Ճոն Քերրի Թրքական Մամուլի Ուշադրութեան Կեդրոնը

0
137

  Ուաշինկթընի Մերձաւոր Արեւելքի համալսարանի Թուրքիոյ մասին ուսումնասիրութիւններու ծրագրի ղեկավար Սոներ Չաղափթայը եւ Լիհայի համալսարանի միջազգային յարաբերութիւններու բաժնի վարիչ, թրքագէտ Հենրի Պարքին թրքական «Անատոլու» գործակալութեան տուած են հարցազրոյց մը, որուն ընթացքին խօսած են ԱՄՆ  պետական քարտուղարի  պաշտօնին նշանակուած Ճոն Քերրիի մերձաւոր արեւելեան քաղաքականութեան մասին:

«Ճոն Քերրիի նշանակումը ԱՄՆ պետակն քարտուղարի  պաշտօնին վերին աստիճանի շահաւէտ է Թուրքիոյ համար»,- ըսած է Սոներ Չաղափթայ: Ան համոզուած է, որ թուրք-ամերիկեան յարաբերութիւններու զարգացման տեսանկիւնէ յառաջիկայ տարիները շատ աւելի արդիւնաւէտ պիտի ըլլան, քան Հիլարի Գլինթընի պաշտօնավարման շրջանն էր:

Եթէ արտաքին գործոց  նախարար դառնար Սիւզան Ռայսը, ապա ան առաջ պիտի քաշէր քրտական խնդիրը ու հայկական հարցը, եւ 2015-ի Հայոց ցեղասպանութեան 100-րդ տարելիցին հետ կապուած Թուրքիոյ եւ ԱՄՆ-ի միջեւ լարուածութիւն պիտի առաջանար: Ճոն Քերրիի պարագային այդ լարուածութիւնը բացառուած է, համոզուած է Չաղափթայը: Վերջինիս խօսքով` թէեւ Քերրին ծերակուտական է, որ ընտրուած է Մեսաչուսէցսէն, ուր ուժեղ է հայկական լոպպին, բայց ան անձամբ հայկական եւ յունական լոպպիներու հետ սերտ կապեր չունի:

Քերրին լաւ գիտէ Մերձաւոր Արեւելքը, ինչպէս նաեւ Թուրքիան: «Եթէ կ’ուզէք իմանալ, թէ ամերիկեան քաղաքական գործիչը ինչ վերաբերում ունի Թուրքիոյ նկատմամբ, նայեցէք, թէ քանի անգամ ան այցելած է Թուրքիա: Վերջին տասը տարիներու ընթացքին Ճոն Քերրին բազմիցս եղած է Թուրքիա, ինչ որ շատ կարեւոր է»,- ըսած է Սոներ Չաղափթայ:

Հենրի Պարքին, նոյնպէս խօսած է Ճոն Քերրիի նշանակման մասին: «Հիլարի Գլինթըն շատ ուժեղ ԱԳ նախարար էր, որուն ուժեղ կողմերը սակայն չօգտագործուեցան: Ճոն Քերրին Գլինթիընի նման ուժեղ եւ լաւ դիւանագէտ չէ, ուստի անոր նշանակումը իր թերութիւնները ունի»,- նշած է Պարքին: Պարքիի կարծիքով` միջինարեւելեան խնդիրներու մէջ ԱՄՆ նոր ԱԳ նախարարը փորձուած գործիչ չէ:  Քերրիի ԱԳ նախարարութեան տարիներուն Միացեալ Նահանգներու արտաքին քաղաքականութիւնը Միջին Արեւելքի եւ մասնաւորապէս Թուրքիոյ հարցով էական փոփոխութիւններ պիտի չկրեն: «Եթէ փոփոխութիւն ըլլայ, ապա ան կ’ընէ Օպաման»,- ըսած է Պարքին:

Ամերիկացի թրքագէտը անդրադարձած է նաեւ Հայոց ցեղասպանութեան ճանաչման վերաբերեալ Ճոն Քերրին  որդեգրելիք  դիրքորոշումին: Պարքի յիշեցուցած է` թէ՛ ԱՄՆ նախագահ Պարաք Օպաման, թէ՛ արդէն նախկին ԱԳ նախարար Հիլարի Գլինթըն Ճոն Քերրիի նման կը խոստանային ճանչնալ Հայոց ցեղասպանութիւնը, սակայն ընտրութիւններէն ետք դիրքորոշումը փոխուած է: Պարքին կը կարծէ, որ ԱՄՆ արտաքին գերատեսչութեան նոր ղեկավարը կ’աշխատի չբարձրաձայնել 1915 թուականի հարցը եւ այն չբերել թուրք-ամերիկեան յարաբերութիւններու օրակարգ:

Յատկանշական է, որ ԱՄՆ-ի հայկական կազմակերպութիւնները եւս իրենց գոհունակութիւնը յայտնած են Քերրիի`  պետական  քարտուղարի  պաշտօնին նշանակուելու առնչութեամբ:

 

LEAVE A REPLY

Please enter your comment!
Please enter your name here