Հալէպի Մէջ Առեւանգուած Երկու Հայեր Ազատ Արձակուած Են, Իսկ՝ Հայ Զինուորին Մահը Հաստատուած

0
113

  Հալէպի մէջ քանի մը օր առաջ առեւանգուած Շահէ Չաղլասեան ազատ արձակուած է: Այս մասին «արմէնփրես»-ին տեղեկացուցած է Բերիոյ թեմի ազգային առաջնորդարանի մամուլի քարտուղար Ժիրայր Ռէյիսեան` աւելցնելով, որ ան ազատ արձակուած է փրկագին վճարելէ ետք: Չաղլասեան Հալէպի ծայրամասը գտնուող Շքէյֆ շրջանին մէջ առեւանգուած էր իր ինքնաշարժով:

Ռէյիսեան նաեւ տեղեկացուց, որ Հալէպի մէջ առեւանգուած էր նաեւ հայ բժիշկ մը, որ փրկագին վճարելէ ետք նոյնպէս ազատ արձակուած է: Երկու հայ առեւանգուածները արդէն տուն վերադարձած են:

Մամուլի քարտուղարին խօսքով, վերջնականապէս հաստատուած է հայազգի զինուոր Յովակ Քորթմոսեանի մահը, որ 2012-ի ամրան Հալէպի մէջ սպաննուած զինծառայողներու շարքին էր: Ամրան Հալէպի մէջ գտնուող Հանանօ զօրանոցը մօտ մէկ շաբաթ զինեալներու հսկողութեան տակ յայտնուած է: Զինծառայող Քորթմոսեան զօրանոցի գրաւման ժամանակ արիւնալի բախումներու ընթացքին մահացու վնասուածք ստացած էր: Անոր ընկերները պատմած են, թէ տեսած են անոր նահատակութիւնը, սակայն ծնողները դիակը չյայտնաբերելով՝ յոյսով կարծած են, որ երիտասարդը կենդանի է: Պարզուած է, որ հայ երիտասարդին դիակը շատերու դիակներու նման օրեր շարունակ մնացած է արեւին տակ եւ դարձած անճանաչելի: Զօրանոցը կրկին կառավարական ուժերու հսկողութեան տակ յայտնուելէ ետք զոհուածներուն դիակները տեղափոխուած են դիահերձարան,  ուր պարզ դարձած է, որ մահացածներուն մէջ է նաեւ Յովակ Քորթմոսեան: Երկու օր առաջ նահատակ Յովակին մարմինը հողին յանձնուեցաւ իր ծննդավայր Քեսապի մէջ:

Իսկ Հալէպի մէջ տիրող ընդհանուր իրավիճակին մասին Ռէյիսեան տեղեկացուցած է, որ մեծ փոփոխութիւններ տեղի չեն ունեցած, ելեկտրականութիւնը կրկին ընդատումներով է: Թէեւ պետութիւնը կը փորձէ նորոգման աշխատանքներ իրականացնել, սակայն զինեալները մշատպէս կը խոչընդոտեն: Կրակոցներու, հրթիռներու ձայներ կը լսուին հեռուէն, իսկ կեդրոնական թաղամասերու մէջ իրավիճակը աւելի հանգիստ է:

LEAVE A REPLY

Please enter your comment!
Please enter your name here