Հայաստան Ապաստանած Սուրիահայ Ընտանիքները Պիտի Ապահովուին Սնունդով Եւ Տան Վարձով

0
147

  Հայաստանի մէջ ապաստան գտած սուրիահայերուն աջակցութեան տարբեր ծրագիրներով  պիտի տրամադրուի սնունդ, առաջին  անհրաժեշտութեան առողջաբանութեան պարագաներ եւ տան վարձք: 

«Արմենփրէս»-ին յայտնած է ՀՀ սփիւռքի նախարարութեան աշխատակազմի ղեկավար, սուրիահայերու հարցերով զբաղող աշխատանքային խումբի ղեկավար Ֆիրտուս Զաքարեան: Ան նշած է, որ Քուէյթի Հանրապետութեան կողմէ սուրիահայերուն խոստացուած աջակցութեան ուղղութիւնները չեն ճշդուած տակաւին, սակայն հնարաւոր է, որ  տրամադրուի տան վարձերուն: Զաքարեանի խօսքով` երկու հարիւր կարիքաւոր ընտանիքներու ցուցակ մը արդէն կազմուած է, յաջորդ ցուցակին մէջ կ’ընդգրկուին այլ ընտանիքներ: Սփիւռքի նախարարութեան ներկայացուցիչին խօսքով`  խիստ կարիքաւոր  կացութեան մէջ  կը գտնուին մօտ չորս հարիւր ընտանիքներ:

ՀՀ սփիւռքի նախարար Հրանոյշ Յակոբեանի հետ Նոյեմբեր 29-ին կայացած հանդիպման ընթացքին Հայաստանի մօտ Քուէյթի արտակարգ եւ լիազօր դեսպան Պասսամ Մուհամմէտ Քապանդի նախարարին տեղեկացուցած էր, որ իր` Քուէյթ կատարած այցի ընթացքին պայմանաւորուածութիւն ձեռք բերուած է Հայաստանի մէջ գտնուող սուրիահայերուն 100.000 տոլարի սահմաններու մէջ աջակցութիւն ցուցաբերելու վերաբերեալ:

Մայր աթոռ Սուրբ Էջմիածինի մէջ գործող Հայաստանեան Կլոր սեղան միջեկեղեցական բարեգործական հիմնադրամի նախաձեռնած արագ արձագանգման ծրագրի պատասխանատու Ալլա Սարգիսովա նշած է, որ իրենց նախաձեռնած չորսշաբաթեայ ծրագրին նախապէս ընդգրկած էին հարիւր սուրիահայ ընտանիքներ, սակայն հիմա կ’աշխատին երկու հարիւրի հետ:

Ծրագիրը, որ նախաձեռնած է հիմնադրամը`Ն.Ս.Օ.Տ.Տ. Գարեգին Ա. Ամենայն Հայոց Կաթողիկոսի օրհնութեամբ եւ «Եկեղեցիներու համատեղ գործողութիւն» կազմակերպութեան  ֆինանսաւորմամբ,  կ’իրականացուի Արարատեան Հայրապետական թեմի հետ համագործակցաբար: Նախաձեռնութեան իր զօրակցութիւնը կը բերէ նաեւ «Երեւան Սիթի» խանութներու ցանցը: Շահառու ընտանիքներուն կը տրուին յատուկ տոմսեր, որոնցմով հնարաւոր է որոշակի պարբերականութեամբ անհրաժեշտ գնումներ կատարել «Երեւան Սիթի» խանութներէն: Սարգիսովա նշած է, որ տոմսերէն իւրաքանչիւրով քսան հազարական դրամի օգնութիւն պիտի ըլլայ, ընդհանուր առմամբ` ութսուն հազար դրամ: «Տրամադրուող գումարն այնքան էլ մեծ չէ, մենք դա հասկանում ենք, փորձում ենք շարունակել այս ծրագիրը: Ընտանիքների քանակը շատցել է: Երկու շաբաթում արդէն 350 ընտանիք է արձանագրուել, մարզերից եւս դիմում են»,- ըսած է ան: Սարգիսովա տեղեկացուցած է, որ իրենք նաեւ տնայցեր կը  կատարեն եւ հոգեւոր աջակցութիւն կը ցուցաբերեն, որոնք բաւական կը թեթեւցնեն  սուրիահայերու վիճակը:

 

LEAVE A REPLY

Please enter your comment!
Please enter your name here