Իպրահիմիի Համաձայն՝ Սուրիոյ Հարցը Կարելի Է Լուծել Քանի Մը Ամիսէն

0
70

 Սուրիա իր այցելութիւնը աւարտած Սուրիոյ հարցով ՄԱԿ-ի եւ Արաբական Lիկայի յատուկ պատուիրակ Լախտար Իպրահիմի յայտարարեց, թէ տագնապը կարելի է լուծել քանի մը ամիսէն, եթէ իշխանութիւններն ու ընդդիմութիւնը համաձայն գտնուին ժամանակաւոր կառավարութեան մը կազմութեան իր առաջարկին:
Իպրահիմի ըսաւ, թէ միջազգային համայնքը ծայրայեղական խմբաւորումներու չի զօրակցիր եւ բռնարարքներու դէմ է՝ կրկնելով, թէ պէտք է անմիջապէս դադրի դէպի Սուրիա զէնքի հոսքը:
Ան նաեւ հերքեց այն պնդումները, թէ ինք առաջ կը մղէ Սուրիոյ տագնապի լուծման ռուս-ամերիկեան ծրագիր մը: Ռուսիոյ արտաքին գործոց նախարարութիւնը եւս հերքեց այն լուրերը, թէ Սուրիոյ տագնապի լուծման ռուս-ամերիկեան ծրագիր մը գոյութիւն ունի: Մոսկուա նաեւ շեշտեց, թէ Սուրիոյ նախագահ Պաշշար Ասատի հրաժարումը չի կրնար տագնապի լուծման նախապայման մը դառնալ:
Ըստ Իպրահիմիի ծրագիրին՝ իշխանութեան եւ ընդդիմութեան ներկայացուցիչներով կազմուելիք ժամանակաւոր կառավարութիւնը պէտք է ամբողջական իրաւասութիւններով լիազօրուած ըլլայ:
Մամլոյ ասուլիսէն ետք, Իպրահիմի Դամասկոսէն  մեկնեցաւ Պէյրութ, իսկ Շաբաթ օր Մոսկուա պիտի այցելէ:
Յայտնենք, թէ Հինգշաբթի օր Սուրիոյ արտաքին գործոց փոխնախարար Ֆայսալ Միքտատ Մոսկուայի մէջ շարք մը հանդիպումներ ունեցաւ բարձրաստիճան պաշտօնատարներու հետ:
Ապահովական գետնի վրայ, Հինգշաբթի օր բախումները շարունակուած են Հոմսի մէջ եւ Հալէպի օդակայանին մօտերը, իսկ Դամասկոսի մէջ ականի մը պայթումին պատճառով արձանագրուած է առնուազն 4 զոհ եւ 10 վիրաւոր:
Նաեւ, «Ռաշա Թուտէյ» հաղորդեց, որ ռուսական նաւատորմիղը Սուրիոյ ծովափին մօտ ահաբեկչութեան դէմ պայքարի ռազմափորձեր կը կատարէ:
Իր կարգին, Իրանի արտաքին գործոց նախարար Ալի Աքպար Սալեհի յայտարարեց, որ Թեհրան պիտի չարտօնէ «Սուրիոյ վրայ արտաքին լուծումներու պարտադրումը»՝ յոյս յայտնելով, որ հակառակ դժուար կացութեան, այս տագնապը կը լուծուի: Սալեհի ըսաւ, որ միջ-սուրիական երկխօսութիւնը Սուրիոյ տագնապին միակ լուծումն է:
Մինչ այդ, Իսրայէլի վարչապետ Պենիամին Նեթանիահու Յորդանան այցելած է եւ Սուրիոյ կացութիւնը քննած է Ապտալլա թագաւորին հետ: Իսրայէլեան աղբիւրներու համաձայն՝ Թել Աւիւ կ՛առաջարկէ սուրիական քիմիական զէնքերու պահեստանոցներուն վրայ անյապաղ յարձակում գործել:

 

LEAVE A REPLY

Please enter your comment!
Please enter your name here