Հռոմի Պապը Վառած է Խաղաղութեան Մոմը

0
98

Սուրբ Ծննդեան տօնի նախօրէին, որ աշխարհի կաթող իկները կը նշեն Դեկտեմբեր 25-ին, Հռոմի պապ Պենետիքթոս 16-րդ իր աշխատասենեակի պատուհանագոգին վառած է խաղաղութեան մոմը, որ կը խորհրդանշէ խաղաղութեան ձգտումը ամբողջ աշխարհի մէջ:

 Վատիկանի Սուրբ Պետրոսի հրապարակին վրայ հաւաքուած հաւատացեալները այս քայլը ողջունած են ծափահարութիւններով: Մինչ այդ հրապարակին վրայ կայացած է աւանդական presepe-ն` Յիսուս Քրիստոսի ծննդեան տեսարանը ներկայացնող մանրակերտի բացումը: Խաղաղութեան մոմը վառելու եւ presepe-ն տեղադրելու աւանդոյթը 1980-ականներու սկիզբը հիմնադրած է Հռոմի պապ Յովհաննէս Պօղոս 2-րդը:

Նշենք, որ ողջ աշխարհի կաթողիկները` աւելի քան մէկ միլիառ մարդ, Սուրբ Ծնունդը կը նշեն Դեկտեմբեր 25-ին, Հայաստանի մէջ կը նշուի Յունուար 6-ին, իսկ Ռուսաստան, Վրաստան, Սերպիա եւ Երուսաղէմ` Յունուար 7-ին: 

Մինչեւ 4-րդ դար բոլոր քրիստոնեաները Ս. Ծնունդը նշած են Յունուար 6-ին: Սակայն անգամ քրիստոնէութեան ընդունումէն ետք հռոմէացիները կը շարունակէին հեթանոսական տօներ նշել: Դեկտեմբեր 25-ին մեծ շուքով կը նշուէր արեւի պաշտամունքին նուիրուած տօնը: Հեթանոսական աւանդոյթները խափանելու համար 336-ի Հռոմի եկեղեցին Դեկտեմբեր 25-ը պաշտօնապէս հռչակեց Յիսուս Քրիստոսի ծննդեան օր: Յետագային Ասորիքի եւ գրեթէ ողջ արեւելքի մէջ Քրիստոսի Ծննդեան տօնի օրը փոխադրուեցաւ Դեկտեմբեր 25-ին, իսկ Յունուար 6-ը մնաց իբրեւ Տիրոջ Աստուածյայտնութեան, Մկրտութեան օր: Հնագոյն աւանդութեան եւ աւետարանական հաշուարկներուն հաւատարիմ մնացած է միայն Հայ Առաքելական Ս. Եկեղեցին` Յունուար 6-ին միասնաբար նշելով Քրիստոսի Ծննդեան եւ Աստուածյայտնութեան տօները:

 

LEAVE A REPLY

Please enter your comment!
Please enter your name here