Ասատի Ճակատագիրը Պէտք է Որոշեն Սուրիացիները եւ Ոչ Թէ Օտար Պետութիւնները. Լաւրով

0
131

 Ռուսաստան մշտապէս «կը խանգարէ» ՄԱԿ-ի անվտանգութեան խորհուրդի որոշ անդամներու` Սուրիոյ դէմ բանաձեւ ընդունելու փորձերը:

Այս մասին, ըստ Armenpress.am-ի, Russia today-ին տուած հարցազրոյցին նշած է Ռուսաստանի արտաքին գործոց նախարար Սերկէյ Լաւրով: Միեւնոյն ժամանակ ան չէ բացառած, որ Սուրիոյ մէջ կրնայ կրկնուիլ իրաքեան եւ հարաւսլաւական սենարը` ընդգծելով, որ որոշ ուժեր կը փափաքին ներքին խնդիրըը վերածել միջազգային խնդիրի, իսկ ռազմական գործողութիւնները դուրս բերել Սուրիոյ սահմաններէն:

Անդրադառնալով ընդդիմութեան գործողութիւններուն` Լաւրով նշած է, որ ընդդիմադիրները կը կատարեն քայլեր, որոնք դէմ են միջազգային մարդասիրական օրէնքներուն. կ’առեւանգեն մարդիկ, ահաբեկչութիւն կ’իրականացնեն:

Այն հարցին, թէ հնարաւոր է սուրիական իշխանութիւնները քիմիական զէնք օգտագործեն, Լաւրով պատասխանած է, որ սուրիական կառավարութեան համար ատիկա հաւասար պիտի ըլլայ անձնասպանութեան:

«Ամէն անգամ մենք կը ստուգենք լուրերը այդ մասին եւ ամէն անգամ ամուր երաշխիք կը ստանանք, որ անոնք երբեք չեն օգագործեր քիմիական զէնք որեւէ պարագայի»,- յայտարարած է Լաւրով:

«Մեր խնդիրն է հասնիլ բռնութիւններու եւ արիւնահեղութեան դադրեցման, իսկ Ասատի ճակատագիրը պէտք է որոշեն սուրիացիները, այլ ոչ թէ օտար պետութիւնները եւ ոչ ալ սուրիական ընդդիմութեան առանձին խմբաւորումները: Ուստի Ռուսաստանը ուրիշներու խորհրդով չէ փորձած խորհուրդ տալ Ասատին ձգելու իշխանութիւնը»,- նշած է նախարարը:

Լաւրով նաեւ տեղեկացուցած է, որ սուրիական ընդդիմութեան ներկայացուցիչները մինչեւ տարեվերջ պիտի այցելեն Մոսկուա` երկխօսութեան նպատակով:

 

 

LEAVE A REPLY

Please enter your comment!
Please enter your name here