Քիւրտ Եւ Արմատական Զինեալներու Միջեւ Բախումները Առնուազն 56 Զոհ Կը Խլեն Սուրիոյ Մէջ

0
139

 Քիւրտ զինեալներու եւ ծայրայեղ իսլամական «Ճապհաթ Նուսրա» խմբաւորման միջեւ՝ Թուրքիա-Սուրիա սահմանագիծէն հինգ քիլօմեթր հեռաւորութեան վրայ գտնուող Ռասուլ Այն քաղաքին մէջ բուռն մարտերը շարունակուած են՝ պատճառելով առնուազն 56 զոհ:
Քրտական Ազգային Խորհուրդի յայտարարութեան մէջ կ՛ընդգծուի, որ սուրիական ազատ բանակին կողքին կռուող «վարձկանները գործիք դարձած են Թուրքիոյ համար, որ սուրիական տագնապին մէջ իր սեփական շահերը կը հետապնդէ»:
Նաեւ, Համայի մօտերը, Երկուշաբթիէն Երեքշաբթի լուսցող գիշերուան ընթացքին տեղի ունեցած պայթումի մը հետեւանքով սպաննուած է 42 հոգի: Յարձակումին թիրախը կառավարութեան համակիր զինեալ խմբաւորումի մը մէկ կեդրոնն էր:
Մինչ այդ, Սուրիոյ արտաքին գործոց նախարար Ուալիտ Մոալլէմ սուրիական ընդդիմութեան կոչ ըրաւ վար դնելու զէնքերը եւ բանակցութեան սեղանի շուրջ նստելու, որպէսզի կարելի ըլլայ նոր կառավարութիւն մը ձեւաւորելը: Ան ըսաւ, որ որեւէ ընդդիմադիր խումբ կրնայ ներառուիլ ազգային միասնութեան կառավարութեան կազմին մէջ, եթէ մասնակցի բանակցային հոլովոյթին՝ շեշտելով սակայն, որ ոեւէ մէկը իրաւասու չէ քննարկելու նախագահ Պաշար Ասատի դիրքը: Ան նաեւ ըսաւ, որ Սուրիոյ հարցով ՄԱԿ-ի եւ Արաբական Լիկայի յատուկ պատուիրակ Լախտար Իպրահիմի, անցեալ Դեկտեմբերին Դամասկոս կատարած այցելութեան ընթացքին «դուրս եկաւ իր լիազօրութեան սահմաններէն եւ բռնեց այնպիսի դիրքորոշում մը, որ մօտ է հակասուրիական դաւադրութեան մասնակիցներուն՝ Միացեալ Նահանգներու եւ Արաբական ծոցի միապետներու դիրքորոշման»:
Ընդդիմութիւնը աւելի ուշ յայտարարեց, որ պատրաստ չէ Մոալլէմի հետ բանակցելու:
Միւս կողմէ, Ֆրանսայի արտաքին գործոց նախարար Լորան Ֆապիւս յայտարարեց, որ Սուրիոյ ընդդիմադիր ուժերու ղեկավարները Յունուար 28-ին հանդիպում մը պիտի ունենան Փարիզի մէջ, քննելու համար սուրիական ներքաղաքական ճգնաժամը: Սուրիական ընդդիմութեան ներկայացուցիչներու Պոլսոյ մէջ անցած շաբաթավերջին կայացած ժողովը որոշած էր Սուրիոյ փոխանցման կառավարութեան կազմութիւնը յետաձգել:
Վերջապէս, Երեքշաբթի օր մօտաւորապէս 80 ռուս քաղաքացիներ, Մասնաա կոչուած Սուրիա-Լիբանան սահմանագիծէն Լիբանան ժամանած են՝ օդանաւերով Ռուսիա փոխադրուելու համար:

 

LEAVE A REPLY

Please enter your comment!
Please enter your name here