«Մեր Եւրոպական Համարկումը Որեւէ Ձեւով Հակասութեան Մէջ Չէ Եւրասիական Համարկումին Հետ» Կ՛ըսէ Նախագահ Սերժ Սարգսեան

0
116

Հայաստանի նախագահ Սերժ Սարգսեան ծաւալուն հարցազրոյց մը տուած է «Անդին» հանդէսին: Պատասխանելով այն հարցումին, թէ, մեկնելով Հայաստանի շահերէն, ո՞րն է Հայաստանի ճամբան` Եւրասիա՞, թէ՞ Եւրոպա, հանրապետութեան նախագահը յայտնած է, որ Հայաստանի շահը կը պահանջէ բոլորէն սորվիլ եւ ընտրել լաւագոյնը, որ անհրաժեշտ է Հայաստանի համար: Նախագահը նշած է, որ «Պաղ պատերազմի ժամանակներուն «խրամատային» հոգեբանութիւնը եւ տրամաբանութիւնը այսօր հինցած են: «Եւրասիա՞, թէ՞ Եւրոպա» հակադրութիւնը արհեստական է: Մենք Հաւաքական անվտանգութեան պայմանագիրի կազմակերպութեան մաս կը կազմենք, մենք մեզ կը նկատենք Ռուսիոյ յուսալի եւ հաւատարիմ դաշնակիցը թէ՛ զինուորական, թէ՛ միւս առումներով: Չեմ կարծեր, որ Հայաստանի մէջ գտնուի որեւէ լուրջ քաղաքական գործիչ, որ փորձէ հակառակը ըսել»:

Նախագահ Սարգսեան նշած է, որ ոչ ոք Հայաստանին կը խանգարէ ընդունիլ եւրոպական կառոյցներուն առաջարկները, եթէ անոնք կը բխին Հայաստանի շահերէն: Ըստ նախագահին,  հայերը իրենց հագուստ-կապուստէն մինչեւ կենցաղ, քրիստոնէական ակունքներ ունեցող բազմաշերտ մշակոյթէն մինչեւ ներկայ քաղաքական համակարգ եւրոպացիներ են:

Հայաստանի նախագահը ընդգծած է, որ Չինաստանի, Ռուսիոյ կամ Միացեալ Նահանգներու քաղաքական տարբերակները չեն կրնար Հայաստանի համար կիրարկելի օրինակներ դառնալ: Փոխարէնը, ըստ նախագահին, Հայաստանի աւելի մօտ են Եւրոպայի փոքր ազգ-պետութիւններու բնորդները: «Յատկապէս մեզի համար կրնան օրինակ դառնալ անոնք, որոնք յաջողած են կառուցել ազատ եւ բարեկեցիկ հասարակութիւններ: Մեր եւրոպական համարկումը որեւէ ձեւով հակասութեան մէջ չէ եւրասիական համարկումին հետ: Ճիշդ հակառակը` անոնք կը փոխլրացնեն զիրար»:

LEAVE A REPLY

Please enter your comment!
Please enter your name here