2012-ին ՀՀ Երկքաղաքացի Դարձած է 15.000 Մարդ

0
150

ՀՀ սփիւռքի նախարար Հրանոյշ Յակոբեան Դեկտեմբեր 26-ին հանդիպած է Խաչատուր Աբովեանի անուան պետական մանկավարժական համալսարանի դասախօսական կազմին հետ եւ հանդէս եկած դասախօսութեամբ: Այս մասին կը հաղորդեն ՀՀ սփիւռքի նախարարութենէն: Հանուշ Յակոբեան մասնաւորապէս նշած է, որ Հայաստանի անկախացումէն ի վեր նշուած է Սփիւռքի հարցերով զբաղող գերատեսչութիւն ունենալու անհրաժեշտութեան մասին:

“Չնայած անցած կարճ ուղուն` գերատեսչութեանը յաջողուել է նաեւ ներմուծել երկքաղաքացիութեան ինստիտուտը: Միայն 2012-ին ՀՀ երկքաղաքացի է դարձել շուրջ 15 հազար մարդ”,- ըսած է Հրանոյշ Յակոբեան:

Խօսելով “Արի Տուն” ծրագիրին մասին` նախարարը նշած է, որ ծրագիրին ծիրէն ներս անցած չորս տարիներուն ընթացքին Հայրենիք այցելած է մօտ 3000 պատանի, որ կը նշանակէ, թէ անոնք Հայաստանի մէջ հիւրընկալուած են մօտ 3000 հիւրընկալ ընտանիքի մօտ, որոնց հետ անոնք բարեկամացած են, հայ ընտանիքներու մէջ ապրած, այցելած տեսարժան վայրեր:

Գերատեսչութեան ղեկավարը կարեւոր համարած է հայ կրթօճախներու համար մանկավարժներ կրթելու եւ պատրաստելու համալսարանի գլխաւոր առաքելութիւնը:
Նախարարը բարձր գնահատած է համալսարանի կազմին մէջ գործող “Սփիւռք” գիտաուսումնական կեդրոնի երկարամեայ գործունէութիւնը, որուն իբրեւ արդիւնք Սփիւռքէն ժամանող մանկավարժները կը վերապատրաստուին Հայրենիքի մէջ:
Առաջնահերթ է ԱՊՀ տարածաշրջանի շարք մը երկիրներու մէջ հայկական դպրոցներու բացումը` ռուսերէն հիմքով հայերէնի ուսուցումը կազմակերպելու նպատակով:
Նախարարը կարեւոր համարած է դասախօսներու դերը յատկապէս երկու հիմնահարցերու` Հայոց Ցեղասպանութեան ճանաչման, ԼՂՀ հարցի խաղաղ կարգաւորման ուղղութեամբ երիտասարդութեան մէջ տեղեկացուածութեան ընդլայնման գործով:

Հանդիպման աւարտին Սփիւռքի մէջ հայ մշակոյթի տարածման նպաստող գործունէութեան, այդ բնագաւառին մէջ ակնառու նուաճումներու եւ ձեռքբերումներու համար Հ. Յակոբեան ՀՀ սփիւռքի նախարարութեան “Ուիլիամ Սարոյեան” մետալով պարգեւատրած է մանկավարժական գիտութիւններու դոկտոր, փրոֆէսըր Ճուլիէթա Կիւլամիրեանը եւ բանասիրական գիտութիւններու դոկտոր, փրոֆէսոր, “Սփիւռք” գիտաուսումնական կեդրոնի հիմնադիր, տնօրէն Սուրէն Դանիէլեանը:

 

LEAVE A REPLY

Please enter your comment!
Please enter your name here