ՊՈՒԹՐՈՍԻ ՕՐԻՆԱԳԻԾԸ ԹԵԹԵՒ ԲԱՐԵՓՈԽՈՒԹԻՒՆՆԵՐՈՒ ԵՆԹԱՐԿԵԼՈՒ ԽՈՐՀՐԴԱԿՑՈՒԹԻՒՆՆԵՐ

0
124

Լիբանանեան կառավարութիւնը այսօր պիտի  գումարէ   ընթացիկ նիստ մը, մինչ  ընտրական  օրինագիծը  քննարկող  յանձնախումբին անդամները  չորսօրեայ   դադար  մը պիտի  ունենան՝  քուլիսային խորհրդակցութիւնները  շարունակելու  նպատակաւ: Ըստ երեւոյթին    ընտրական  նոր  օրինագիծը պիտի  ըլլայ   համեմատական եւ  մեծամասնական  օրինագիծերու խառնուրդ  մը: Հետեւաբար, երկար տարիներ  փոշիներու տակ մնալէ ետք,  նախկին նախարար Ֆուատ Պութրոսի    մշակած  ընտրական օրինագիծը  յանկարծ կը  վերադառնայ քննարկումներու  սեղանին վրայ: Այս ծիրին մէջ խորհրդարանի նախագահ Նեպիհ Պըրրի   հանդիպում մը  պիտի ունենայ  Մուսթաքպալ Հոսանքի նախագահ Ֆուատ Սինիորայի հետ, որուն  պիտի առաջարկէ  Պութրոսի օրինագիծին մէջ նշուած  համեմատական դրութեամբ  ընտրուելիք  77  երեսփոխաններուն  թիւը նուազեցնել 64-ի: Պըրրի  կը մնայ  լաւատես, եւ կը հաւաստէ, թէ  ընտրութիւնները պիտի կայնան   նշուած ժամկէտին:

Ընտրական օրէնքը քննարկող խորհրդարանական յանձնախումբը, որուն մաս կը կազմեն Հայկական երեսփոխանական պլոքի ներկայացուցիչ, երեսփոխան Յակոբ Բագրատունի, Փաղանգաւոր Կուսակցութեան երեսփոխան Սամի Ճեմայէլ, Փոփոխութիւն եւ Բարեկարգում համախմբումի երեսփոխան Ալէն Աուն, Լիբանանեան Ուժեր կուսակցութեան փոխնախագահ, երեսփոխան Ժորժ Ատուան, Հաւատարմութիւն Դիմադրութեան երեսփոխանական պլոքի անդամ Ալի Ֆայիատ, Ազատագրում եւ Բարգաւաճում պլոքի երեսփոխան Ալի Պեզզի, Ազգային Պայքարի Ճակատ պլոքի երեսփոխան Աքրամ Շեհայէպ եւ Մուսթաքպալ Հոսանքի երեսփոխաններ Ահմէտ Ֆաթֆաթ եւ Սերժ Թուրսարգիսեան, երէկ  կէսօրէ առաջ երեսփոխան Ռոպեր Ղանեմի նախագահութեամբ գումարեց  նիստ մը:

Նիստին ընթացքին շարունակուեցան քննարկուիլ առաջարկուած ընտրական օրինագիծերը` համախոհական օրինագիծի մը յանգելու նպատակով:

Նիստէն ետք Ալի Ֆայիատ յայտնեց, որ Հըզպալլա եւ Փոփոխութիւն եւ Բարեկարգում համախմբումը նախկին նախարար Ֆուատ Պութրոսի մշակած օրինագիծին մասին լուրջ դիտողութիւններ ունին, յատկապէս անոր բովանդակած ընտրաշրջաններուն վերաբերեալ:

Երեսփոխան Ալէն Աուն իր կարգին շեշտեց, որ Ուղղափառ Հանդիպումին մշակած օրինագիծին կառչած կը մնան, եւ այդ օրինագիծը արդէն իսկ պիտի հասնի խորհրդարանի լիագումար նիստին:

Երեսփոխան Ատուան շեշտեց, որ կայ օրինագիծ մը, որ արժանացած է խորհրդարանական մեծամասնութեան` անկախ անոր մասին կատարուող մեկնաբանութիւններէն: Հետեւաբար մենք կա՛մ այդ օրէնքին այլընտրանքը կը գտնենք եւ կա՛մ այդ օրինագիծին ի նպաստ կը քուէարկենք:

Երեսփոխան Ճեմայէլ առաջարկեց ժամանակ շահիլ եւ խորհրդարանի միացեալ յանձնախումբերուն նիստերուն վերադառնալ ու խորհրդարանի լիագումար նիստին հասնիլ, որպէսզի ներքին գործոց նախարարը իր կարգին կարենայ երեսփոխանական ընտրութիւնները նախապատրաստել:

Միւս կողմէ, երեսփոխան Ֆաթֆաթ շեշտեց, որ իրենք համաձայն են Ուղղափառ Հանդիպումին մշակած ընտրական օրինագիծին, պայմանաւ որ անիկա գործադրուի մեծամասնական դրութեամբ:

Երեսփոխան Ռոպեր Ղանեմ յայտնեց, որ յանձնախումբը իր կատարած քննարկումներուն ընդմէջէն ցարդ ընտրական վերջնական օրինագիծի մը չէ յանգած: Ան նշեց, որ քննարկումները ընդհանուր բնոյթ ունին եւ անոնք կը վերաբերին ընտրաշրջաններուն, համամասնական թէ մեծամասնական դրութեան եւ այլ հարցերու:

Ղանեմ նշեց, որ յանձնախումբը իր յաջորդ նիստը պիտի գումարէ յառաջիկայ Երկուշաբթի օր:

 Նշենք, թէ վարչապե Նեժիպ Միքաթի Կիրակի օր պիտի  մեկնի Սէուտական Արաբիա, իսկ Ընկերվար Յառաջդիմական Կուսակցութեան պետ Ուալիտ  Ճոմպլաթ, նախքան  Փարիզ մեկնիլը  պիտի  այցելէ Մոսկուա:

 

 

LEAVE A REPLY

Please enter your comment!
Please enter your name here