ՌՈՒՍԻԱ ՎՃՌԱԿԱՆ ԿԸ ՄՆԱՅ ԱՐՑԱԽԻ ՀԱՐՑՈՎ

0
117

 Ռուսիա, ԵԱՀԿ  Մինսքի խմբակի համանախագահ միւս երկիրներուն հետ միատեղ, պիտի շարունակէ ջանքերը, Լեռնային Ղարաբաղի հակամարտութեան լուծում մը գտնելու նպատակով. Մոսկուայի մէջ տեղի ունեցած զրոյցի մը ընթացքին, այսպէս յայտարարած է Ռուսիոյ արտաքին գործոց նախարար Սերկէյ Լաւրով: «Եթէ մենք կը փափաքինք հարցին տալ գործնական լուծում, ապա անհրաժեշտ է գործել իբրեւ ԵԱՀԿ Մինսքի խմբակի համանախագահներ», ըսած է ան:
Ըստ Լաւրովի՝ արդէն քանի մը տարի է, որ համանախագահները կը փորձեն հակամարտութեան կարգաւորման շուրջ համաձայնագիր մը պատրաստել, սակայն կողմերը ցարդ չեն համաձայնած կարգաւորման վերջնական փաստաթուղթի կէտերուն շուրջ:
«2010-ի Մայիսին, Մեծ Ութեակի գագաթնաժողովին ընթացքին, Ռուսիոյ, Միացեալ Նահանգներու եւ Ֆրանսայի նախագահները հանդէս եկան համատեղ յայտարարութեամբ մը՝ կոչ ընելով Պաքուին եւ Երեւանին հաւանութիւն տալու հակամարտութեան կարգաւորման փաստաթուղթին, սակայն Քազանի մէջ, հակամարտող կողմերու նախագահներուն հանդիպման ժամանակ, փաստաթուղթը չհաստատուեցաւ», յիշեցուցած է Լաւրով:
Ըստ անոր՝ երկու կողմերու արտաքին գործոց նախարարները հակամարտութեան ներկայ հանգրուանին կը շարունակեն հանդիպումներ ունենալ՝ փորձելով դիրքերը իրարու միացնել:
Ան նաեւ յիշեցուցած է, որ համանախագահները հակամարտութեան կարգաւորման առնչութեամբ կողմերուն առաջարկած են նաեւ փաստաթուղթին կրճատուած տարբերակը, սակայն այդ մէկը եւս արդիւնք չէ տուած:
«Մեր նախագահը կը փափաքի բոլոր համանախագահներուն մօտեցումները նկատի ունենալով՝ ստեղծել 2007-ի եւ 2009-ի նախագիծերը մէկտեղող փաստաթուղթ մը: Այդ գործին նուիրուած է արդէն 10 հանդիպում, որոնց միշտ մասնակցած են ֆրանսացի եւ ամերիկացի համանախագահները, ինչպէս նաեւ ԵԱՀԿ-ի ներկայացուցիչը՝ ամբողջութեամբ ծանօթանալով գործընթացին», նշած է Ռուսիոյ արտաքին գործոց նախարարը:

 

LEAVE A REPLY

Please enter your comment!
Please enter your name here