ՊԸՐՐԻ ՄԻԱՑՆՈՂ ԿԷՏԵՐ ԿԸ ՓՆՏՌԷ ՆԵՐԿԱՅԱՑՈՒԱԾ ՕՐԻՆԱԳԻԾԵՐՈՒՆ ՄԻՋԵՒ

0
122

Խորհրդարանի նախագահ Նեպիհ Պըրրի  յայտնեց, թէ  ընտրական նոր  օրինագիծը  քննարկող  խորհրդարանական    յանձնախումբին  գումարած  նիստերուն ատենագրութիւնը ստանելէ ետք,  խորհրդակցութիւններ պիտի  սկսի  ունենալ քաղաքական խմբաւորումներու ներկայացուցիչներու  հետ: Քուլիսներու ետին կը  խօսուի մեծամասնական եւ  համամասնական խառն  օրինագիծի մը պատրաստութեան մասին:  Միշէլ Աուն, Սամիր Ժաաժա եւ  Սամի Ճեմայէլ կը յարին Ուղղափառ  Հանդիպումի մշակած  օրինագիծին, Մուսթաքպալ Հոսանքը  կտրականապէս կը մերժէ Ուղղափառ Հանդիպումի  օրինագիծը:

Ընտրական օրէնքը քննարկող խորհրդարանական յանձնախումբը երէկ Երեքշաբթի,   իր աշխատանքներուն ընթացքին քննարկեց Ուղղափառ Հանդիպումին մշակած օրինագիծը, սակայն մեծամասնական դրութեան տարբերակով:

Նիստէն ետք երեսփոխան Ռոպեր Ղանեմ յայտնեց, որ յաջորդ նիստերուն ընթացքին յանձնախումբին կատարելիք քննարկումները պիտի ճշդուին:

Իր կարգին, Ազգային Պայքարի Ճակատ պլոքի երեսփոխան Աքրամ Շեհայէպ առաջարկեց, որ խորհրդարանը բաց ձգէ նիստեր գումարելու առիթը, մինչեւ որ կարելի ըլլայ յանգիլ արդի ընտրական օրէնքի մը, որուն մէջ կը յարգուին Թաէֆի համաձայնագիրին սկզբունքները:

Այս շրջագիծին մէջ, Շեհայէպ առաջարկեց կազմել լիբանանեան ծերակոյտ մը` համայնքային դրութեան հիման վրայ, ընտրել խորհրդարան մը` ոչ համայնքային դրութեան հիման վրայ մշակուած օրէնքով, ինչպէս նաեւ վաւերացնել վարչական ապակեդրոնացումի դրութիւնը:

Փոփոխութիւն եւ Բարեկարգում համախմբումի երեսփոխան Ալէն Աուն յայտնեց, որ տակաւին կարելի է որոշ լուծում մը գտնել եւ նոր օրէնք մը մշակել` կատարելու համար երեսփոխանական ընտրութիւնները:

Փաղանգաւոր կուսակցութեան երեսփոխան Սամի Ճեմայէլ նշեց, որ իրենք առաջարկած են նաեւ Լիբանանը 50 ընտրաշրջանի բաժնող ընտրական օրինագիծ մը եւ զօրակցած են Ուղղափառ Հանդիպումին մշակած օրինագիծին` աւելցնելով, որ իրենք բաց են լսելու եւ քննարկելու բոլոր առաջարկները, սակայն ոչ մէկ կարգախօսի հիման վրայ կ՛ընդունին, որ իրենց ներկայացուցչութիւնը ներկայ կացութիւնը պարզէ:

Մուսթաքպալ Հոսանքի երեսփոխան Ահմէտ Ֆաթֆաթ նշեց, որ համամասնական դրութեան վրայ հիմնուած ընտրական որեւէ օրէնք պատժական բնոյթ կ՛ունենայ եւ անիկա մերժելի է իրենց կողմէ, որովհետեւ որոշ ընտրաշրջաններու մէջ պիտի կատարուին մեծամասնական դրութեամբ ընտրութիւններ, իսկ այլ ընտրաշրջաններու մէջ` համամասնական:

Լիբանանեան Ուժեր կուսակցութեան երեսփոխան Ժորժ Ատուան ընդգծեց, որ եթէ Ուղղափառ հանդիպումի օրինագիծին մասին լուրջ մտավախութիւններ կան, ապա իրենք ներկայ են եւ պատրաստ են քննարկելու այդ մտահոգութիւնները:

«Յանձնախումբը կը գտնուի երկու ընտրանքի դիմաց, կա՛մ այն է, որ պիտի առաջարկուին այլընտրանքներ եւ կա՛մ պիտի կասեցնէ իր աշխատանքը եւ պիտի անցնի խորհրդարանի լիագումար նիստերուն», ըսաւ ան:

Նկատի ունենալով երեսփոխան Աքրամ Շեհայէպի առաջարկը, յանձնախումբը մերժեց զանոնք` նշելով, որ իր աշխատանքն է ընտրական օրէնքի մը յանգիլ:

  Յանձնախումբը այսօր պիտի  շարունակէ իր  խորհրդակցութիւնները:

Լիբանանեան կառավարութիւնը վաղը պիտի գումարէ  ընթացիկ նիստ մը:

 

 

LEAVE A REPLY

Please enter your comment!
Please enter your name here