Եարմուք Գաղթակայանէն Սուրիական Ընդդիմութիւնը Հեռացնելու Ջանքեր

0
161

 Հինգշաբթի, Դեկտեմբեր 20ին, Եգիպտոսի մէջ պաղեստինեան շարք մը կուսակցութեանց ներկայացուցիչներու ժողով մը տեղի ունեցաւ, Դամասկոսի մօտերը գտնուող պաղեստինեան Եարմուք գաղթակայանէն ներս թափանցած ընդդիմութեան զինեալները այդտեղէն հեռացնելու հարցը քննելու համար:
Սուրիոյ մէջ պաղեստինեան «Ֆաթհ» կազմակերպութեան ներկայացուցիչը աւելի ուշ յայտարարեց, թէ ջանք կը թափուի 24 ժամուան ընթացքին զինեալները Եարմուք գաղթակայանէն հեռացնելու ուղղութեամբ:
Պաղեստինի ազատագրութեան կազմակերպութեան (ՊԱԿ) ընդհանուր քարտուղար Եասեր Ապտ Ռապպօ յայտնեց, որ կազմակերպութիւնը Սուրիոյ մէջ պաղեստինեան գաղթակայաններու ողբերգական կացութեանց հարցով կապ կը հաստատէ աշխարհի բոլոր կողմերուն հետ՝ պահանջելով դադրեցնել պաղեստինցիներուն դէմ բռնարարքները:
Իր կարգին, Սուրիոյ իշխանութիւնները դատապարտեցին գաղթակայանին հարցով ապատեղեկատուութիւնը՝ անոր պատասխանատու համարելով «արտաքին ուժեր», որոնք հրահրած են ընդդիմութեան զինեալները, որպէսզի յարձակին գաղթակայանին վրայ:
Ըստ կարգ մը աղբիւրներու՝ 150,000 բնակչութիւն ունեցող գաղթակայանէն մօտաւորապէս 100,000 գաղթականներ փախուստ տուած են դէպի Լիբանանի սահման, սակայն Հինգշաբթի օր տիրած համեմատաբար խաղաղ պայմաններուն շնորհիւ՝ հազարաւոր գաղթականներ վերադարձած են:
Պաղեստինեան իշխանութեան նախագահ Մահմուտ Ապպաս պահանջեց, որ Սուրիոյ պաղեստինցի գաղթականներուն արտօնուի պաղեստինեան հողամասեր մուտք գործել:
Միւս կողմէ, Ռուսիոյ նախագահ Վլատիմիր Փութին Հինգշաբթի օր տրուած մամլոյ ասուլիսի մը ընթացքին յայտարարեց, թէ Ռուսիա Սուրիոյ նախագահ Պաշշար Ասատի վարչակարգի ապագայէն աւելի՝ մտահոգ է Սուրիոյ եւ անոր ժողովուրդի ապագայով, դարձեալ շեշտելով, թէ Մոսկուա կը գիտակցի, որ փոփոխութիւններ պէտք է իրականացնել Սուրիոյ մէջ, սակայն տագնապը կարելի չէ զինուորական միջոցներով լուծել:

LEAVE A REPLY

Please enter your comment!
Please enter your name here