Հայերու Վրայ Կատարուած Յարձակումներուն Դէմ Բողոքի Ցոյց

0
129

Պոլսոյ հայաշատ Սամաթիա թաղամասին մէջ հայերու վրայ կատարուած յարձակումներուն դէմ իրենց բողոքի ձայնը բարձրացնելու համար թուրքերը երէկ ցոյց մը կազմակերպած են: Վկայակոչելով հայկական «Ակօս» շաբաթաթերթը` «Արմենփրես» լրատու գործակալութիւնը կը հաղորդէ, որ երթին մասնակիցները Քոճամուսթաֆափաշա կանգառէն քալած են դէպի Սամաթիոյ հրապարակը:

«Հայ ժողովուրդի կողքին ենք, խտրականութեան ճամբայ պիտի չտանք», «Մի՛ դպչիր իմ հայ դրացիիս», «Ատելութիւնը` ձեզի, մարդկութիւնը` մեզի», գրութեամբ պաստառները իրենց ձեռքերուն ցոյցին մասնակցած են նաեւ թուրք երեսփոխաններ: Մասնակիցները մեխակներ զետեղած են 2012-ի դեկտեմբերի վերջին սպաննուած տարեց հայ կնոջ` Մարիցա Քիւչիւքի տան առջեւ: Սամաթիոյ բնակիչները ցոյցը ողջունած են ծափահարութիւններով:

Թուրքիոյ խորհրդարանի Մարդկային Իրաւանց ուսումնասիրման յանձնախումբի անդամ եւ Մերսինի շրջանի երեսփոխան Էրթուղրուլ Քիւքչիւ Սամաթիոյ հրապարակին վրայ իր ունեցած ելոյթին ժամանակ ուշադրութիւն հրաւիրած է այն փաստին վրայ, որ յարձակումները կատարուած են խտրականութեան հողի վրայ եւ ընդգծած է կատարուածին շուրջ հետաքննութիւն կատարելու անհրաժեշտութիւնը:

«Սամաթիոյ Մէջ Հայ Կիներու Դէմ Բռնարարքները
Ցեղապաշտական Բնոյթ Ունին»

Թուրքիոյ մարդկային իրաւանց կազմակերպութիւնը Պոլսոյ Սամաթիա թաղամասին մէջ հայերու դէմ տեղի ունեցած բռնարարքներուն վերաբերեալ զեկուցում մը հրապարակած է:

«Ակօս» շաբաթաթերթը կը հաղորդէ, որ զեկուցումին հեղինակները ընդգծած են, որ բռնարարքները կատարուած են ցեղապաշտական դրդապատճառներով եւ ոստիկանութենէն պահանջած են հետաքննութիւնները ընդլայնել:

«Յարձակումներու զոհերը նման են` անոնք տարեց, կին եւ հայ են: Ակնյայտ է, որ հիմնական նպատակը կողոպուտը չէ: Տարեց եւ անուժ կիներ, որոնք դիւրութեամբ կրնան «վնասազերծուիլ», բռնութեան եւ ծեծի կ՛ենթարկուին», ըսած է կազմակերպութեան ղեկավար Մերալ Չըլտըր:

Մամլոյ ասուլիսին ներկայ լրագրողներէն մէկը տեղեկացուցած է, որ Սուլթան Այքարի յարձակումի ենթարկուելու օրը քարկոծուած է նաեւ տեղւոյն յունական եկեղեցին:

Զեկուցումին մէջ ներկայացուած են նաեւ Սամաթիոյ հայ բնակիչներու կարծիքները: «Հայ բառը իբրեւ հայհոյանք կ՛օգտագործուի: Այնքան ատեն որ «հայը» տակաւին հայհոյանք է, նման յարձակումներն ու սպանութիւնները շարունակական պիտի ըլլան: Այսօր ութսունը անց մարդիկ, վաղը` երեսուն, միւս օրը` քառասուն տարեկանները: Քանի տակաւին մեր անունը իբրեւ հայհոյանք կ՛օգտագործուի, այս միջադէպերուն վերջ պիտի չտրուի», ըսած է անոնցմէ մէկը:

Այլ բնակիչ մը նշած է. «Երբ մէկը` օրինակ` Մուսթաֆան, Օսմանին, Ահմեթին կը սպաննէ, անոր մարդասպան կը նկատեն, նոյնիսկ բանտին մէջ անոր հետ իբրեւ մարդասպան կը վարուին: Սակայն երբ մէկը` օրինակ` Յակոբի, Խաչատուրի սպաննէ, հերոս կը դառնայ եւ մինչեւ իսկ բանտին մէջ իբրեւ հերոս կը դիտուի: Այս է տարբերութիւնը»:

«Այսօր Պոլսոյ հայ բնակչութիւնը ընդհանուր բնակչութեան մէկ տոկոսն իսկ չէ, սակայն հայերու յանցագործութեան թիրախին մէջ յայտնուելուն հաւանականութիւնը շատ մեծ է», ըսած է մէկ այլ բնակիչ:

Զեկուցումին մէջ տեղ գտած են հետեւեալ եզրայանգումները. Սամաթիոյ հայերը յարձակումի վտանգի առջեւ են: Հասարակութեան մը միութեան ամէնէն խոցելի կէտը անօգնական, ուշադրութեան կարիք եղող ընտանիքի մեծերը, տարեցներն են: Սակայն Սամաթիոյ հայերուն ամէնէն թոյլ, ամէնէն զգայուն եւ ամէնէն ցաւոտ տեղը կը դպչին:

Կատարուած սպանութիւնը պարզապէս կողոպուտի նպատակով չէ կատարուած, անիկա բռնութիւն պարունակած է:

Սամաթիոյ հայ բնակչութիւնը անհանգիստ է: Որքան ալ չուզեն ընդունիլ, զգացնել տալ, ատիկա հայ ինքնութեան ուղղուած ցեղապաշտութեան եւ ատելութեան դրսեւորում է:

 

LEAVE A REPLY

Please enter your comment!
Please enter your name here