Վրաստանի Վարչապետը Կը Խոստանայ Բարելաւել Հայաստանի Հետ Յարաբերութիւնները

0
129

Վրաստանի վարչապետ Պիձինա Իվանիշվիլի պաշտօնական այցելեց Հայաստան, ուր հանդիպումներ ունեցաւ Հայաստանի նախագահին, վարչապետին, Ամենայն Հայոց Գարեգին Բ. կաթողիկոսի հետ, ինչպէս նաեւ տուաւ մամլոյ ասուլիս մը։ Տեսակցութիւններուն ընթացքին քննարկումի նիւթ հանդիսացան հայ–վրացական յարաբերութիւնները, վրացահայ համայնքն ու անոր կարիքները։
Հայաստանի նախագահ Սերժ Սարգսեան շնորհաւորեց վարչապետ Իվանիշվիլին՝ Վրաստանի խորհրդարանական ընտրութիւններուն իր ղեկավարած համախոհական ցանկին արձանագրած յաղթանակին համար՝ յոյս յայտնելով, որ Վրաստանի նոր կառավարութիւնը պատիւով կը կատարէ ստանձնած պարտականութիւնները:

Ապա Վրաստանի վարչապետը այցելեց Ամենայն Հայոց Գարեգին Բ. կաթողիկոսին, որ գոհունակութեամբ արտայայտուեցաւ երկու երկիրներու յարաբերութիւններուն ներկայ վիճակին մասին՝ վստահութիւն յայտնելով, որ վարչապետին Հայաստան տուած այս այցելութիւնը նոր խթան պիտի հանդիսանայ միջպետական համագործակցութեան զարգացման:
Զրոյցի ընթացքին Նորին Սրբութիւնը յատուկ կերպով անդրադարձաւ Վրաստանի մէջ հայկական պատմական սրբավայրերու պատշաճ պահպանման ու վերականգնման, ինչպէս նաեւ հայ համայնքի հոգեւոր կարիքներու բաւարարման համար անհրաժեշտ կարգ մը հայկական եկեղեցիներ Վիրահայոց թեմին վերադարձնելու հարցին: Ամենայն Հայոց կաթողիկոսը յոյս յայտնեց, որ վրացական պետութիւնը անհրաժեշտ քայլերը կ՛առնէ՝ յիշեալ խնդիրները ըստ արժանւոյն լուծելու գծով։
Վիրահայոց համայնքին անունով կաթողիկոսը խնդրանքով դիմեց Իվանիշվիլիին, որպէսզի Վրաստանի հայկական դպրոցներուն մէջ դասաւանդուի «Հայ ժողովուրդի պատմութիւն» առարկան: Վեհափառ Հայրապետը նաեւ միջնորդութիւն կատարեց՝ Վահագն Չախալեանի ազատ արձակման համար:
Վրաստանի վարչապետը անդրադարձաւ Ամենայն Հայոց կաթողիկոսին կողմէ առաջադրուած խնդիրներուն՝ տեղեկացնելով, որ անձնապէս յանձն պիտի առնէ եկեղեցիներու նորոգութիւնը, եւ անմիջապէս անհրաժեշտ բոլոր քայլերը պիտի առնուին հայկական եկեղեցիներու պահպանութեան ուղղութեամբ: Իվանիշվիլին նաեւ յանձնարարական տուաւ՝ «Հայ ժողովուրդի պատմութիւն» առարկայի դասաւանդումը հայկական դպրոցներուն մէջ կազմակերպելու համար, իսկ Վ. Չախալեանի առնչութեամբ յայտնեց, որ խնդիրը քննարկման հանգրուանի մէջ է:

LEAVE A REPLY

Please enter your comment!
Please enter your name here