ԸՆՏՐԱԿԱՆ ՕՐԻՆԱԳԻԾԻՆ ՇՈՒՐՋ ԾԱԳԱԾ ՎԷՃԸ ՍՏՈՒԵՐԻ ՏԱԿ ԿԸ ՊԱՀԷ ԼԻԲԱՆԱՆՑԻՆԵՐՈՒ ՄՆԱՑԵԱԼ ՄՏԱՀՈԳՈՒԹԻՒՆՆԵՐԸ

0
145

 Լիբանանի քաղաքական ուժերը  մոռացութեան  տալով, երկրին   դիմագրաւած տնտեսական,  ընկերային, ապահովական մարտահրաւէրները փոխադրուած են  ընտրական  շուկայ՝ նոր օրինագիծ մը   գտնելու ակնկալութեամբ:   Իւրաքանչիւր հոսանք, կուսակցութիւն,  իր  մարմինին համապատասխան  ձեւաչափով  օրինագիծ կը փորձէ պարտադրել կողքիններուն..:

Ընտրական օրինագիծերը քննարկող խորհրդարանական ենթայանձնախումբը այսօր յետմիջօրէին պիտի գումարէ իր նիստը, որուն ընթացքին պիտի վաւերացնէ ցարդ գումարուած նիստերուն ամփոփումը ներկայացնող ատենագրութիւնը եւ սկզբունքով՝ վաղը զայն պիտի յանձնէ խորհրդարանի նախագահին ու խորհրդարանական միացեալ յանձնախումբերուն:

Փոփոխութիւն եւ Բարեկարգում խորհրդարանական խմբաւորումի պետ Միշէլ Աուն յայտարարեց, թէ այսպէս կոչուած «ուղղափառ  օրինագիծը» կը մնայ  լաւագոյնը: Իսկ  Փաղանգաւոր Կուսակցութեան  երեսփոխան Սամի Ճեմայէլ եւ  Լիբանանեան Ուժեր  Կուսակցութեան երեսփոխան Ժորժ Ատուան յայտնեցին, թէ վերոյիշեալ  օրինագիծը  մերժող կողմերը  պարտին  ներկայացնել  փոխարինող տարբերակներ: Հանրապետութեան նախագահը կը մնայ վերապահ այս  օրինագիծին  հանդէպ:  Մարտ 14-ի ուժերէն կարգ մը  հոսանքներ եւ  Ընկերվար Յառաջդիմական Կուսակցութիւնը կտրականապէս կը մերժեն այս  օրինագիծը:  Իր կարգին, խորհրդարանի նախագահ Նեպիհ Պըրրի  կը յայտնէ, թէ միայն  ենթայանձնախումբին եզրակացութիւնը  ստանալէ ետք, պիտի   ճշդէ իր կեցուածքը: Միւս կողմէ, ներքին գործոց նախարար Մարուան Շարպէլ դիտել տուաւ, թէ   բազմաթիւ  ընտրական օրինագիծեր կը գտնուին քննարկութեան տակ:

Փոփոխութիւն եւ բարեկարգում համախմբումի անդամ երեսփոխան Ալեն Աուն, որ ենթայանձնախումբին աշխատանքներէն իր մասնակցութիւնը պոյքոթի ենթարկած էր, շեշտեց, որ ինք այսօրուան նիստին պիտի մասնակցի, որովհետեւ ենթայանձնախումբը որոշած է մինչեւ օրս իր աշխատանքներուն ամփոփումը պատրաստել, այլ խօսքով` իր պահանջը կատարել:

Աուն յայտնեց, որ եթէ պոյքոթի քայլին չդիմէր, ապա ատենագրութիւնը չէր արձանագրուեր ու վաւերացուեր եւ որոշ կողմեր յետս կը կոչէին նախապէս իրենց յայտարարած յանձնառութիւնը:

Միւս կողմէ, Փաղանգաւոր Կուսակցութեան ղեկավար Ամին Ճեմայէլ շաբաթավերջին հեռաձայնային հաղորդակցութիւն մը ունեցաւ Լիբանանեան Ուժեր Կուսակցութեան ղեկավար Սամիր Ժաաժայի հետ եւ անոր ներկայացուց Ուրբաթ երեկոյեան Պքերքէի մէջ տեղի ունեցած հանդիպումին արդիւնքները:

Լրատուական կարգմը աղբիւներու համաձայն,Ժաաժա  դժգոհ է Պքերքէէն հրապարակուած հաղորդագրութենէն:

Ընտրական մթնոլորտէն հեռու,  ելեւմտական հարցերու նախարար  Մուհամմէտ Սաֆատի  խոստացաւ  յառաջիկայ  երեք շաբաթներուն ընթացքին ներկայացնել  2013-ի պետական պիւտճէի օրինագիծը:  Նախարարին մօտիկ աղբիւրներ կը հաւաստեն, թէ օրինագիծը զերծ պիտի   ըլլայ   յաւելեալ տուրքերէ:

 

LEAVE A REPLY

Please enter your comment!
Please enter your name here