ՀԱԳ-ը Պիտի Չսատարէ Նախագահական Ոեւէ Թեկնածուի

0
58

 Յառաջիկայ տարի կայանալիք նախագահական ընտրութիւններու շեմին արդէն իսկ որոշ չափով յստակացած են տարբեր կուսակցութիւններու դիրքորոշումներն ու մտադրութիւնները։
27 Դեկտեմբերին հրապարակած իր  յայտարարութեան մէջ Հայ Ազգային Գոնկրէսը դիտել տուած է, որ պիտի չսատարէ նախագահական ընտրութիւններուն առաջադրուած ոեւէ թեկնածուի՝ աւելցնելով, որ անիմաստ կը նկատէ ընտրութիւններուն մասնակցութիւնը: Ըստ «Արմենփրէս»ի, ընտրութիւններուն չմասնակցելու եւ ոեւէ թեկնածուի չսատարելու մասին յայտարարութիւններ կատարած են նաեւ Բարգաւաճ Հայաստան կուսակցութիւնն ու Հայ Յեղափոխական Դաշնակցութիւնը:
Կեդրոնական ընտրական յանձնաժողովին իրենց փաստաթուղթերը ներկայացուցած են Հայաստանի Հանրապետական կուսակցութեան առաջնորդ, գործող նախագահ Սերժ Սարգսեանը, անկուսակցական Մհեր Հայրապետեանը, Ազգային Ինքնորոշում Միաւորում կուսակցութեան նախագահ Պարոյր Հայրիկեանը եւ անկուսակցական, դիւցազնագէտ Վարդան Սեդրակեանը:
Առաջադրուելու իրենց որոշման մասին յայտարարած են նաեւ Ժառանգութիւն կուսակցութեան առաջնորդ Րաֆֆի Յովհաննէսեանը, Ազատութիւն կուսակցութեան նախագահ Հրանտ Բագրատեանը, որ յայտարարած է, թէ իր որոշումներուն մէջ անկաշկանդ ըլլալու համար առայժմ պիտի դադրեցնէ ՀԱԳ-ի քաղաքական խորհուրդին հետ համագործակցութիւնը։ Իրենց թեկնածութիւնը առաջադրելու փափաք յայտնած են նաեւ Մարքսիստական կուսակցութեան առաջնորդ Դաւիթ Յակոբեանը, «Ազդարար» հանդէսի վերահրատարակիչ Մարտիկ Սարգսեանը եւ ՀՅԴ-ի նախկին անդամ Յովիկ Աղազարեանը:
ՀԱԳ-ի առաջնորդ Լեւոն Տէր Պետրոսեան յայտարարած է, որ իր թեկնածութիւնը պիտի չառաջադրէ եւ քաղաքական դաշտը  առաւել երիտասարդներուն պիտի զիջի, իսկ ՀՅԴ-ն եւս նշած է, որ թեկնածու պիտի չառաջադրէ ընտրութիւններուն ։

 

LEAVE A REPLY

Please enter your comment!
Please enter your name here