Ժողովրդային Ապստամբութեան Հաւանականութիւն Ատրպէյճանի Մէջ

0
149

Ատրպէյճանի Մտաւորականներու համախմբումի համահիմնադիր, քաղաքագէտ Էլտար Նամազով յայտնած է, թէ իշխանութիւններու հրաժարականի պահանջով Իսմայիլիի մէջ շարունակուող ցոյցերը «պիտի կրկնուին երկիրի բոլոր շրջաններուն մէջ»: Ան ազդարարած է, թէ «միայն ոստիկանութեան ուժերով այդ դժգոհութեան կանխումը անկարելի է: 2013-ին Ատրպէյճանի մէջ անպայման տեղի պիտի ունենան ժողովրդավարական արմատական փոփոխութիւններ»:
Ատրպէյճանական «Մետիաֆորում» լրատուական կայքին հետ հարցազրոյցի մը ընթացքին, նամազով ըսած է, որ Մտաւորականներու համախմբումը բազմիցս զգուշացուցած էր, թէ երկիրը կը գտնուի շատ բարդ իրավիճակի մէջ,որուն հետեւանքով՝ «ընկերային պայթումի» մը հաւանականութիւնը մեծ է: «Անօրինականութիւնները այլեւս չհանդուրժող մարդիկ, օր մը պիտի ապստամբին, եթէ իշխանութիւնները լուրջ բարեփոխումներ եւ արմատական փոփոխութիւններ չիրագործեն», աւելցուցած է ան:
«Ցաւալի է, որ իշխանութիւնները կը շարունակեն անտեսել մտաւորականութեան կոչերը, եւ բարեփոխումներու փոխարէն՝ վերջերս աւելի կոշտ եւ անզիջող արշաւի մը դիմած են Մտաւորականներու համախմբումին դէմ: Իրադարձութիւններու զարգացումը ցոյց կու տայ, որ երկիրի բոլոր շրջաններուն մէջ նկատուող անօրինութիւններուն նկատմամբ դժգոհութիւնը հասած է բարձր մակարդակի: Մարդիկ գոհ չեն իրենց ընկերային վիճակէն, աշխատավարձերու, պետական նպ-աստներու եւ թոշակներու ցած մակարդակէն, շարունակուող զեղծարարութիւններէն, կաշառակերութենէն եւ ապահովական մարմիններու կամայականութիւնէն: Հակակառավարական ցոյցերուն պատճառը Ատրպէյճանի որդեգրած ներքին քաղաքականութիւնն է: Վարչակարգը չի յարգեր մարդկային իրաւունքները եւ մտահոգ չէ քաղաքացիներու վիճակով», եզրակացուցած է Նամազով:
Յիշեցնենք, թէ իշխանութիւնները արտակարգ դրութիւն հաստատած են Իսմայիլիի եւ մօտակայ քանի մը շրջաններու մէջ, հոն կայացած հակակառավարական ցոյցերուն եւ խռովութեանց հետեւանքով:

 

LEAVE A REPLY

Please enter your comment!
Please enter your name here