Սուրիական Տագնապին Զինուորական Լուծում Չկայ

0
71

 Սուրիոյ հարցով ՄԱԿ-ի եւ Արաբական լիկայի յատուկ պատուիրակ Լախտար Իպրահիմի եւ Ռուսիոյ արտաքին գործոց փոխնախարար Սերկէյ Պոկտանով ու Միացեալ Նահանգներու արտաքին գործոց նախարարի օգնական Ուիլիըմ Պըրնզ երէկ Ժընեւի մէջ ՄԱԿ-ի կեդրոնատեղիին մէջ գումարեցին Սուրիոյ տագնապի քաղաքական լուծման կարելիութիւններու քննարկման ժողով մը, որ իր տեսակին մէջ անցեալ Դեկտեմբերէն ի վեր երրորդն է:

Առաջին ժողովը գումարուած էր 6 Դեկտեմբեր 2012-ին` Իրլանտայի մայրաքաղաք Տապլինի մէջ Ռուսիոյ արտաքին գործոց նախարար Սերկէյ Լաւրովի եւ Միացեալ Նահանգներու արտաքին գործոց նախարար Հիլարի Գլինթընի մասնակցութեամբ, իսկ 9 Դեկտեմբեր 2012-ի նիստին զանոնք փոխարինած էին Պոկտանովն ու Պըրնզը:

Իպրահիմի Ժընեւ հասնելէ ետք բաւարարուեցաւ լրագրողներուն բարեւելով եւ որեւէ յայտարարութիւն չկատարեց: Ժողովը դռնփակ էր եւ ատոր մանրամասնութիւններուն մասին գրեթէ ոչ մէկ տեղեկութիւն սպրդեցաւ:

Ժընեւի հանդիպումը վերջ գտաւ առանց շօշափելի արդիւնքի, սակայն Իպրահիմի նշեց, որ ժողովին մասնակիցները համամիտ գտնուած են, թէ Սուրիոյ տագնապին զինուորական լուծում գոյութիւն չունի եւ թէ լուծումը քաղաքական է` Ժընեւի հաղորդագրութեան հիմամբ:

Մինչ այդ, Միացեալ Նահանգներու պաշտպանութեան նախարար Լէոն Փանեթա յայտարարեց, որ «Ասատի տապալումին պարագային քիմիական զէնքերու անվտանգութեան ապահովումը առաջնահերթութիւն պիտի ըլլայ», սակայն նշեց, որ Սուրիոյ վարչակարգի տապալման պարագային Միացեալ Նահանգներ այդ նպատակի իրագործման համար իր զինուորները Սուրիա պիտի չուղարկէ:

Ըստ Փենթակոնի ղեկավարին, կարեւոր է որոշել, որ միջազգային ընտանիքը ի՛նչ միջոցառումներ պէտք է ձեռնարկէ` երաշխաւորելու համար, որ քիմիական զէնքերը «վատ ձեռքերու մէջ» չյայտնուին:

«Մենք այժմ ոչ միայն Իսրայէլի, այլ նաեւ շրջանի երկիրներուն հետ հարցը կը քննարկենք եւ կը փորձենք հասկնալ, թէ ի՛նչ պէտք է ընել այդ սարքերու անվտանգութեան ապահովման համար, որպէսզի անոնք սխալ ձեռքերու մէջ չյայտնուին», ըսած է ան:

Միացեալ Նահանգներու բանակի սպայակոյտի ղեկավարներու միացեալ խորհուրդի նախագահ զօր. Մարթին Տեմփսի իր կարգին յայտարարեց, որ Միացեալ Նահանգներ ընդդիմադիրներու դէմ քիմիական զէնք օգտագործելու պարագային Ասատը խանգարելու համար ոչինչ պիտի կրնան ընել:

«Քիմիական զէնքի կիրարկումը կանխարգիլելը գրեթէ անկարելի է, որովհետեւ ատոր համար անհրաժեշտ է լիարժէք տեղեակ ըլլալ եւ մշտապէս հետեւիլ: Պէտք է տեղեակ ըլլալ զէնքի գործածութեան մասին որոշումէն` մինչեւ ատոր օգտագործումը: Անկեղծօրէն, ատիկա քիչ հաւանական է», ըսած է զօր. Տեմփսի:

Ան աւելցուցած է, որ Միացեալ Նահանգներ իր կարելին պիտի ընէ, որպէսզի սուրիացիները հասկնան, որ քիմիական զէնքի օգտագործումը անթոյլատրելի է:

Այլ գետնի վրայ, երէկ Դամասկոսի մօտ Իրանի դեսպան Մոհամմէտ Ալի Շիպանի հերքեց այն լուրերը, թէ Դամասկոսի մէջ Հըզպալլայի եւ սուրիացի բարձրաստիճան ղեկավարներու հետ հանդիպման մը ընթացքին ահաբեկման ենթարկուած է:

 

LEAVE A REPLY

Please enter your comment!
Please enter your name here