Խորհրդարանական Ենթայանձնախումբը Այսօր Իր Նիստերուն Ատենագրութիւնը Պիտի Յանձնէ Պըրրիի

0
60

Ընտրական օրէնքը քննարկող խորհրդարանական ենթայանձնախումբը ըստ սովորականին խորհրդարանին մէջ գումարեց իր առաւօտեան նիստը, որուն աւարտը սակայն սովորական չեղաւ, այլեւ` փոթորկոտ, ինչպէս էին երկրին կլիմայական պայմանները նախորդ երեք օրերուն ընթացքին:

Խորհրդարանական ենթայանձնախումբին նիստը եղաւ փոթորկոտ եւ բանավէճերով լեցուն, պարզ այն պատճառով, որ յանձնախումբի անդամ, Փոփոխութիւն եւ բարեկարգում համախմբումի երեսփոխան Ալեն Աուն առաջարկեց Ուղղափառ հանդիպումին մշակած օրինագիծը ներկայացնել խորհրդարանի լիագումար նիստին` նկատի ունենալով անոր շուրջ գոյացած համախոհութիւնը:

Այս առաջարկին ընդդիմացան Ազգային պայքարի ճակատ պլոքի երեսփոխան Աքրամ Շեհայէպ եւ Մուսթաքպալ հոսանքի երեսփոխան Ահմետ Ֆաթֆաթ:

Այս մերժումին պատճառով նիստը սկսաւ փոթորկիլ եւ անոր իբրեւ հետեւանք երեսփոխան Ալեն Աուն լքեց նիստը. Աունի հետեւեցան երեսփոխաններ Սամի Ժեմայէլ եւ Ժորժ Ատուան, որոնք առանձին հանդիպում մը ունեցան Ժեմայէլի գրասենեակին մէջ` հարցին լուծում մը գտնելու նպատակով:

Սակայն անոնք ձեռնունայն դուրս եկան` առանց այդ հարցին լուծում մը գտնելու:

Երեսփոխան Ալեն Աուն յայտնեց, որ ինք ընդվզած է, որ նիստերուն ատենագրութիւնը չէ վաւերացուած` նկատել տալով, որ այդ իմաստով ձգձգում կ՛արձանագրուի: «Հետեւաբար որոշեցի խորհրդարանական ենթայանձնախումբին նիստերուն իմ մասնակցութիւնս պոյքոթի ենթարկել եւ կեցուածքէս անշեղ պիտի մնան, մինչեւ  որ ատենագրութիւնը վաւերացուի եւ խորհրդարանի լիագումար նիստին փոխանցուի», ըսաւ ան:

Իր կարգին, Ֆաթֆաթ յայտնեց, որ Ալեն Աուն ձախողեցուցած է խորհրդարանական ենթայանձնախումբին նիստը, որովհետեւ ան նպատակ չունէր համախոհութիւն գոյացնել:

Երեսփոխան Ժորժ Ատուան յայտնեց, որ ինք եւ երեսփոխան Ահմետ Ֆաթֆաթ հարց չունին` աւելցնելով, որ Լիբանանեան ուժերուն կողմէ  Ուղղափառ հանդիպումին մշակած օրինագիծին զօրակցութիւն ցուցաբերելը չի նշանակեր քաղաքական եւ ընտրական դաշնակից Մուսթաքպալ հոսանքին եւ Ընկերվար յառաջդիմական կուսակցութեան հետ հարց ունենալ:

Նշենք, որ խորհրդարանական ենթայանձնախումբին նիստին նախագահող երեսփոխան Ռոպեր Ղանեմ յայտնեց, որ խորհրդարանական ենթայանձնախումբը քննարկեց բոլոր օրինագիծերը, որոնք ներառուած էին իր օրակարգին վրայ: Ղանեմ աւելցուց, որ երեկոյեան նիստին ընթացքին խորհրդարանական ենթայանձնախումբը պիտի աւարտէ խորհրդարանի երեսփոխաններուն թիւին մասին իր սկսած քննարկումները:

Ան ըսաւ, որ խորհրդարանական ենթայանձնախումբը իր քննարկումներու ատենագրութիւններուն ամփոփումը պիտի յղէ խորհրդարանի նախագահ Նեպիհ Պըրրիի եւ պիտի շարունակէ քննարկել քաղաքական տարբեր կողմերուն միջեւ գտնուող հասարակ յայտարարները:

Խորհրդարանական ենթայանձնախումբին նիստը վերստին շարունակուեցաւ երեկոյեան ժամը 5:00-ին:

Նիստէն ետք յայտարարուեցաւ, որ խորհրդարանական ենթայանձնախումբը այսօր պիտի աւարտէ իր նիստին ատենագրութիւնը եւ զայն պիտի յանձնէ Պըրրիի:

Նշենք, որ հերքելով «Ժատիտ» պատկերասփիւռի հաղորդած այն լուրը, թէ  Հայկական երեսփոխանական պլոքի ներկայացուցիչ, երեսփոխան Յակոբ Բագրատունի եւ երեսփոխան Ալեն Աուն պոյքոթի ենթարկած են իրենց մասնակցութիւնը ենթայանձնախումբի նիստին, երեսփոխան Բագրատունի յայտնեց, որ ինք նախապէս տեղեակ պահած էր ենթայանձնախումբի նախագահն ու անդամները, թէ ինք պարտաւոր է նոյն ժամուն ներկայ գտնուիլ Անթիլիասի կաթողիկոսարան, ուր տեղի պիտի ունենար Կիպրոսի նախագահին հետ հանդիպումը:

 

LEAVE A REPLY

Please enter your comment!
Please enter your name here