ՊԱՆ ՔԻ ՄՈՒՆ ԴԱՏԱՊԱՐՏԵՑ ՀԱԼԷՊԻ ՀԱՄԱԼՍԱՐԱՆԻՆ ԴԷՄ ԱՀԱԲԵԿՉՈՒԹԻՒՆԸ

0
181

ՄԱԿ-ի ընդհանուր քարտուղար  Պան Քի Մուն դատապարտեց Հալէպի  համալսարանին դէմ  ահաբեկչութիւնը: Ուաշինկթըն  առայժմ լռութիւն կը պահէ, իսկ միջազգային  բեմի վրայ  Սուրիոյ ընդդիմութեան  զինեալ օժանդակութիւնները  դադրեցնելու  համընդհանուր համաձայնութիւն  մը  սկսած է ձեւաւորուիլ: Ուշ կամ կանուխ,   հակամարտութեան  բոլոր կողմերը  հաւանութիւն պիտի տան  քաղաքական լուծումի ընտրանքին:

 Սուրիոյ արտաքին գործոց նախարարութիւնը ՄԱԿ-ի Ապահովութեան Խորհուրդին եւ ՄԱԿ-ի ընդհանուր քարտուղարին ուղարկեց նամակ մը, դիտել տալով, որ Հալէպի համալսարանին դէմ կատարուած ահաբեկչական արարքին զոհերը ուսանողներ են:

«Հալէպի համալսարանին դէմ կատարուած այս յարձակումը կրթական հաստատութեանց դէմ կատարուած առաջին յարձակումը չէր, որովհետեւ այս ոճրագործները աւելի քան 2362 դպրոց քանդեցին ու անոնց մէջ անմեղ մանուկներ եւ ուսուցիչներ սպաննեցին», նշուած է նամակին մէջ:

Նախարարութիւնը նշեց, որ Ապահովութեան Խորհուրդը մինչեւ հիմա չէ դատապարտած այդ ահաբեկչութիւնը, եւ ընդհանուր առմամբ ՄԱԿ-ի անդամներուն եւ մասնաւորաբար Ապահովութեան Խորհուրդի անդամ երկիրներուն կոչ ուղղեց «դատապարտելու ահաբեկչական այդ ոճիրները, ներառեալ` այս ջարդը, որուն ենթարկուեցան Հալէպի համալսարանի ուսանողները, աշխատակիցները եւ հոն ապաստանած քաղաքացիները, որովհետեւ երկակի չափանիշեր օգտագործող, Սուրիոյ մէջ ահաբեկչութեան զօրակցող եւ այլուր զայն դատապարտող երկիրներու համար  այդ մէկը մերժելու բացարձակապէս որեւէ արդարացում չմնաց»:

«Ռոյթըրզ» լրատու գործակալութիւնը հաղորդեց, որ Հալէպի համալսարանին մէջ 87 զոհ խլած ականահարումէն մէկ օր ետք, երէկ Իտլիպ նահանգին մէջ երեք ականուած ինքնաշարժներու պայթումը խլած է 24 զոհ:

Մոսկուա յայտնեց, թէ Սուրիոյ բանակին դիմաց իրենց կրած պարտութենէն ետք ընդդիմադիրները Հալէպի համալսարանը ականահարած են:

ՍԱՆԱ լրատու գործակալութիւնը հաղորդեց, որ Հալէպի համալսարանին դէմ կատարուած յարձակումէն ետք, սուրիական բանակը Հալէպի մէջ յարձակումներ շղթայազերծած է մասնաւորաբար Պապել Հատիտ եւ Պապել Քասր շրջաններուն դէմ, ինչպէս նաեւ Լերամունի դէմ, ուրկէ, ըստ պետական աղբիւրներու, արձակուած էին Հալէպի համալսարանը հարուածած երկու հրթիռները:

 

LEAVE A REPLY

Please enter your comment!
Please enter your name here