Օճալանի Խորհրդակցութիւնները Թուրքիոյ Պետական Ներկայացուցիչներուն Հետ

0
77

 Մարտինէն քիւրտ երեսփոխան Ահմէտ Թիւրք, որ Իմրալը կղզիին վրայ անցեալ շաբաթ տեսակցութիւն մը ունեցած էր Քիւրտիստանի բանուորական կուսակցութեան ցմահ բանտարկութեան դատապարտուած ղեկավար Ապտուլլահ Օճալանի ու չորս թուրք պաշտօնատարներու հետ, Երկուշաբթի, Յունուար 7-ին մասնակցեցաւ քրտամէտ Խաղաղութիւն եւ ժողովրդավարութիւն կուսակցութեան համանախագահ Սելահատտին Տեմիրթաշի գլխաւորած խորհրդարանի շէնքին մէջ կատարուած ժողովի մը, որուն գլխաւոր նիւթն էր քննարկել Օճալանի հետ տեսակցութեան մանրամասնութիւնները։
Թէ Օճալան ինչպիսի՞ պահանջներ ներկայացուցած է պետութեան, որպէսզի զէնքերը վար դրուին վերջնականապէս՝ տակաւին յայտնի չէ, սակայն «Ռատիքալ»ը Երեքշաբթի օր հաղորդեց, թէ զինեալ պայքարը կասեցնելու գծով համաձայնութեան մը նախագիծ գոյացած է։
Թիւրք ըսաւ, որ ինք յուսալից է ստեղծուած նոր պայմաններուն կապակցութեամբ։ Ան դիտել տուաւ, որ նման տեսակցութիւններ պէտք է շարունակուին, որպէսզի զէնքերը վերջնականապէս վար դրուին։ Ան ըսաւ նաեւ, որ Օճալանի պահանջները պետութիւնը դժուար կացութեան մատնելու բնոյթ չունին՝ առանց մանրամասնելու այդ մասին։
Իր կարգին, Տեմիրթաշ ըսաւ, որ կուսակցութիւնը քանի մը օրէն պիտի հրապարակէ իր պաշտօնական կեցուածքը Օճալանի հետ կատարուած տեսակցութիւններուն մասին։
Նաեւ, Վանի անկախ երեսփոխան Այսէլ Թուղլուք, Տիարպեքիրի մէջ ըսաւ, որ քրտական հարցը կը լուծուի ո՛չ թէ ժխտումով ու ուրացումով, այլ՝ ժողովրդավարական հիմերու վրայ կատարուած բանակցութիւններով՝ դրուատելով Օճալանի հետ տեսակցութիւնը: Ան աւելցուց, թէ շատ յատկանշական է, որ Օճալանին հետ տեսակցելու արտօնութիւնը տրուեցաւ այնպիսի պատուիրակութեան մը, որուն գլուխը կը գտնուի Ահմէտ Թիւրք:

 

LEAVE A REPLY

Please enter your comment!
Please enter your name here