ԽՈՐՀՐԴԱՐԱՆԱԿԱՆ ՅԱՆՁՆԱԽՈՒՄԲԸ ԱՅՍՕՐ ՊԻՏԻ ԳՈՒՄԱՐԷ ԿԱՐԵՒՈՐ ՆԻՍՏ ՄԸ

0
150

Ընտրական օրէնքը քննարկող խորհրդարանական յանձնախումբը, որուն մաս կը կազմեն Հայկական երեսփոխանական պլոքի ներկայացուցիչ, երեսփոխան Յակոբ Բագրատունի, Փաղանգաւոր կուսակցութեան երեսփոխան Սամի Ճեմայէլ, Փոփոխութիւն եւ Բարեկարգում համախմբումի երեսփոխան ԱլԷն Աուն, Լիբանանեան ուժեր կուսակցութեան փոխնախագահ, երեսփոխան Ժորժ Ատուան, Հաւատարմութիւն դիմադրութեան երեսփոխանական պլոքի անդամ Ալի Ֆայիատ, Ազատագրում եւ բարգաւաճում պլոքի երեսփոխան Ալի Պեզզի, Ազգային պայքարի ճակատ պլոքի երեսփոխան Աքրամ Շեհայեպ եւ Մուսթաքպալ Հոսանքի երեսփոխաններ Ահմէտ Ֆաթֆաթ եւ Սերժ Թուրսարգիսեան, երէկ կէսօրէ առաջ վերադարձաւ խորհրդարան, ուր անիկա  երեսփոխան Ռոպեր Ղանեմի նախագահութեամբ գումարեց իր նիստը:

Նիստին ընթացքին երեսփոխանները իրենց տեսակէտը ներկայացուցին մեծամասնական եւ համամասնական դրութիւնները միաձուլող ընտրական խառն օրինագիծին մասին:

Երէկուան նիստին ընթացքին յստակ դարձաւ, որ յաձնախումբին մաս կազմող քաղաքական ուժերը բաւական տարակարծիք են:

Նիստէն ետք Ղանեմ նշեց, որ իրենց նպատակն է հասարակ յայտարարներ գտնել` աւելցնելով, որ իրենք կը փափաքին ընտրական օրէնքի միացեալ ենթահող մը գտնել եւ բոլոր համայնքներուն համար արդար օրէնք մը մշակել:

Ղանեմ ըսաւ, որ քրիստոնեայ համայնքը իր իրաւունքները կը պահանջէ, սակայն այլոց իրաւունքներուն վնաս չ՛ուզեր հասցնել:

Իր կարգին, Աքրամ Շեհայեպ հաստատեց, որ ենթայանձնախումբին անդամներուն մօտ խոր տարակարծութիւն կայ, որովհետեւ քաղաքական ոչ մէկ ուժ պատրաստակամ  է երկիրը այլ ուժի վստահելու:

Յանձնախումբի աշխատանքին մասին ժխտական կեցուածքներ արտայայտեցին նաեւ կարգ մը այլ երեսփոխաններ, որոնց շարքին` Ահմէտ Ֆաթֆաթ, Ժորժ Ատուան, Ալeն Աուն եւ Ալի Ֆայիատ:

Խառն ընտրական օրինագիծին դէմ արտայայտուեցաւ Մուսթաքպալ Հոսանքին ներկայացուցիչը, որուն զօրակցեցան Փաղանգաւոր եւ Ընկերվար Յառաջդիմական կուսակցութիւններուն ներկայացուցիչները:

Երեսփոխան Ահմէտ Ֆաթֆաթ յայտնեց, որ իրենք կը մերժեն համամասնական դրութեան վրայ հիմնուած որեւէ ընտրական օրինագիծ եւ համամիտ են մեծամասնական դրութեան:

Ֆաթֆաթ ներկայացուց նաեւ այլ առաջարկ մը, որուն հիման վրայ Լիբանանը կը բաժնուի 128 ընտրաշրջանի եւ իւրաքանչիւր ընտրաշրջանի պարագային կ՛ընտրուի մէկ երեսփոխան: Ան նշեց, որ այդ առաջարկը Հըզպալլայի կողմէ ուղղակի վեթոյի ենթարկուած է:

Ալի Ֆայիատ աւելի ուշ յայտնեց, որ պէտք է վերջ տալ տեսութիւններուն` աւելցնելով, որ քաղաքական որոշ կողմեր տիւ ու գիշեր կը հարուածեն համամասնական դրութիւնը, իսկ այդ մէկը կատարող կողմերը կը վախնան, որ իրենց իսկական ներկայացուցչութիւնը երեւան գայ, եթէ երբեք համամասնական դրութիւնը որդեգրուի:

Երեսփոխան Ալէն Աուն իր կարգին «գուժեց» խառն ընտրական օրինագիծին մահը` աւելցնելով, որ, ըստ երեւոյթին, միակ լուծումը Ուղղափառ հանդիպումին մշակած օրինագիծն է:

Երեսփոխան Ժորժ Ատուան նշեց, որ ենթայանձնախումբին քննարկումները ողջունելի են, եւ պէտք է որոշել ընտրական այն օրինագիծը, որ ճշգրիտ ներկայացուցչութիւն կ՛ապահովէ:

Ալի Պեզզի իր կատարած յայտարարութեան մէջ շեշտեց, որ յանձնախումբին նիստը եղած է բաւական լուրջ եւ բոլոր կողմերը յանձնառութիւն ցուցաբերած են երեկոյեան նիստերուն ընթացքին այդ քննարկումները շարունակելու:

LEAVE A REPLY

Please enter your comment!
Please enter your name here