ԸՆՏՐՈՒԹԻՒՆՆԵՐՈՒ ՃԱԿԱՏԱԳԻՐԸ ԱՆՈՐՈՇՈՒԹԵԱՆ ՄԷՋ

0
150

Լիբանանի  մէջ, ընտրական նոր օրինագիծ  քննարկող խորհրդարանական յանձնախումբը երէկ երեկոյեան ժամը 6:00-ին գումարած իր 18-րդ  նիստը աւարտեց բանավէճով մը, որ սկսաւ երեսփոխաններ Ալէն Աունի ու Ահմէտ Ֆաթֆաթի միջեւ եւ շարունակուեցաւ Ալի Ֆայեատի ու Ահմետ Ֆաթֆաթի միջեւ բանավէճով:

Ալի Ֆայիատ յայտնեց, որ Մուսթաքպալ հոսանքն էր, որ ենթայանձնախումբին գումարած գրեթէ բոլոր նիստերուն ընթացքին կը խոչընդոտէր յանձնախումբին աշխատանքը եւ վեթոյի կ՛ենթարկէր ընտրական օրէնքի բոլոր տարբերակները:

Երեսփոխաններ Ալի Ֆայիատ եւ Ալէն Աուն յայտնեցին, որ այս բանավէճին ենթահողը կը կազմէ այն իրականութիւնը, որ խորհրդարանի նախագահ Նեպիհ Պըրրիի կողմէ ներկայացուած է ընտրական օրինագիծ մը, որուն համաձայն 64 երեսփոխաններ կ՛ընտրուին համամասնական դրութեամբ, իսկ միւս 64-ը` մեծամասնական դրութեամբ:

Յանձնախումբի նախագահ Ռոպեր Ղանեմ նիստին աւարտին յայտնեց, որ ընտրական յանձնախումբին գումարած 18 նիստերէն ետք ան իր տեղեկագիրը` տարակարծութիւններով եւ հասարակ յայտարարներով միասին, պիտի փոխանցէ խորհրդարանի նախագահին, որ իր կարգին այդ տեղեկագիրը պիտի փոխանցէ խորհրդարանի միացեալ յանձնախումբերուն:

Ան ըսաւ, որ յանձնախումբը իր յաջորդ նիստը պիտի գումարէ յառաջիկայ Երեքշաբթի օր` վաւերացնելու համար իր ատենագրութիւնը:

Երեսփոխան Ալէն Աուն յայտնեց, որ եթէ միացեալ յանձնախումբերու նիստ մը չգումարուի եւ յանձնախումբին անդամներուն մեծամասնութեան քուէները ստացած Ուղղափառ Հանդիպումին մշակած օրինագիծը չքննարկուի, ապա երկիրը պիտի ուղղուի դէպի բաց տագնապ, որ կրնայ ընտրական օրինագիծով սկսիլ, սակայն ոչ ոք կրնայ գիտնալ, թէ ան ինչպէ՛ս կ՛աւարտի:

Աուն շեշտեց, որ այս հարցով պէտք է լիբանանցիներուն հետ անկեղծ ըլլալ, որովհետեւ 1960-ի ընտրական օրէնքին հիման վրայ երեսփոխանական ընտրութիւններ պիտի չկատարուին:

Երեսփոխան Ֆաթֆաթ իր կարգին յայտնեց, որ Ալէն Աունն է, որ երկու օրէ ի վեր կը մերժէ իր տեսակէտը ներկայացնել քննարկուած օրինագիծերուն առնչութեամբ եւ կը մերժէ գոյացած համախոհութիւնը:

Ֆաթֆաթի այս յայտարարութիւնը մղեց Աունը հարց տալու Ֆաթֆաթի, թէ ի՞նչ համախոհութեան մասին է խօսքը, եւ Ֆաթֆաթի հաստատումներուն վրայ ստիպուեցաւ զայն ստախօս կոչել, ինչ որ պատճառ դարձաւ սուր բանավէճի:

Ալի Ֆայիատ շեշտեց, որ ցարդ ներկայացուած օրինագիծերէն ամէնէն աւելի համախոհականը Պըրրիի ներկայացուցած տարբերակն է:

Միւս կողմէ, Պըրրիի հետ Չորեքշաբթի օրուան խորհրդարանական հանդիպումին ներկայ երեսփոխաններ յայտնեցին, որ Պըրրի շեշտած է ընտրական համախոհական օրինագիծի մը շուրջ համախոհութիւն գոյացնելու անհրաժեշտութիւնը եւ ընդգծած երեսփոխանական ընտրութիւնները ճշդուած թուականին կատարելու կարեւորութիւնը:

 

 

LEAVE A REPLY

Please enter your comment!
Please enter your name here