Սուրիոյ Ընդդիմութիւնը Կը Մերժէ Բանակցութիւններու Հրաւէրը

0
134

   Սուրիոյ   ընդդիմութիւնը   մերժեց    իշխանութիւններուն հետ  բանակցութիւններ վարելու Մոսկուայի առաջարկը: Ռուսիոյ արտաքին գործոց նախարար Սերկէյ Լաւրով Ուրբաթ, Դեկտեմբեր 28-ին բանակցութեանց հրաւիրեց Սուրիոյ ընդդիմութիւնը, Սուրիոյ հարցով ՄԱԿ-ի եւ Արաբական Լիկայի յատուկ պատուիրակ Լախտար Իպրահիմիի Մոսկուա այցելութեան նախօրեակին:

 Մոսկուա այս քայլին կը դիմէ, հակառակ անոր, որ քննադատած էր այն պետութիւնները, որոնք պաշտօնական ճանաչաում շնորհած են ընդդիմութեան: Իպրահիմի այսօր՝  Շաբաթ   շարք մը հանդիպումներ պիտի  ունենայ  Ռուսիոյ մայրաքաղաքին մէջ:
Ֆրանսայի արտաքին գործոց նախարարութեան բանբեր Ֆիլիփ Լանիօ, պատասխանելով Սուրիոյ նախագահ Պաշշար Ասատը մինչեւ 2014 իր պաշտօնին վրայ պահող ծրագիրի մը մասին հարցումի մը՝ ըսաւ, որ Ասատ «չի կրնար քաղաքական փոխանցման հոլովոյթին մաս կազմել», աւելցնելով, որ Ֆրանսա կը յուսայ, թէ Իպրահիմի Դամասկոս իր այցելութեան ընթացքին «յարմար պատգմաներ փոխանցած է Ասատին»:
Իպրահիմի Դամասկոսէն Լիբանան անցաւ եւ ապա Պէյրութի միջազգային օդակայանին ճամբով մեկնեցաւ Մոսկուա, ուր կը գտնուի սուրիական կառավարական պատուիրակութիւնը, որուն ղեկավարը՝ արտաքին գործոց փոխնախարար Ֆայսալ Միքտատը, Հինգշաբթի օր հանդիպում ունեցաւ Լաւրովի եւ անոր տեղակալներ Միխայիլ Պոկտանովի ու Կենատի Կաթիլովի հետ:
Միւս կողմէ, Իսրայէլի առաջին փոխվարչապետ Մոշէ Եաալոն յայտնեց, որ Միացեալ Նահանգներ կը պատրաստուի Սուրիա ներթափանցելու՝ հոն «քաղաքայիններու դէմ քիմիական զէնքերու օգտագործման կամ զանոնք անպատասխանատու ձեռքերու հասցնելու առնչութեամբ մտավախութիւններէ մեկնելով»: Ան մերժեց հաստատել այն լուրը, թէ Իսրայէլի վարչապետ Պենիամին Նեթանիահու Յորդանանի Ապտալլա Բ. թագաւորին հետ քննած է սուրիական զարգացումները:
Իրանեան «Ալամ» պատկերասփիւռի կայանը հաղորդեց, որ իսրայէլեան բանակէն ուժեր մերթ ընդ մերթ Թուրքիոյ ճամբով սուրիական հողեր մուտք կը գործեն՝ Սուրիոյ մէջ քիմիական զէնքերու պահեստանոցները վերահսկելու նպատակով:

LEAVE A REPLY

Please enter your comment!
Please enter your name here