Ռաֆֆի Յովհաննէսեան Ուղղակի Կապ Կը Հաստատէ Ժողովուրդին Հետ

0
112

 Նախընտրական քարոզարշաւի ծիրին մէջ Երեւանի Էրեբունի վարչական շրջանին մէջ Հայաստանի նախագահական թեկնածու, Ժառանգութիւն կուսակցութեան առաջնորդ Ռաֆֆի Յովհաննէսեան որոշած է իւրայատուկ կերպով յիշուիլ վարսայարդարման սրահներէն մէկուն մէջ, ուր մտած եւ մազերը յարդարած է՝ վարսայարդար Արշակի մօտ:
Ի պատասխան լրագրողներուն այն հարցումին, թէ ան ինչո՞ւ այդ ձեւը ընտրած է՝ Յովհաննէսեան պատասխանած է . «Սա իմ անձնական մօտեցումն է նախընտրական քարոզարշաւին եւ իւրաքանչիւր քաղաքացու: Ցանկացած նախընտրական ծրագիր այդպէս էլ թղթի վրայ կը մնայ, եթէ Հայաստանի իւրաքանչիւր քաղաքացի իրեն իր երկրի մասնիկը չզգայ: Ես նախընտրական քարոզարշաւի ընթացքում ցանկանում եմ շփուել իմ համաքաղաքացիների հետ, իմանալ նրանց անհանգստացնող խնդիրների մասին, որպէսզի այս ընտրութիւններից յետոյ փոխուի նրանց կեանքը: Ես մարդկանց կոչ չեմ անում քուէարկել իմ օգտին, ես կոչ եմ անում քուէարկութեան օրը գնալ եւ քուէարկել»:
Ան նաեւ նշած է, որ նախընտրական քարոզարշաւի ընթացքին ան պիտի չներկայացնէ նախընտրական ծրագիր, այդ մէկը պիտի ընեն գործիչները, իսկ ինք կը նախընտրէ ուղղակի կապ հաստատել ժողովուրդին հետ։
Շարունակելով իր արշաւը՝ Ռաֆֆի Յովհաննէսեան հանրային վայրերու, տօնավաճառներու, ատամնաբուժարաններու մէջ հանդիպած է մարդոց, մօտեցած է անոնց ու զրուցած անոնց հետ։
Ան հիմնականօրէն  առողջութիւն մաղթած է իր հաւանական ընտրողներուն՝ կոչ ուղղելով ընտրութեան օրը մասնակցիլ քուէարկութեան, անկախ անկէ, թէ որո՛ւ պիտի ընտրեն: Նախընտրական քարոզչութեան ընթացքին Յովհաննէսեան նաեւ հետաքրքրուած է շուկայի եւ փոքր խանութներու առեւտուրով եւ հարցուցած է, թէ արդեօք հարկային ծառայութիւնները ծանր չե՞ն, առեւտրականները պատասխանած են, որ գնողներուն թիւը հետզհետէ կը նուազի, քանի որ մարդիկ կը նախընտրեն օգտուիլ հանրային խանութներէն: Անոնք յայտնած են, որ հարկայինի առնչուած խնդիրներ չկան, այդ առումով իրենց ոչ ոք կը ճնշէ:
Իրենց հերթին առեւտրային հատուածի ներկայացուցիչները Յովհաննէսեանին հարց տուած են, որ եթէ ինք ընտրուի, հարկային ի՞նչ արտօնութիւններ պիտի տայ։ «Պետական բիւջէի բոլոր աւելորդ ծախսերը կը կրճատուեն,  տնտեսութեան 40 տոկոս կազմող ստուերային հատուածը հարկատու կը դառնայ, եւ այդ փողերը կը վերադարձուեն ժողովրդին՝ կենսաթոշակի եւ աշխատավարձի տեսքով: Բացի դրանից, փոքր բիզնեսը երկու-երեք տարով կ՛ազատուի հարկերից», յայտնած է նախագահական թեկնածուն։

 

LEAVE A REPLY

Please enter your comment!
Please enter your name here