Ըստ Թուրքիոյ Վճռաբեկ Ատեանին՝ Տինքի Սպանութեան Ետին Կազմակերպութիւն Մը Կայ

0
80

Հրանդ Տինքի սպանութեան դատավարութեան մէջ կարեւոր նորութիւն մը արձանագրուեցաւ, երբ Թուրքիոյ Վճռաբեկ ատեանի աւագ դատախազը բեկանեց Պոլսոյ 14-դ դատարանին կողմէ արձակուած այն վճիռը, ըստ որուն՝ Հրանդ Տինքը սպաննողներուն ետին կազմակերպութիւն մը չկար: Արդարեւ, հակառակ այն իրողութեան, որ Պոլսոյ դատարանը ամբաստանեալները յանցաւոր նկատած էր մարդասպանութեան համար, զանոնք անպարտ հռչակած էր կազմակերպութեան մը պատկանած ըլլալու ամբաստանութենէն՝ մերժելով այն պնդումները, թէ Հրանդ Տինք սպաննուած էր կազմակերպութեան մը հրահանգով ու ցուցմունքով։ Վճռաբեկ ատեանը, այժմ, հակառակը վճռեց:
Այժմ Պոլսոյ 14-րդ դատարանը պարտադրուած է դատավարութեան մօտենալ՝ նկատի ունենալով Վճռաբեկ ատեանի սոյն վճիռը։
Վճռաբեկի դատախազութիւնը իր տեղեկագիրին մէջ նշած է, որ Հրանդ Տինքի սպանութիւնը սովորական մարդասպանութիւն մը չէ եւ թէ այդ սպանութեան ետին կայ պետութեան միութիւնն ու ամբողջականութիւնը խանգարելու, ժողովուրդին միութիւնն ու միասնութիւնը կացինահարելու, իշխանութեան հեղինակութիւնը տկարացնելու ու երկրին մէջ քաոս եւ անիշխանութիւն ստեղծելու նպատակ։
Վճռաբեկ ատեանի աւագ դատախազին կարծիքով՝ Հրանդ Տինք սպաննուած է պարզապէս տարբեր կրօնքի մը պատկանած ըլլալուն համար, եւ ասիկա յայտնապէս կազմակերպութեան մը գործն է։

 

LEAVE A REPLY

Please enter your comment!
Please enter your name here