ՀՐԱՆԴ ՏԻՆՔ՝ ԹՐՔԱԿԱՆ ՀԱՄԱԿԱՐԳԻՆ ՆԱՀԱՏԱԿԸ

0
170

   Վեց տարի առաջ այսօր՝  Գորշ Գայլերու    ժառանգորդ մը, Պոլսոյ մէջ զգետնեց ժողովուրդներու   բարեկամութեան ջատագով, հանարածանօթ մտաւորական, Ակօս  թերթի գլխաւոր խմբագիր Հրանդ Տինքը: Ոճիրին  դրդապատճառները   յստակ էին.  Հրանդ Տինք՝  թուրք  հանրային կարծիքին  կը ներշնչէր  անցեալը  ճանչնալու եւ զայն  սրբագրելու յանդգնութիւն: Հրանդ  Տինք կ’անտեսէր իրեն յղուած սպառնալիքները,  հաստատ կը մնար իր համոզումներուն վրայ:  Հրանդ Տինք համարձակօրէն կը շեշտէր  մարդու իրաւունքներու պաշտպանութեան, կարծիքի ազատութեան եւ ժողովրդավար  Թուրքիա   կերտելու անհրաժեշտութիւնը:  

 Վեց տարիներ անցած են  Տինքի եղերական սպանութենէն: Եթէ այսօր  Հրանդ Տինք  հրաշքով մը  վերանար  իր  շիրիմէն ու  հարցնէր , թէ ին՞չ  փոխուած է  Թուրքիոյ մէջ  անցնող վեց տարիներուն՝  շատ հաւանաբար, ականատեսի աչքերով   նոր յուսախաբութիւն մը ապրէր ան, երբ  նշմարէր, թէ  երկնային  լազուրի նման   ջինջ ու  անեղծ անոր գաղափարները  ծիլեր չեն արձակած տակաւին,   հանրային կարծիքին  ու   ընդհանրապէս արդարութեան առջեւ  քօղի տակ  ծածկուած կը մնան  անոր սպանութեան  յանցագործները: Թուրքիա կը մնայ  կարծիքի ազատութեան արգելարան  ինչպէս՝ երէկ: Թուրքիա կը շարունակէ  ոտնակոխել  իր սահմաններուն մէջ ապրող  փոքրամասնութիւններուն  իրաւունքները:  Թուրքիա կը շարունակէ ուրանալ իր անցեալը, հայ ժողովուրդին  դէմ  կազմակերպած ու գործադրած Ցեղասպանութիւնը: Ժամանակի սլաքները դէպի առջեւ կ’ընթանան, բայց  Թուրքիոյ   պետականութիւնը  կը մերժէ քայլ  պահել  նոր  ժամանակներու հետ, որովհետեւ  թուրքը կը մնայ թուրք:  Բնազդն ու  ինքնութիւնը անոր  կ’արգիլեն  շաղուիլ այլ  ժողովուրդներու հետ:  Այո,  թուրքը պիտի  մնայ թուրք, մինչեւ որ  ան հաշտուի  իր անցեալին հետ  եւ խոստովանի իր  դրացիներուն  պատճառած  Ցաւը:

 Եղերաբախտ Հրանդ Տինքի    նահատակութենէն վեց տարի ետք,  հարց կու տանք  թրքական իշխանութիւններուն. Ո՞վ սպաննեց Հրանդ  Տինքը,  եթէ ոչ՝  համակարգը…: Հրանդ  Տինքի դէմ ոճիրը պիտի  մնայ   թրքական  համակարգին  անհանդուրժողութեան արտայայտութիւնը. այս է  ճշմարտութիւնը:

Ահարոն  Շխրտըմեան

LEAVE A REPLY

Please enter your comment!
Please enter your name here