Հայաստանի Մէջ Ամէնէն Աւելի Վաճառուող Գիրքերու Ցանկը

0
268

 «Արմենփրէս» լրատուական գործակալութեան կողմէ ուղղուած հարցումներուն իբրեւ արդիւնք ի յայտ եկած է, որ երեւանեան գրախանութներէն ամէնէն աւելի գնուած գիրքերուն ցանկը կրկին կը գլխաւորէ Յովհաննէս Թումանեանի «Հեքիաթները»: Երկրորդ դիրքին վրայ է Հանս Քրիսթիան Անտըրսընի «Հեքիաթները» գիրքը: Ռուսական ժողովրդական հեքիաթները կը շարունակեն հետաքրքրել փոքրիկներ. արդարեւ, «Փոքոնիկը» ամէնէն աւելի գնուած գիրքերուն երրորդն է:
Ցանկի չորրորդ դիրքին վրայ է ժամանակակից հայ գրող Արամ Պաչեանի «Ցտեսութիւն, ծիտ» գիրքը: Ամերիկացի նշանաւոր գրող Հենրի Միլլըրի «Խեցգետնի արեւադարձը» այս անգամ հինգերորդ տեղը կը գրաւէ։
Թումանեանի, Անտըրսընի եւ ռուսական ժողովրդական հեքիաթներուն զուգահեռ փոքրիկները հետաքրքրուած են նաեւ վեցերորդ դիրքին վրայ գտնուող Ղազարոս Աղայեանի «Հեքիաթներ» ժողովածուով: Երեւանեան գրախանութներուն մէջ պահանջուած է նաեւ ամերիկացի գրող Ռիչըրտ Պախի «Ճոնըթըն Լիւ-ինքսթըն անունով ճայը» գիրքը: Անիկա կը գրաւէ եօթներորդ դիրքը, իսկ անկէ ետք կու գայ Գրիգոր Նարեկացիի «Մատեան ողբերգութեան»ը: Իններորդ դիրքին վրայ է Լեւոն Ներսիսեանի «Վերջին խօսքը» գիրքը: Նշանաւոր դասականներուն ու հեքիաթագիրներուն կարգին իր հետաքրքրութեամբ ու վաճառքով հիմնական տեղ կը գրաւէ նաեւ Փաուլօ Քոելոյի «Ալքեմիկոսը»՝ տասներորդ դիրքը գրաւած։
«Արմենփրէս»ի գործընկեր–գրախանութներուն վրայ աւելցած է նաեւ «Արթբրիջ»ը:
Երեւանի գրախանութներուն մէջ ամէնէն աւելի վաճառուած հայերէն գեղարուեստական գիրքերու երկրորդ ցանկը այս անգամ պիտի ներկայացնէ նաեւ հրատարակութիւնը: Փափաք կայ հրապարակելու նաեւ վաճառուած գիրքերուն թուային տուեալները, սակայն գործընկեր-գրախանութներուն խնդրանքով որոշուեցաւ ձեռնպահ մնալ եւ ժամանակաւորապէս չհրապարակել զանոնք: Այժմ կը քննարկուին թուային տուեալներու հետագայ հրապարակման ձեւերը:
Ամէնէն աւելի գնուած հայերէն գեղարուեստական գիրքերու ցանկը պատրաստուած է երեւանեան վեց գրախանութներուն հետ համագործակցութեամբ: Հարցումներուն մասնակցած են «Նոր գիրք», «Նոյեան տապան», «Մէկ պրինտ», «Բիւրոկրատ», «Բուքինիստ» եւ «Արտբրիջ» գրախանութները: Հարցում ուղղելու ընթացքին նկատի չեն առնուած մասնագիտական, տեղեկատուական ու ուսումնական բնոյթի գիրքերն ու դասագիրքերը: «Արմենփրէս»ը պիտի ընդլայնէ հարցումներուն ցանցը՝ ներառելով նոր գրախանութներ, տուեալները առաւել բազմակողմանի ու հետաքրքրական դարձնելու նպատակով:

 

LEAVE A REPLY

Please enter your comment!
Please enter your name here