ԱՀՄԵՏԻՆԵՃԱՏ՝ ՍՈՒՐԻԱ ՅԱՂԹԱԿԱՆ ԴՈՒՐՍ ՊԻՏԻ ԳԱՅ ԻՐ ՆԵՐԿԱՅԻ ԴԺՈՒԱՐՈՒԹԻՒՆՆԵՐԷՆ

0
114

 Թեհրանի մէջ, Իրանի նախագահ  Մահմուտ Ահմետինեճատ ընդունեց  Սուրիոյ վարչապետ Ուայէլ  Հալքին եւ անոր հետ   քննարկեց  երկու  երկիրները  յուզող հարցեր:   Հանդիպումէն ետք,  Ահմետինեճատ յայտարարեց, թէ Սուրիա յաղթական դուրս պիտի գայ իր  ներկայի  դժուարութիւններէն:

Միւս կողմէ, Իրանի արտաքին գործոց նախարարութեան բանբեր Ռամին Մեհմանփարասթ յայտնեց, որ «Սուրիոյ վարչապետ Ուայէլ Հալքիի Թեհրան այցելութիւնը երկկողմանի յարաբերութեանց զարգացման ծիրին մէջ է»:

Ան շեշտեց, որ «Սուրիոյ ժողովուրդին պահանջները պէտք է հետապնդել երկխօսութեան եւ ժողովուրդին գերիշխանութիւնը յարգելու ճամբով»` նշելով, որ «Սուրիոյ մէջ գործող զինեալ խմբաւորումները այդ երկրին ապահովութիւնն ու կայունութիւնը կը խանգարեն»:

Այլ գետնի վրայ, Միացեալ Նահանգներու արտաքին գործոց նախարարութեան խօսնակ Վիքթորիա Նուլատ յայտարարեց,  որ Ուաշինկթըն յոյս ունի, որ պիտի յաջողի սուրիական ճգնաժամի յաղթահարման հարցին մէջ համաձայնութեան գալ Ռուսիոյ հետ:

Նշենք, թէ  անցեալ Շաբաթ Ժընեւի մէջ տեղի ունեցած էր Միացեալ Նահանգներու արտաքին գործոց նախարարի տեղակալ Ուիլիըմ Պըրնզի, Ռուսիոյ արտաքին գործոց փոխնախարար Միխայիլ Պոկտանովի եւ Սուրիոյ հարցով ՄԱԿ-ի ու Արաբական Լիկայի յատուկ պատուիրակ Լախտար Իպրապիմիի միջեւ եռակողմ հանդիպում մը:

«Մենք կը կարծենք, որ պէտք է շարունակել հանդիպումները ռուսերուն հետ, նախ` Իպրահիմիի ծրագիրին աջակցելու համար, ինչպէս նաեւ յոյս ունենալով, որ յառաջ շարժելու հարցին մէջ որոշում պիտի տրուի: Մենք յոյս ունինք, որ պիտի կարենանք մեր դիրքորոշումները համաձայնեցնել ապագային առնչուող քայլերուն հետ եւ դրական փոխադարձ գործակցութիւն պիտի ունենանք հետագայ քայլերունուն մէջ», նշեց  Նուլանտ` աւելցնելով, որ համաձայնութիւնը  ժամանակի  կը կարօտի:

Արեւմտեան դիւանագիտական աղբիւրներ «Հայաթ» օրաթերթին յայտնեցին, որ ՄԱԿ-ի մնայուն հինգ անդամ երկիրներու ներկայացուցիչները 25 եւ 26 Յունուարին Ապահովութեան Խորհուրդին Իպրահիմիի  զեկուցումին ներկայացման ծիրին մէջ հանդիպում պիտի ունենան:

 

LEAVE A REPLY

Please enter your comment!
Please enter your name here