«Արմենփրէս»ը 94 Տարեկան Է

0
224

«Արմենփրէս» լրատուական գործակալութիւնը 18 Դեկտեմբերին նշեց իր հիմնադրութեան 94-րդ տարեդարձը: 1918 թուականին Հայաստանի Ազգային Խորհուրդի ճիշդ այդ օրուան նիստի արձանագրութեան մէջ ազդարարուեցաւ Հայաստանի նորանկախ պետութեան համար մեծ իրադարձութիւն հանդիսացող Հայաստանի հեռագրական գործակալութեան ծնունդը:
«Հայհեռագործ-Արմենտա-Արմենփրէս»ը մնայուն կերպով արտայայտած է հասարակութեան ցաւերն ու մտահոգութիւնները. ան բաժնած է ժողովուրդին պայքարը, տագնապներն ու յաղթանակները։ 1959-ի Դեկտեմբերէն գործակալութիւնը ունեցած է նաեւ իր առանձին, մասնագիտական  լուսանկարչական ծառայութիւնը՝ «Ֆօտոխրոնիկա-ՀՀԳ» անունով, որ կարճ ժամանակի ընթացքին մեծ համբաւի տիրացաւ: Հետագային որոշուած է փոխել հնաբոյր Հայաստանի հեռագրական գործակալութիւն անունը, կայացած է մրցում մը եւ ընտրուած է «Արմենփրէս» անունը։
Հայաստանի կառավարութեան կողմէ 1998-ի Յունուար 22-ին հաստատուած է «Արմենփրէս»ի նոր կարգավիճակը՝ պետական բաժնետիրական ընկերութիւն, որուն բաժնետոմսերուն կը  տնօրինէ Հայաստանի պետութիւնը: Գործակալութեան ամէնօրեայ լրատուութիւնը կը կատարուի հայերէն, անգլերէն եւ ռուսերէն լեզուներով: Անիկա ունի հարուստ տեղեկատուական եւ լուսանկարչական արխիւ, որ կը ներկայացնէ Հայաստանի եւ տարածաշրջանի իւրայատուկ պատմութիւնը։
«Արմենփրէս»ը ունի բազմաթիւ բաժանորդներ Հայաստանի մէջ եւ անկէ դուրս. զանգուածային լրատուական միջոցներէն զատ անկէ կ՛օգտուին դեսպանատուներ, միջազգային կազմակերպութիւններ, դրամատուներ, տարբեր կառոյցներ, վերլուծական կեդրոններ, հիմնարկներ։ Անիկա կը գործակցի նշանաւոր լրատուամիջոցներու հետ, ինչպէս՝ «ԻԹԱՌ-ՏԱՍՍ», «Ռոյթըրզ», «Սինխուան», որոնց հետ կը փոխանակէ տեղեկութիւններ։

 

LEAVE A REPLY

Please enter your comment!
Please enter your name here