Մոսկուա Պատրաստ Է Սուրիոյ Ընդդիմութեան Հետ Գործակցելու, սակայն…

0
146

Ռուսական «Ռաշա Թուտէյ» պատկերասփիւռի կայանը հաղորդեց, որ Ռուսիոյ արտաքին գործոց նախարար Սերկէյ Լաւրով յայտարարած է, որ Մոսկուա պաշտօնապէս չի ճանչնար սուրիական ընդդիմադիր Ազգային համաձայնական մարմինը, «սակայն, պատրաստ է անոր հետ գործակցելու»՝ տագնապին խաղաղ լուծում մը գտնելու նպատակով:

Կ’արժէ նշել, որ արեւմտեան  լրատուական միջոցներ քարոզչական լայնածաւալ   արշաւ մը սկսած են Սուրիոյ դէմ: Հետեւաբար, Սուրիոյ մասին  հաղորդուած տեղեկութիւնները անհրաժեշտ է  քանի մը աղբիւրներէ ստուգել:
Ռուսիոյ արտաքին գործոց փոխնախարար Միխայիլ Պոկտանով, իր կարգին յայտարարեց, որ Ռուսիա կը զօրակցի Ժընեւի համաձայնութեան հիմամբ՝ «Սուրիոյ տագնապի քաղաքական անմիջական փոխզիջումային լուծման»:
Միւս կողմէ, սուրիական «Իխպարիա» պատկերասփիւռի կայանը հաղորդեց, որ Սուրիոյ արտաքին գործոց նախարարութիւնը ՄԱԿ-ի ընդհանուր քարտուղարին եւ Ապահովութեան խորհուրդին ուղղուած երկու նամակներով դատապարտած է պաղեստինցիներու Եարմուք գաղթակայանին մէջ տեղի ունեցածը, որուն պատասխանատու նկատած է ՄԱԿ-ը՝ կոչ ուղղելով անոր, որ «պահանջէ ահաբեկչական խմբաւորումներու աջակցած եւ Եարմուք գաղթակայանի գրաւումը քաջալերած պետութիւններէն՝ այդ կազմակերպութիւններուն հեռացումը այդտեղէն»:
Աւելի ուշ, Սուրիական ազատ բանակը յայտարարեց, թէ արդէն իսկ Եարմուքէն կը հեռանայ, եւ գաղթականներուն կոչ ուղղեց իրենց բնակարանները վերադառնալու: Ըստ «Ռաշա Թուտէյ»ի՝ կարգ մը զինեալ խմբաւորումներ սկսած են գաղթակայանէն հեռանալու:
Նաեւ, ՄԱԿ-ի ընդհանուր քարտուղարի խորհրդական Ատամա Տինկ զգուշացուց, որ Սուրիոյ փոքրամասնութիւնները կը գտնուին վրէժխնդրութեան վտանգին տակ:
Մինչ այդ, իսրայէլեան «Տեպքա» կայքը հաղորդեց, թէ Սուրիան Թուրքիոյ, Իսրայէլի եւ Յորդանանի հետ իր սահմաններուն վրայ ռուսական «Իսքանտար» հրթիռներ տեղակայած է, իսկ ՆԱԹՕ-ն դարձեալ յայտարարեց, թէ Սուրիա զինեալ ընդդիմութեան դէմ «Սքոտ» տիպի հրթիռներ արձակած է:
Վերջապէս, ՄԱԿ-ի Ապահովութեան Խորհուրդը պատժամիջոցներ հաստատեց իրանեան երկու ընկերութեանց դէմ, որովհետեւ անոնք զէնք մատակարարած են Սուրիոյ:

LEAVE A REPLY

Please enter your comment!
Please enter your name here