Սերժ Սարգսեան Նախագահի Նստավայրին Մէջ Ընդունելութեան Հրաւիրեց Լրատուամիջոցներու Ներկայացուցիչները

0
122

  Ամանորի եւ Սուրբ Ծննդեան տօներուն առթիւ նախագահ Սերժ Սարգսեան Դեկտեմբեր 25-ին Նախագահի նստավայրին մէջ ընդունելութեան հրաւիրած է զանգուածային լրատուութեան միջոցներու ներկայացուցիչները: Այս մասին կը տեղեկացնէ ՀՀ Նախագահի մամուլի գրասենեակը:

Սերժ Սարգսեան շնորհաւորած է լրագրողները գալիք տօներուն առթիւ, մաղթած է առողջութիւն, յաջողութիւններ եւ նաեւ, որ 2013 թուականին անոնց բարդ, բայց նաեւ հետաքրքրական եւ ստեղծագործական աշխատանքը ծառայէ մեր ժողովուրդին եւ հասարակութեան յառաջընթացին:

Նախագահ Սերժ Սարգսեան լրատուամիջոցներու ներկայացուցիչներուն ուղղուած իր շնորհաւորական խօսքին մէջ մասնաւորապէս ըսած է.

«Յարգելիբ լրագրողներ եւ լրատուամիջոցներու ներկայացուցիչներ,

«Անցնող տարուան մէջ մենք ձեզի հետ միասին շարունակեցինք մեր ջանքերը երկրին մէջ խօսքի ազատութեան ու ժողովրդավարութեան ամրապնդման ուղղութեամբ: Ես շնորհակալութիւն կը յայտնեմ ձեզի ամբողջ տարուան ընթացքին եւ յատկապէս խորհրդարանական ընտրութիւններու ժամանակ ձեր որակեալ աշխատանքին համար: Ես չեմ յիշեր անկախ Հայաստանի պատմութեան մէջ որեւէ ընտրութիւն, երբ մասնակիցներու համար լրատուութեան այդչափ հասանելիութիւն եղած ըլլար, ինչպէս նախորդ խորհրդարանական ընտրութիւններուն ժամանակ: Ինչպէս նաեւ մեր լրագրողներէն շատեր արդէն լրջօրէն կը տիրապետեն քաղաքական գործընթացները լուսաբանելու ընթացքին սեփական դիրքորոշումները մէկ կողմ դնելու կարողութիւններուն: Ասիկա արդէն արհեստավարժութիւն է, որ իրօք նկատելի է: Այն, ինչի մասին մենք միասին հասած ենք, եւ ինչ որ այդպէս տեսանելիօրէն դրսեւորուեցաւ նախորդ ընտրութիւններուն ժամանակ, իրօք, լուրջ ձեռբերում է, որմէ յետընթաց մենք ուղղակի իրաւունք չունինք թոյլ տալու: Ճիշտ հակառակը` պիտի շարունակենք առաջ երթալ:

«Անշուշտ, շատերու համար եղածը դեռ տեսանելի չէ, իսկ ուրիշներ ալ պարզապէս չեն ցանկար տեսնել: Բայց ասիկա գործընթաց է, որ մենք ձեզի հետ միասին անշեղօրէն պիտի շարունակենք: Կ’երթանք եւ պիտի երթանք Հայաստանի համար միակ ընդունելի ճանապարհով:

«Ի հարկէ խնդիրներ դեռ շատ կան, բայց կան մեր նպատակներուն հասնելու երկու ամենակարեւոր գործօնները` հասարակական պահանջքը` մէկ կողմէ եւ իշխանութիւններու քաղաքական կամքը` միւս կողմէ: Այսպիսով, մենք դաշնակիցներ ենք եւ միասին պիեի իրականացնենք առաքելութիւն, որուն արդիւնքներով պայմանաւորուած է ոչ միայն մեր երկրին ներկան, այլեւ` տեսանելի ապագան:

«Մենք կ’ապրինք այնպիսի ժամանակաշրջան մը, երբ արագօրէն կը զարգանան տեղեկատուութեան նոր միջոցները, ընկերային ցանցերը, որոնք կը սկսին մրցիլ աւանդական մամուլի եւ հեռուստատեսութեան հետ: Միաժամանակ, բոլորը կը գործեն կողք-կողքի: Աւելի կամ նուազ չափով` բոլորն ալ ընելիք եւ ըսելիք ունին: Մեր պարտքն է աջակցիլ բոլորին:

«Պետական կառոյցներու հասարակական հսկողութիւնը, անոնց գործունէութեան թափանցիկութեան ապահովումը կախուած է նաեւ լրատուամիջոցներու արդիւնաւէտութեան աստիճանէն: Այդ աստիճանի բարձրացումը միայն մեր կամքով կամ միայն ձեր լաւ աշխատանքով չ’ըլլար: Կ’ըլլայ մեր եւ ձեր ջանքերու համադրումով:

«Նոր` 2013 թուականը շատ հարցերու համար վճռորոշ պիտի ըլլայ մեր հասարակութեան համար: Այն, ինչ լուսաբանելու տեսանկիւնէ ձեռք բերած ենք նախորդ ընտրութիւններուն, փետրուարեան ընտրութիւններու համար պէտք է համարել սոսկ նուազագոյն շեմ: Աւելին պէտք է ընենք: Ու խօսքը միայն ընտրութիւններուն չի վերաբերիր: Միասին մենք ժամանակակից պետութիւն եւ ժամանակակից հասարակութիւն կառուցելու ճանապարհով պիտի երթանք: Եւ այստեղ մեծ է լրագրողներու դերը: Աւելին` մեծ է պատասխանատուութիւնը բոլոր անոնց, որոնք գրեթէ ամէն օր կը շփուին մարդոց հետ, որոնք գրեթէ ամէն օր խօսք կ’ըսեն մարդոց: Իմ կոչս եւ յորդորս է` չաժանացնել այդ խօսքը, չմոռնալ, որ մենք լուրջ նպատակներ եւ յաւակնութիւններ ունինք, եւ նպատակներու ու յաւակնութիւններու արտայայտիչներ էք նաեւ դուք, սիրելի՛ լրագրողներ»:

 

LEAVE A REPLY

Please enter your comment!
Please enter your name here