Սեփական Ճակատագիրը Ինքնուրոյն Տնօրինելու Արցախի Ժողովուրդի Պայքարը Օրինական է ու Արդար. ԼՂՀ ԱԺ Նախագահի Ամանօրեայ Խօսքը

0
131

 Նոր Տարուան եւ Սուրբ Ծննդեան առիթով շնորհաւորանքներ յղած է ԼՂՀ ԱԺ նախագահ Աշոտ Ղուլեան.

«2012 թուականը կը դառնայ պատմութիւն` մեր յիշողութեան մէջ մնալով իբրեւ Շուշիի ազատագրման, ԼՂՀ Պաշտպանութեան բանակի կազմաւորման 20-ամեակի յոբելինական եւ Արցախի Հանրապետութեան նախագահի համաժողովրդական 5-րդ ընտրութիւններու տարի:

2013 թուականին պիտի բոլորուի Արցախի ինքնուրոյնութեան եւ ազատութեան համար մեր պայքարի քառորդ դարը: Կը լրանայ 25 տարին, որ մենք կ’ապրինք արժանապատուօրէն: Միաժամանակ կը կրենք սեփական ճակատագրի համար պատասխանատւութիւն:
Մենք յաջողած ենք համազգային միասնութեան շնորհիւ քսաներորդ դարավերջին կեանքի կոչել ազատ ու անկախ ապրելու մեր նախնեաց նուիրական իղձերը, դիմակայած ու յաղթահարած մեզի պարտադրուած դաժան պատերազմի արհաւիրքները, հաստատած ու կառուցած ինքնիշխան եւ ինքնաբաւ պետութիւն` իր բոլոր անհրաժեշտ հիմնարկներով:
Մենք դեռ չենք լուծած բազմաթիւ խնդիրներ: Բայց մենք անկեղծօրէն կ’ուզենք կերտել ազատ, արդար, ժողովրդավարական եւ հասարակական երկիր: Ատիկա բոլորիս վեհ նպատակն է: Դէպի մեր իղձերու հասարակութիւն տանող ճանապարհը կ’անցնի հանրային, քաղաքական եւ հասարակական երկխօսութեան մէջէն:

Չեմ կրնար խոնարհումի իմ խօսքը չըսել ի յիշատակ Արցախի ազատութեան համար նահատակուածներուն: Միաժամանակ, շնորհաւորանքս առաջին հերթին կ’ուղղեմ անոնց ընտանիքներուն` մայրերուն, կանանց, զաւակներուն:
Վստահ եմ, որ Նոր Տարուան գիշերը արցախեան բոլոր օճախներուն մէջ կրկին պիտի հնչեն մեր երկրի սահմանները հսկող զինուորներուն եւ անոնց հրամանատարներուն ուղղուած օրհնանքն ու բարեմաղթանքները:

Մենք համոզուած ենք` սեփական ճակատագիրը ինքնուրոյն տնօրինելու Արցախի ժողովուրդի պայքարը օրինական է ու արդար եւ, իբրեւ այդպիսին, անպայման ենթակայ է ու արժանի միջազգային ճանաչման:
Ու թող 2013 թուականը երջանիկ տարի ըլլայ մեզի համար, ըլլայ կայուն խաղաղութեան, նոր յաջողութիւններու, բարօրութեան տարի»:

 

LEAVE A REPLY

Please enter your comment!
Please enter your name here