ԼԻԲԱՆԱՆ ԸՆՏՐԱԿԱՆ ՆՈՐ ՕՐԻՆԱԳԻԾ ՄԸ ԿԸ ՓՆՏՌԷ

0
108

Լիբանանի քաղաքական  հոսանքները կը  շարունակեն բոլորին գոհացնող ընտրական  օրինագիծի մը փնտռտուքը:  Այս  ծիրին մէջ, Մուսթաքպալ հոսանքի  պատուիրակութիւն մը  երէկ այցելեց  մարոնիներու Ռայի  գարտինալին, իսկ այսօր՝ Ուրբաթ, Մուսթաքպալ Հոսանքի նախագահ  Ֆուատ Սինիրա խորհրդակցական հանդիպում մը պիտի ունենայ խորհրդարանի նախագահ Նեպիհ Պըրրիի հետ:  Մարտ 8-ի ուժերը  նոյնպէս կը շարունակեն իրենց խորհրդակցութիւնները:

Կառավարութիւնը երէկ առաւօտեան ժամը 10:30-ին Պաապտայի մէջ գումարեց իր ընթացիկ նիստը` նախագահութեամբ հանրապետութեան նախագահ, զօր. Միշէլ Սըլէյմանի եւ ներկայութեամբ վարչապետ Նեժիպ Միքաթիի:

Նիստին սկիզբը նախագահ Սըլէյման անդրադարձաւ ընտրական նոր օրէնք մը մշակելու առաքելութեան եւ մաղթեց, որ նախարարները ընտրական այլ օրէնքներու ջատագովն ու զօրակցող կողմը չդառնան, այլեւ` կառչած մնան կառավարութեան վաւերացուցած ընտրական օրինագիծին, որ հիմնուած է համամասնական դրութեան վրայ եւ Լիբանանը կը բաժնէ 13 ընտրաշրջանի:

Այս ծիրին մէջ նախագահ Սըլէյման շեշտեց, որ ինք արդէն իսկ հրապարակած է խորհրդարանի արտահերթ նստաշրջանը հրաւիրելու վերաբերեալ շրջաբերական մը:

Կառավարութիւնը որոշեց   600  միլիոն լիբանանեան ոսկիի գումար մը  փոխանցել ներքին գործոց նախարարութեան ` երեսփոխանական ընտրութիւններուն իբրեւ նախապատրաստութիւն:

Կառավարութիւնը իր յաջորդ նիստը պիտի գումարէ յառաջիկայ Երեքշաբթի, 22 Յունուարին:

 Նախագահ  Միշէլ Սըլէյման այսօր այցելութիւն  մը պիտի տայ հարաւային  Լիբանան: Հանրապետութեան  նախագահը վաղը  պիտի  մեկնի Մոսկուա:

 Խորհրդարանի նախագահ  Նեպիհ  Պըրրի հարց տուաւ, թէ ինչո՞ւ այդքան ցեխարձակումի ենթարկել Ուղղափառ Հանդիպումին մշակած ընտրական օրինագիծը, երբ Լիբանան իր ամբողջ պատմութեան ընթացքին ընտրական ազգային օրէնք մը չէ մշակած:

Խորհրդարանի նախագահը յայտնեց, որ ինք 1960-ի ընտրական օրէնքին համաձայն չէ եղած, սակայն երբ անոր շուրջ միջքրիստոնէական համախոհութիւն գոյացած է, ապա ինք այդ օրէնքին դէմ չէ եղած: «Նոյն ձեւով ալ Ուղղափառ Հանդիպումին մշակած օրինագիծին դէմ չեմ եւ համաձայն եմ այն օրէնքին, որուն շուրջ միջքրիստոնէական համախոհութիւն կը գոյանայ: Իսկ ընտրական համախոհական օրէնք մը գոյացնելու ճիգերը պիտի շարունակեմ մինչեւ վերջին վայրկեան», շեշտեց ան:

 

LEAVE A REPLY

Please enter your comment!
Please enter your name here