2012-ի Ընթացքին Տարբեր Երկիրներու 20 Պաշտօնատարներ Յարգանքի Տուրք Մատուցեցին Ծիծեռնակաբերդի Մէջ

0
163

Նախորդ դարասկիզբը մարդկութեան դէմ գործուած մեծագոյն ոճիրի` Հայոց ցեղասպանութեան միջազգային ճանաչման գործընթացը շարունակական է եւ նպատակային: Անկախ ճանաչումէն` կատարուածը դատապարտելն ու անմեղ զոհերու յիշատակը յարգելը անցնող տարուան ընթացքին Հայաստան այցելած տարբեր երկիրներու աւելի քան երկու տասնեակ պաշտօնեաներու սրբազան պարտքը եղած է: Հայ ժողովուրդի վիշտը կիսելու անոնց պատրաստակամութիւնը երախտագիտութեամբ կ’ընդունուի Հայաստանի կողմէ: «Արմէնփրես»-ը լուսանկարներով յաւերժացուցած է 2012 թուականին Ծիծեռնակաբերդի յուշահամալիր օտարերկրեայ բարձրաստիճան պաշտօնեաներու այցերը:

ՀՀ նախագահ Սերժ Սարգսեանի հրաւէրով Հայաստան ժամանած եւրոպական յանձնաժողովի նախագահ Ժոզէ Մանուէլ Պարոզօ այցելեց Ծիծեռնակաբերդ` Հայոց ցեղասպանութեան զոհերու յուշահամալիր եւ ծաղկեպսակ դրաւ Մեծ եղեռնի զոհերուն յուշարձանին: Այնուհետեւ պատուիրակութեան անդամները ծաղիկներ դրին Մեծ Եղեռնի զոհերուն յիշատակը յաւերժացնող անմար կրակին մօտ եւ մէկ րոպէ լռութեամբ յարգեցին անմեղ զոհերուն յիշատակը:

Ուրուկուէյի Արեւելեան Հանրապետութեան Ներկայացուցիչներու պալատի նախագահ Խորխէ Օռիկօ եւ անոր գլխաւորած պատուիրակութիւնը այցելեցին Ծիծեռնակաբերդի բարձունք` Հայոց ցեղասպանութեան զոհերու յիշատակը յաւերժացնող յուշահամալիր: Խորխէ Օռիկօ տպաւորութիւններու մատեանին մէջ հետեւեալ գրառումը ըրաւ. «Ուրուգուէյի անունէն կրկին կ’ընդունինք այն պայքարը, որ կը տանիք: Հնարաւոր չէ առաջ երթալ դէպի ապագայ` առանց ներկան ճանչնալու հաստատակամութեան»: Ուրուկուէյը աշխարհին առաջին պետութիւնն է, որ ճանչցած է Հայոց Ցեղասպանութիւնը` 1965 թուականին Խորհրդարանի բանաձեւով, իսկ 2004-ին` օրէնքով:

Լաթվիոյ Հանրապետութեան արտաքին գործոց նախարար Էտկարս Ռինկեւիչսի գլխաւորած պատուիրակութիւնը Նոյեմբեր 15-ին այցելեց Ծիծեռնակաբերդի բարձունք` Հայոց ցեղասպանութեան զոհերու յիշատակը յաւերժացնող յուշահամալիր: Հայոց ցեղասպանութեան թանգարան-ինստիտուտի մէջ, թանգարան-ինստիտուտի տնօրէն Հայկ Դեմոյեանի ուղեկցութեամբ եւ ներկայացմամբ, հիւրերը ծանօթացան 20-րդ դարու մեծագոյն ոճրագործութիւնը փաստող ցուցանմուշներուն եւ տպաւորութիւններու մատեանին մէջ հետեւեալ գրառումը ըրին. «Կարեւոր է պահպանել զոհերու յիշատակը, որպէսզի նման բան այլեւս տեղի չունենայ»: Լաթվիա դեռ չէ ճանչցած Հայոց Ցեղասպանութիւնը:

ՀԱՊԿ անդամ պետութիւններու խորհրդարաններու պաշտպանութեան եւ անվտանգութեան մշտական յանձնաժողովներու նախագահներու համակարգող խորհրդակցութեան անդամները այցելեցին Ծիծեռնակաբերդ: Ռուսաստանի պետտումայի անվտանգութեան հարցերու յանձնաժողովի նախագահ Իրինա Եարովայան պատուաւոր հիւրերու յուշամատեանին մէջ գրած էր. «Յիշողութիւնն այն է, ինչ որ կը պահպանուի անցեալի նկատմամբ հաւատարմութիւնը եւ կը պաշտպանէ ապագայի սխալներէն: Հայաստանի ցաւը եւ ողբերգութիւնը մեր ժողովուրդներուն համար ընդհանուր է: Կեանքի ծառը ներկայի եւ ապագայի իմաստն ու էութիւնն է»:

Լիւքսեմպուրկի Մեծ Դքսութեան փոխվարչապետ, արտաքին գործոց նախարար Ժան Ասելպորնի գլխաւորած պատուիրակութիւնը այցելեց Հայոց Ցեղասպանութեան զոհերու յուշահամալիր: Փոխվարչապետը գրառում կատարեց թանգարանի պաշտօնական այցելութիւններու յուշամատեանին մէջ. «Հայ ժողովուրդին պատճառած այդ ցաւը երբեք պէտք չէ մոռացուի: Պէտք է մշտապէս վառ պահել անմեղ զոհերու յիշատակը, եւ զայն պատմել յետագայ սերունդներուն»:

Արժանթինի Հանրապետութեան Արտաքին գործոց նախարար Հեքթոր Մարքոս Թիմերման Սեպտեմբեր 4-ին այցելեց Ծիծեռնակաբերդ: ԱԳ նախարարը գրառում կատարեց տպաւորութիւններու մատեանին մէջ. «Մէկ մարդու ողբերգութիւնը ամբողջ մարդկութեան ողբերգութիւնն է: Եկէք աշխատինք` միասին վերացնել երկրագունդի վրայի ատելութիւնը»: Հայոց ցեղասպանութեան փաստը Արժանթինի կողմէ ճանչցուած եւ օրէնքով ամրագրուած է 2006 թուականին»:

Իսրայէլի տեղեկատուութեան եւ սփիւռքի նախարար Եուլի Էտելշտէյն Օգոստոս 24-ին այցելեց Հայոց ցեղասպանութեան զոհերու յուշահամալիր: Նախարարը գրառում կատարեց թանգարանի պաշտօնական այցելութիւններու յուշամատեանին մէջ, ուր մասնաւորապէս ըսուած է. «Մեր ժողովուրդներու միջեւ կան շատ ընդհանրութիւններ ու նման պատմական դրուագներ: Իսրայէլի մէջ որեւէ մէկը չի ժխտեր Հայոց ցեղասպանութեան փաստը»:
Ռուսաստանի Դաշնութեան Դաշնային ժողովի Պետական դումայի նախագահ Սերկէյ Նարիշկին Յուլիս 24-ին այցելեց Հայոց Ցեղասպանութեան զոհերու յիշատակը յաւերժացնող յուշահամալիր: Ռուսաստանը Պետական Տումայի որոշումով 14 Ապրիլ 1995-ին ճանչցած է Հայոց Ցեղասպանութիւնը:
Պաշտօնական այցով Հայաստան գտնուող Եւրոպական խորհուրդի նախագահ Հերման վան Ռոմպույ ՀՀ արտաքին գործոց նախարար Էդուարդ Նալպանտեանի ուղեկցութեամբ Յուլիս 4-ին այցելեց Հայոց ցեղասպանութեան զոհերու յիշատակը յաւերժացնող Ծիծեռնակաբերդի յուշահամալիր: Ռոմպույ ծաղկեպսակ դրաւ յուշակոթողին եւ մէկ րոպէ լռութեամբ յարգեց Ցեղասպանութեան նահատակներու յիշատակը: Եւրոպական խորհուրդի խորհրդարանական ասամպլէան հռչակագիրով 1998 եւ 2001 թուականներու Ապրիլ 24-ին ճանչցած Հայոց Ցեղասպանութիւնը:

Պաշտօնական այցով Հայաստան ժամանած Աւստրիոյ Հանրապետութեան նախագահ Հայնց Ֆիշըր ՀՀ արտաքին գործոց նախարար Էդուարդ Նալպանտեանի եւ քաղաքապետ Տարօն Մարգարեանի ուղեկցութեամբ Յունիս 26-ին այցելեց Հայոց ցեղասպանութեան զոհերու յուշահամալիր` Ծիծեռնակաբերդ: Թանգարանի յուշամատեանին մէջ ան կատարեց գրառում, ուր մասնաւորապէս ըսուած է. «Խօսքեր չեմ գտներ նկարագրելու այն մեծ մարդկային ողբերգութիւնը, որ տեղի ունեցած է հայ ժողովուրդին հետ»: Աւստրիոյ նախագահը յիշատակի պուրակին մէջ եղեւնի տնկեց եւ ջուր ցօղեց: Աւստրիա դեռ չէ ընդունած Հայոց ցեղասպանութիւնը:

Լիթվիոյ Հանրապետութեան ազգային պաշտպանութեան նախարար տիկին Ռասա Եուկնեւիչիեն եւ անոր ուղեկցող պատուիրակութիւնը այցելեցին Ծիծեռնակաբերդ: 15 Դեկտեմբեր 2005-ին Լիթվոյ Սեյմ ընդունած է Օսմանեան կայսրութեան մէջ 1915 թուականի Հայոց ցեղասպանութիւնը դատապարտող բանաձեւ:
Պաշտօնական այցով Հայաստան ժամանած Ուրուկուէի արտաքին գործոց նախարար Լուիս Ալմակրօ այցելեց Հայոց ցեղասպանութեան զոհերու յուշահամալիր: Պատուիրակութեան անդամները շրջայց կատարեցին նաեւ Յիշողութեան պուրակին մէջ, ուր Լուիս Ալմակրօ տնկեց արծաթափայլ եղեւնի: Ուրուկուէյ առաջին երկիրն էր, որ 1965-ին պաշտօնապէս ճանչցայ Հայոց ցեղասպանութեան փաստը` Ապրիլ 24-ը յայտարարելով «Հայ նահատակներու յիշատակի օր»:
Գերմանիոյ պետական նախարար Քորնելիա Պիպեր յարգանքի տուրք մատուցեց Հայոց Ցեղասպանութեան զոհերու յիշատակին: Գերմանիոյ Դաշնային Հանրապետութեան խորհրդարանական պատուիրակութիւնը Պունտեսթակի փոխխօսնակ Վոլֆկանգ Թիրզէի գլխաւորութեամբ Սեպտեմբեր 30-ին այցելեց Ծիծեռնակաբերդ: Գերմանիոյ Պունտեսթակի փոխխօսնակը լրագրողներու հետ ճեպազրոյցի ընթացքին նշեց, որ տպաւորուած է թանգարանին մէջ իր տեսածով: «Այս ամէնը մեզի կը յիշեցնէ կատարուած սարսափելի իրադարձութիւններուն, մեծ յանցագործութեան մասին: Այս յիշատակը պէտք է նաեւ իր «պտուղները» ունենայ. յիշատակը անիմաստ կ’ըլլայ, եթէ չօգնէ սերունդներուն առաջ երթալու, փոխըմբռնման եւ ապագային աւելի լաւ տեսլականներ ունենալուն»,- ընդգծած է Թիրզէ:

Իսրայէլի գիւղատնտեսութեան եւ գիւղական զարգացման նախարար Օրիթ Նոկետ այցելեց Ծիծեռնակաբերդ: Օրիթ Նոկետ գրառում կատարեց թանգարանի պաշտօնական այցելութիւններու յուշամատեանին մէջ. «Իբրեւ կին, իբրեւ հրեայ եւ իբրեւ մարդ արարած` ես ցնցուած եմ այս նկարներուն մէջ ցուցադրուածը տեսնելով, անմեղ հայ մարդոց եւ ընտանիքներու սպանութիւններէն»: Իսրայէլը պաշտօնապէս չէ ճանչցած Հայ ժողովուրդի մեծագոյն ողբերգութիւնը:
Լիթվիոյ ԱԳ նախարար Աուտրոնիուս Աժուպալիս այցելելով Ծիծեռնակաբերդ` գրառում կատարեց թանգարանի պաշտօնական այցելութիւններու յուշամատեանին մէջ, ուր մասնաւորապէս գրած է. «Միայն յիշողութեան պահպանման միջոցով կրնանք ստեղծել մէկ աշխարհ, ուր նման ողբերգութիւններու կրկնութիւնը անհնարին կ’ըլլայ ինչպէս հայերու, այնպէս ալ որեւէ այլ ժողովուրդի համար»: Լիթվիան Հայոց Ցեղասպանութիւնը ճանչցած երկրներու շարքին է:
Ֆինլանտիոյ Հանրապետութեան արտաքին գործոց նախարար Էրկկի Տուոմիոյիա այցելեց Ծիծեռնակաբերդ` Հայոց ցեղասպանութեան զոհերու յուշահամալիր եւ ծաղկեպսակ դրաւ Մեծ եղեռնի զոհերու յուշարձանին: Ֆինլանտիա չէ ճանչցած Հայոց Մեծ Եղեռնը:
Կիպրոսի ԱԳ նախարար Էրատօ Կոզաքու Մարքուլիս այցելելով անմեղ զոհերու յիշատակը յաւերժացնող յուշահամալիր` գրառում ձգեց նաեւ Հայոց ցեղասպանութեան թանգարան-ինստիտուտի պատուաւոր հիւրերու մատեանին մէջ` նշելով, որ Կիպրոսի ժողովուրդը եւ անձամբ ինք կը կիսեն հայ ժողովուրդի ցաւն ու ապրած ողբերգութիւնը: Կիպրոսի ներկայացուցիչներու պալատը Հայոց ցեղասպանութիւնը ճանչցող բանաձեւը ընդունած է 1982-ին:
Պուլկարիոյ վարչապետ Պոյքօ Պորիսով ու անոր ուղեկցող պատուիրակութիւնը այցելեցին Ծիծեռնակաբերդ: Պուլկարիա չի ընդունած Մեծ Եղեռնը:
Ռուսաստանի Դաշնութեան արտաքին գործոց նախարար Սերկէյ Լաւրով այցելեց Ծիծեռնակաբերդի յուշահամալիր` յարգանքի տուրք մատուցեց անմեղ զոհերու յիշատակը յաւերժացնող յուշահամալիրին:
Գերմանիոյ Դաշնային հանրապետութեան արտաքին գործոց նախարար Կիտօ Վէսթերուելեն Մարտի 16-ին այցելեց Հայոց ցեղասպանութեան անմեղ զոհերու յիշատակը յաւերժացնող Ծիծեռնակաբերդի յուշահամալիր: Գերմանիոյ Պունտեսթակը Հայոց ցեղասպանութեան ճանաչման եւ դատապարտման բանաձեւ է ընդունած է 2005-ին:

 

LEAVE A REPLY

Please enter your comment!
Please enter your name here