Արցախեան Շարժման 25-ամեակը Արժեւորելու Նախապատրաստութիւններ

0
68

 Լեռնային Ղարաբաղի Հանրապետութեան Ազգային ժողովին մէջ 27 Դեկտեմբերին իր անդրանիկ նիստը գումարեց նախագահական հրամանագիրով յառաջացած, արցախահայութեան ազգային-ազատագրական պայքարի՝ Ղարաբաղեան շարժման 25-ամեակի տօնակատարութեան պետական յանձնաժողովը:

 Նիստին նախագահած է Ազգային ժողովի նախագահ, պետական յանձնաժողովի նախագահ Աշոտ Ղուլեանը:
Ընդգծելով Շարժման յոբելենական տարեդարձի տօնակատարութեան կարեւորութիւնը՝ Արցախ-Հայաստան-Սփիւռք եռամիասնութեան հանրային-քաղաքական կեանքին մէջ, ինչպէս նաեւ արտաքին քարոզչութեան առումով, Ազգային ժողովի նախագահը իր խօսքին մէջ  դիտել տուած է, որ յանձնաժողովը իր աշխատանքները պիտի տանի այնպիսի ձեւով, որ տարաբնոյթ նախաձեռնութիւններով բազմակողմանի առումով արժեւորուի ազգային վերազարթօնքի գաղափարը: Ան նշած է, թէ ձեռնարկները պէտք է ընդգրկեն հանրապետութեան բոլոր բնակավայրերը անխտիր եւ կրեն համաժողովրդական բնոյթ: Ղուլեան յայտնած է, որ տօնակատարութիւնը պիտի չսահմանափակուի միայն փետրուարեան միջոցառումներով, այլ պիտի ըլլայ շարունակական ու ծաւալի ամբողջ տարուան ընթացքին։ Այդպիսով, պետական յանձնաժողովը տարուան մը գործունէութիւն պէտք է տանի։
Տեղի ունեցած է միտքերու փոխանակում, յանձնաժողովի անդամները ներկայացուցած են տօնական նախաձեռնութիւններու կայացման առնչուող իրենց պատկերացումները եւ համապատասխան առաջարկները՝ անոնց գործադրութեան միջոցներուն անդրադառնալով:
Ազգային ժողովի  նախագահը ներկաներուն յանձնարարած է յաջորդ նիստին համար պատրաստել իրենց առաջարկները, որպէսզի կարելի ըլլայ տօնական հանդիսութիւններու ծրագիրի նախագիծը պատրաստել։ Ան նաեւ տուած է կարգ մը յանձնարարութիւններ։

LEAVE A REPLY

Please enter your comment!
Please enter your name here