ չի մնայ Հայաստանում, միեւնոյն է, որքան հնարաւորութիւն ունենք, օգնելու, օժանդակելու ենք»,- ըսած է ՀՀ նախագահը:

Հանրապետութեան ղեկավարը սուրիացի մեր բոլոր հայրենակիցներուն մաղթած է համբերութիւն եւ կամք` բերելով նաեւ սեփական փորձն ու արցախեան ազատամարտի դժուարութիւններով անցած իր եւ շատ այլ ընտանիքներու օրինակը: «Այս փորձութիւնն էլ է անցնելու, պէտք է կարողանալ մեր ժողովրդին իւրայատուկ կամք ցուցադրել եւ ցուցաբերել, իսկ մենք` ձեզ բոլորիդ օգնական»,- ըսած է նախագահ Սերժ Սարգսեան:

 

 

LEAVE A REPLY

Please enter your comment!
Please enter your name here