ԵԱՀԿ-Ի ՀԱՄԱՆԱԽԱԳԱՀՆԵՐԸ ԿԸ ԽՈՐՀՐԴԱԿՑԻՆ ՆԱԼՊԱՆՏԵԱՆԻ ՀԵՏ

0
102

 ԵԱՀԿ Մինսքի խմբակի համանախագահներ Իան Քելիի (Միացեալ Նահանգներ), Իկոր Փոփովի (Ռուսիա) եւ Ժագ Ֆորի (Ֆրանսա) Փարիզի մէջ  հանդիպումներ ունեցան Հայաստանի եւ Ատրպէյճանի արտաքին գործոց նախարարներ Էտուարտ Նալպանտեանի եւ Էլմար Մամետիարովի հետ: Ըստ ԵԱՀԿ-ի գրասենեակին, հանդիպման մասնակցած է նաեւ ԵԱՀԿ-ի ներկայ նախագահի անձնական ներկայացուցիչը՝ Անճէյ Քասփրչիքը:
Համանախագահները շարունակած են նախարարներուն հետ քննարկել խաղաղ գործընթացը առաջ մղելու աշխատանքային առաջարկները, որոնք կողմերին ներկայացուած էին անցեալ տարուան Հոկտեմբերին: Անոնք նաեւ կարծիքներ փոխանակած են փոխադարձ վստահութեան ամրապնդման հնարաւոր տարբերակներուն վերաբերեալ:
Միջնորդները վկայակոչած են 2011-ի Ապրիլ 14-ին եւ 2012-ի Յուլիս 13-ին կատարուած յայտարարութիւններն ու նախարարներուն հետ քննարկած են Լեռնային Ղարաբաղի օդակայանի եւ հոնկէ քաղաքացիական թռիչքներ կատարելու հարցը:
Նախարարներն ու համանախագահներն ընդգծած են են ԵԱՀԿ Մինսքի խմբակի կարեւորութիւնը՝ ղարաբաղեան հակամարտութեան կարգաւորման գործին մէջ: Նախարարները նաեւ հաստատած են իրենց աջակցութիւնը տագնապին խաղաղ կարգաւորման, յայտարարելով, թէ պատրաստ են բանակցութիւնները շարունակելու: Նախարարներն ու համանախագահները համաձայնած են յառաջիկայ շաբաթներուն շարունակել խաղաղ գործընթացի քննարկումը:
Միւս կողմէ, ատրպէյճանական «Էյ.Փի.Էյ.» լրատու գործակալութիւնը կը հաղորդէ, թէ հանդիպման ընթացքին ատրպէյճանցի նախարարը անգամ մը եւս օրակարգի նիւթ դարձուցած է Արցախ հաստատուող սուրիահայերու հարցը ու այդ կապակցութեամբ Պաքուի մտահոգութիւններ փոխանցած է, միաժամանակ պնդելով, թէ նման քայլերը «ապօրինի եւ անընդունելի են»: Մամետիարով ապօրինի նկատած է նաեւ Ստեփանակերտի օդակայանին գործունէութիւնը:

 

LEAVE A REPLY

Please enter your comment!
Please enter your name here