«Ս. ՍՏԵՓԱՆՈՍԻ ՏՕՆԸ ՅԻՇԵՑՈՒՄ ՄԸՆ է ԵԿԵՂԵՑՒՈՅ` ԾԱՌԱՅՈՒԹԻՒՆԸ ՆԿԱՏԵԼՈՒ ԻՐ ԿԵԱՆՔԻՆ ԱՌԱՆՑՔԸ» .Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ

0
161

Ս. ՍՏԵՓԱՆՈՍԻ  ՏՕՆԸ  ԱՆԹԻԼԻԱՍԻ   ՄԱՅՐԱՎԱՆՔԻՆ   ՄԷՋ

 «Այս հաստատումով Վեհափառ Հայրապետը Վեհարանին մէջ իր պարգամը ուղղեց Դպրեվանքի սաներուն, միաբանութեան ու հաւատացեալներուն: «Ընդհանրապէս Ս. Ստեփանոսի տօնը նկատուած է սարկաւագներու տօնը: Սակայն չմոռնանք որ սարկաւագութիւնը հոմանիշ ըլլալով ծառայութեան, եկեղեցին ինք ծառայ է. ծառայ` ժողովուրդին: Եկեղեցւոյ հիմնադիրը, Քրիստոս իր անձը ու գործը բնութագրեց, որպէս ծառայութիւն: Ան ըսաւ, որ աշխարհ եկած էր ծառայելու եւ ոչ թէ ծառայութիւն ստանալու համար: Այ՛ս ինքնագիտակցութեամբ ու յանձնառութեամբ Աստուծոյ Որդին ծառայեց: Ծառայեց անխտիր բոլորին` հիւանդին ու աղքատին, զրկեալին ու հալածուածին: : Այսպէ՛ս եղաւ ծառայութիւնը Քրիստոսին, ծառայութիւն մը, որ զինք առաջնորդեց մինչեւ խաչ»:

Ապա Վեհափառ Հայրապետը ըսաւ. «ուրիշ բան չի կրնար ըլլալ կեանքին առանցքը ու առաքելութեան նպատակը Քրիստոսի խորհրդական մարմնոյն` եկեղեցւոյ: Եկեղեցին սոսկ քար ու ծէս չէ, սաղմոս ու շարական չէ. այդ բոլորէն առաջ ու վեր եկեղեցին ծառայութի՛ւն է. այլապէս չի՛ կրնար ըլլալ Քրիստոսի եկեղեցին: Ան աշխարհ ղրկուած է ծառայելու համար միայն»: Խօսելով յատկապէս հայ եկեղեցւոյ մասին, Վեհափառ Հայրապետը ըսաւ. «ես ճանչցած եմ աշխարհի գրեթէ բոլոր եկեղեցիները: Մեր եկեղեցին կը զանազանուի միւս եկեղեցիներէն յատկապէս իր ժողովրդանուէր ծառայութեամբ: Երբ կ՛ըսենք եկեղեցին ժողովուրդն է, մեր պարագային սա սոսկ աստուածաբանական հաստատում մը չէ, այլ` գոյութենական իրականութիւն է եղած ողջ պատմութեան ընթացքին: Մեր եկեղեցին ծառայութեան ճամբով ինքզինք նոյնացուցած է մեր ժողովուրդին հետ: Հետեւաբար, հեռացած կ՛ըլլանք մեր եկեղեցւոյ հարազատ նկարագրէն ու կոչումէն, երբ եկեղեցին վերածենք ինքնակեդրոն ու ինքնանպատակ գոյութեան մը մեր կեանքի լուսանցքին վրայ: Մեր եկեղեցին կոչուած է մեր կեանքի մայր էջին վրայ ծառայութեամբ, կը շեշտեմ` ծառայութեա՛մբ միայն ինքզինք իրագործելու: Ծառայութիւնն է մեր եկեղեցւոյ ինքնութեան, վաւերականութեան ու հզօրութեան աղբիւրը»: Իր խօսքը յատկապէս ուղղելով միաբան հայրերուն ու Դպրեվանքի սաներուն, Վեհափառ Հայրապետը ըսաւ. «Ս. Ստեփանոսի տօնը յիշեցում մըն է մեր եկեղեցւոյ` ծառայութիւնը նկատելու իր կեանքին առանցքը: Ան նաեւ յիշեցում մըն է հայ հոգեւորականին` մեր եկեղեցին որպէս ծառայութիւն տանելու ժողովուրդին»:

Վեհափառ Հայրապետին պատգամէն առաջ, Դպրեվանքի սաները յայտագիր մը ներկայացուցին: Յայտագրին մաս կը կազմէին դասախօսութիւն Ս. Ստեփանոսի կեանքը ու կոչումը նկարագրող, Ս. Ստեփանոսին նուիրուած շարական ու Աստուածաշնչական ընթերցում:

Նոյն օրը, Անթիլիասի Մայր Տաճարին մէջ տեղի ունեցաւ սուրբ եւ անմահ պատարագ: Պատարագիչն էր Քուէյթի եւ Ծոցի Երկիրներու  Կաթողիկոսական Փոխանորդ Գերշ. Տ. Շահէ Եպս. Փանոսեան: Իր քարոզին մէջ Սրբազանը անդրադարձաւ Ս. Ստեփանոսի ամուր հաւատքին ու այդ հաւատքին ծառայութեան ճամբով գործնական արտայայտութեան: Ան հրաւիրեց Դպրեվանքի սարկաւագները Ս. Ստեփանոսի ոգիով կազմաւորուելու Դպրեվանքի նուիրական յարկին տակ, որպէսզի նոյն այդ կոչումին գիտակցութեամբ ծառայեն մեր ժողովուրդին:

 

ՎԵՀԱՓԱՌ ՀԱՅՐԱՊԵՏԸ ԹՌՉՆՈՑ ԲՈՅՆԻ ՄԷՋ

 

ԱՆԹԻԼԻԱՍ – Նոր Տարուան առիթով, Ն.Ս.Օ.Տ.Տ. Արամ Ա. Կաթողիկոս միաբան հայրերու ընկերացութեամբ այցելեց Թռչնոց Բոյն: Վեհափառը այս առիթով նուէրներ տարած էր Թռչնոց Բոյնի աշակերտներուն: Շուրջ ժամ մը ան եղաւ աշակերտութեան հետ, լսեց անոնց երգերն ու արտասանութիւնները, ապա իր հայրական խօսքը ուղղեց անոնց:

Թռչնոց Բոյնը սփիւռքի միակ ազգային որբանոցն է, որ միշտ եղած է ու կը շարունակէ մնալ տունը մեր ազգի որբերուն, անօգնական ու աղքատ ընտանիքներու զաւակներուն: Մեծի Տանն Կիլիկիոյ Կաթողիկոսութիւնը կը շարունակէ յատուկ հոգածութիւն ցուցաբերել այս կարեւոր հաստատութեան նկատմամբ:

 

 

LEAVE A REPLY

Please enter your comment!
Please enter your name here