Օճալանի Հետ «Իսկական Բանակցութեանց Պայմաններ» Ստեղծելու Կոչ

0
65

Քրտամէտ Խաղաղութիւն եւ ժողովրդավարութիւն կուսակցութեան համանախագահ Սելահետտին Տեմիրթաշ կուսակցութեան երեսփոխանական խմբակի նիստին ընթացքին, Երեքշաբթի, Յունուար 9-ին մեկնաբանութիւններ ըրաւ Օճալանի հետ կատարուած վերջին տեսակցութեամբ բացուած գործընթացին մասին։ Տեմիրթաշ շեշտեց, որ այս նոր գործընթացին մէջ իր կուսակցութեան կողմէ որեւէ առաջարկ կամ պահանջ չէ ներկայացուած. գործընթացը բոլորովին նախաձեռնութիւնն է իշխող Արդարութիւն եւ բարգաւաճում կուսակցութեան։
Տեմիրթաշ դիտել տուաւ, որ ասիկա տակաւին իրական իմաստով բանակցութիւն մը չէ։ Կառավարութիւնը պէտք է ստեղծէ «իսկական բանակցութեան մը պայմանները»։ Ան աւելցուց, որ նման բանակցութեանց պէտք է մասնակցին նաեւ քրտական շահագրգիռ քաղաքացիական կազմակերպութիւնները։ «Այն ատեն է, որ կարելի պիտի ըլլայ ըսել, թէ քրտական հարցով բանակցութիւնը սկսած է», ըսաւ ան։
«Ներկայիս այդ պայմանները չկան, որովհետեւ կառավարութեան նկատմամբ անվստահութիւն կայ։ Կառավարութիւնը այս խնդիրին կը մօտենայ «կոտրեցինք, յաղթեցինք, հիմա մեզի պիտի յանձնուին» ըսելով, եւ այս ասութիւնը մեզ որեւէ տեղ չի տանիր։ Կառավարութիւնը պէտք է փոխէ իր լեզուն», շեշտեց ան։
Տեմիրթաշ նաեւ ըսաւ, որ Օճալան պէտք է հանուի Իմրալը կղզիին վրայ գտնուող բանտէն։ «Կարելի չէ բանակցութիւն վարել մէկու մը հետ, որ բանտարկուած է քանի մը մեթր քառակուսիի մէջ, կղզիի մը վրայ։ Պէտք է բարելաւուին Օճալանի կեցութեան պայմանները», յայտնեց ան։
Տեմիրթաշ նաեւ պահանջեց, որ ազատ արձակուին Օճալանի փաստաբանները, որոնք ձերբակալուած էին Օճալանին հետ տեսակցած ըլլալու մեղադրանքով։

 

LEAVE A REPLY

Please enter your comment!
Please enter your name here