ԸՆՏՐԱԿԱՆ ՆՈՐ ՕՐԻՆԱԳԻԾԻՆ ՇՈՒՐՋ ՎՃՌԱԿԱՆ 48 ԺԱՄԵՐ

0
127

 Լիբանանի խորհրդարանական  յառաջիկայ ընտրութիւններուն  օրինագիծին  շուրջ  խորհրդակցութիւններու ծիրը   հասաւ  Փարիզ: Արդարեւ Ֆրանսայի մայրաքաղաքին մէջ  նախագահ   Ֆրանսուա Հոլանտ ընդունեց  Ընկերվար Յառաջդիմական Կուսակցութեան  ղեկավար  Ուալիտ Ճոմպլաթը: Վերջինս  յայտարարեց, թէ ոչ ոք կրնայ  մէկ ուրիշը  ջնջել ընտրութիւններու միջոցաւ:  Ճոմպլաթ   այսօր  հանդիպում մը պիտի ունենայ նախկին վարչապետ Սաատ Հարիրիի  հետ:  Հարիրի երէկ  ընդունեց   Փաղանգաւոր Կուսակցութեան պետ Ամին Ճեմայէլը:

Հանրապետութեան նախագահ Միշել Սըլէյման երէկ Պաապտայի մէջ ընդունեց Մուսթաքպալ հոսանքի  պետ  Ֆուատ Սինիորան, որուն հետ քննարկեց ընտրական հարցեր, ինչպէս նաեւ առկայ ընտրական օրինագիծերն ու քաղաքական բազմազանութիւնը պահպանող եւ երկրին սահմանադրութիւնը հարազատօրէն դրսեւորող ընտրական արդի օրէնքի մը յանգելու անհրաժեշտութիւնը:Սինիորա  յայտնեց, թէ Մուսթաքպալ հոսանքը պիտի  բացակայի վաղը՝ Չորեքշաբթի օր  խորհրդարանական յանձնախումբերու նիստէն: Նախագահ Սըլէյման այսօր Պաապտայի պալատին մէջ պիտի գլխաւորէ կառավարութեան նիստին: Նախագահ Սըլէյման վաղը պիտի  մեկնի  Քուէյթ:

 Նշենք, որ խորհրդարանի նախագահ Նեպիհ Պըրրի խորհրդարանի միացեալ յանձնախումբերը` վարչական եւ արդարութեան հարցերու, ելեւմուտքի եւ պետական պիւտճէի, արտաքին եւ արտերկրի լիբանանցիներու հարցերու, ինչպէս նաեւ պաշտպանութեան, ներքին եւ քաղաքապետութեանց հարցերու, հրաւիրեց նիստի մը, որ տեղի պիտի ունենայ վաղը` Չորեքշաբթի առաւօտեան: Նիստին ընթացքին պիտի ներկայացուի ընտրական օրէնքի քննարկման խորհրդարանական ենթայանձնախումբին տեղեկագիրը:

Ընտրական օրինագիծերը քննարկող խորհրդարանական ենթայանձնախումբը այսօր պիտի գումարէ իր հերթական  նիստը` վաւերացնելու համար իր աշխատանքներուն եւ քննարկումներուն ատենագրութիւնը:

Պըրրի զարմանք յայտնեց խորհրդարանի միացեալ յանձնախումբերուն նիստին հրաւէրին մասին հակազդեցութիւններուն համար. ան նշեց, որ ընտրական օրինագիծ մը քննարկելու առումով խորհրդարանական ենթայանձնախումբին բանավէճը պատասխանատու կեցուածք չի դրսեւորեր` աւելցնելով, որ ինք ձեռնածալ պիտի չմնայ այդ իմաստով: «Ո՛վ որ կը կարծէ, թէ ժամանակ անցընելով կարելի պիտի ըլլայ երեսփոխանական ընտրութիւնները 1960-ի ընտրական օրէնքին հիման վրայ կատարել, չարաչար կը սխալի», ըսաւ Պըրրի:  Փաղանգաւոր եւ  Լիբանանեան  Ուժեր կուսակցութիւնները պիտի մասնակցին  խորհրդարանական  յանձնախումբերու նիստին:  

 

 

LEAVE A REPLY

Please enter your comment!
Please enter your name here