Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ ԸՆԴՈՒՆԵՑ ՐԱՅԻ ՊԱՏՐԻԱՐՔԻՆ ՆԵՐԿԱՅԱՑՈՒՑԻՉԸ

0
89

Շաբաթ 12 Յունուար 2013-ի առաւօտուն, Վեհափառ Հայրապետը իր գրասենեակին մէջ ընդունեց մարոնիթ եկեղեցւոյ Հոգեւոր Պետ Րայի Պատրիարքին Փոխանորդը` Փօլ Սայյահ Արքեպիսկոպոսը: Սայյահ Արքեպիսկոպոսը Պատրիարքին կողմէ առաքուած էր յատուկ կերպով Վեհափառ Հայրապետին փոխանցելու օր մը առաջ Պատրիարքին գլխաւորութեամբ տեղի ունեցած մարոնիթ քաղաքական ղեկավարներու խորհրդակցութեանց արդիւնքը` Լիբանանը եւ ընդհանրապէս Միջին Արեւելքը յուզող հարցերուն ու յատկապէս ընտրական օրէնքին շուրջ:

            Վեհափառ Հայրապետը իր կարգին ողջունելով Հանրապետութեան Նախագահին եւ Պատրիարքին աշխատանքները յիշեալ հարցերուն գծով շեշտեց, թէ անհրաժեշտ է մշակել այնպիսի ընտրական օրէնք ուր յարգուին համայնքներու իրաւունքները ու տեսակէտները, ինչպէս նաեւ համայնքներու կարեւոր դերը իրենց երեսփոխաններու ընտրութեան մէջ:

Պատրիարքական Փոխանորդը յայտնեց Վեհափառ Հայրապետին, որ այս հարցերուն գծով Պատրիարքը միշտ պիտի հաղորդակցութեան մէջ ըլլայ Վեհափառ Հայրապետին հետ, որպէսզի կարելի ըլլայ հաւաքական քրիստոնէական մօտեցումներ որդեգրել կարեւոր հարցերու շուրջ:

LEAVE A REPLY

Please enter your comment!
Please enter your name here