ԼԻԲԱՆԱՆՑԻՆԵՐԸ ԲՈԼՈՐԻՆ ԳՈՀԱՑՆՈՂ ԸՆՏՐԱԿԱՆ ՕՐԻՆԱԳԻԾ ԿԸ ՓՆՏՌԵՆ

0
128

Խորհրդարանի յառաջիկայ ընտրութիւններուն նախօրէին,  նոր  օրինագիծ մը հաստատելու նպատակաւ տեղի ունեցող խորհրդակցութիւնները կը բացայայտեն  քաղաքական   հոսանքներու  միջեւ առկայ  բաժանումներուն խորքը:  Ներկայացուած օրինագիծերուն  դէմ առարկութիւնները եւ սկզբունքային   կեցուածքները գրեթէ անկարելի կը դարձնեն   նոր օրինագիծ մը  ճշդելու կարելիութիւնները:

Ընտրական օրէնքը քննարկող խորհրդարանական ենթայանձնախումբը երէկ երեկոյեան գումարեց իր նիստը, որուն ընթացքին աւարտեց իր աշխատանքներուն ատենագրութիւնը` զայն ներկայացնելու համար խորհրդարանի նախագահ Նեպիհ Պըրրիի:

Նիստէն ետք ենթայանձնախումբի նախագահ, երեսփոխան Ռոպեր Ղանեմ յայտնեց, որ խորհրդարանական ենթայանձնախումբը յայտնեց, որ ենթայանձնախումբին աշխատանքային օրակարգը կը բաղկանայ երեք կէտերէ, որոնք բաժնուած են երկու հանգրուանի:

Առաջին հանգրուանին պէտք էր քննարկել հիմնական երկու կէտ` ընտրական օրինագիծերու եւ առաջարկներու քննարկում, ինչպէս նաեւ երեսփոխաններու թիւի քննարկում, իսկ երկրորդ հանգրուանին պիտի քննարկուին քաղաքական բոլոր ուժերուն միջեւ հասարակ յայտարարները:

«Այսօրուան նիստին ընթացքին ենթայանձնախումբը աւարտեց առաջին հանգրուանին յատկացուցած իր քննարկումներուն ատենագրութիւնը, որ պիտի փոխանցուի խորհրդարանի նախագահ Նեպիհ Պըրրիի, իսկ այսօր կէսօրէ առաջ ժամը 11:00-ին, ենթայանձնախումբը պիտի վերսկսի իր նիստերուն, որոնց ընթացքին պիտի սկսին երկրորդ հանգրուանի քննարկումները», ըսաւ Ղանեմ:

  Հանրապետութեան նախարար  Միշէլ Սըլէյման  այսօր առաւօտեան Պաապտայի պալատին մէջ  խօսք  մը պիտի արտասանէ   Լիբանանի մօտ  ծառայող օտար դիւանագիտական շրջանակներուն  առջեւ: Կ’ակնկալուի, որ  նախագահ Սըլէյման  մէկէ աւելի պատգամներ յղէ   քաղաքական հոսանքներուն: 

   Միւս կողմէ, Լիբանանի ներքին գործոց նախարար Մարուան Շարպէլ  մեկնեցաւ  Քաթար,  ուր բանակցութիւններ պիտի  վարէ՝  Սուրիոյ մէջ առեւանգուած լիբանանցի  ուխտաւորները ազատ արձակելու  պայմաններուն շուրջ:

 

LEAVE A REPLY

Please enter your comment!
Please enter your name here